ޖަރުމަނުގެ ބޮރޫޝިއާ ޑޯޓްމަންޑަށް ކުޅެމުން އަންނަ އާލިން ހާލަންޑް މެންޗެސްޓަރ ސިޓީއަށް ބަދަލުވާން އެއްބަސްވެއްޖެއެވެ.

ފުޓްބޯޅައިގެ ޓްރާންސްފަރ މާކެޓު ދިރާސާ ކުރުމުގައި އެންމެ އިތުބާރުހުރި ކުޅިވަރު ނޫސްވެރިޔާ ފަބްރީޒިއޯ ރޮމާނޯ ދާދި ދެންމެއަކު ކުރި ޕޯސްޓެއްގައި ބުނީ، ހާލަންޑް ސިޓީއަށް ބަދަލުވުމަށް އެއްބަސްވެފައިވާ ކަމަށެވެ. އަދި އެއްބަސްވުން މިހާރު ހަދާފައިވާއިރު، ލިޔެކިޔުމުގެ ކަންތައް ވަރަށް އަވަހަށް ނިންމާނެކަމަށްވެސް އޭނާ ބުންޏެވެ. ރިޕޯޓުތައް ބުނާ ގޮތުން މިހަފްތާގެ ތެރޭގައި ހާލަންޑް ރަސްމީކޮށް ސިޓީއަށް ބަދަލުވާކަން އަންގާނެއެވެ.

ސިޓީއަށް ދިއުމަށް ހާލަންޑް އެއްބަސްވެފައި ވާއިރު، ސިޓީގައި މިހާރު އޭނާ ވަނީ ފުރަތަމަ މެޑިކަލް ޓެސްޓުވެސް ހަދާފައިކަމަށް ފަބްރީޒިއޯގެ ޕޯސްޓުގައި ބުނެފައިވެއެވެ. ސިޓީއަށް ދާން ހާލަންޑް އެއްބަސްވެފައި ވާއިރު، އޭނާ ހޯދުމަށް ގިނަ ކްލަބުތަކަކުން އަންނަނީ މަސައްކަތްކުރަމުންނެވެ. އޭގެ ތެރޭގައި ރެއާލް މެޑްރިޑް، ބާސެލޯނާ، ބަޔާން މިއުނިކް އަދި ޕީއެސްޖީ ހިމެނެއެވެ.

ރިޕޯޓުތައް ބުނާ ގޮތުން ހާލަންޑްގެ ރިލީޒް ކްލޯޒްއެއްގެ ގޮތުގައި ސިޓީން ޑޯޓްމަންޑަށް 75 މިލިއަން ޔޫރޯ ދޭން ޖެހޭނެއެވެ.

އުމުރުން 21 އަހަރުގެ ހާލަންޑް ޑޯޓްމަންޑާއި ގުޅުނީ 2020 ވަނަ އަހަރުގެ ޖެނުއަރީ މަހުގައެވެ. އޭގެ ފަހުން 88 މެޗު ޑޯޓްމަންޑަށް ކުޅެ 85 ލަނޑު ހާލަންޑް ޖަހާފައިވެއެވެ.