ޔުނައިޓެޑްގެ ދަނޑުގައި ސިޓީން ހޯދީ ފުރިހަމަ މޮޅެއް، ހާލަންޑް ދެ ލަނޑު ޖެހި
30 އޮކްޓޯބަރު 2023 | ހޯމަ 02:27ސިޓީން މެޗު ކާމިޔާބުކުރީ 3-0 ން
ސިޓީގެ ދެވަނަ ލަނޑު ޖެހުމަށްފަހު ހާލަންޑް އެހެން ކުޅުންތެރިންނާއެކު: ފޮޓޯ-ރޮއިޓަރސް
މެންޗެސްޓަރ ޔުނައިޓެޑްގެ ދަނޑުގައި އެޓީމާ ދެކޮޅަށް ކުޅެ, ޗެމްޕިއަން ސިޓީން ފުރިހަމަ މޮޅެއް ހޯދައިފިއެވެ.
ސިޓީން 3-0 ން ކުރި ހޯދި މެޗުގައި ހާލަންޑް ދެ ލަނޑު ޖެހިއެވެ. އަދި ތިންވަނަ ލަނޑު ޖަހަން ފޮޑެންއަށް ފުރުޞަތު ތަނަވަސްކޮށްދިނީވެސް ހާލަންޑެވެ. ފުރަތަމަ ހާފްގައި ފުރަތަމަ ލަނޑު ޖަހާ ކުރިހޯދީ ހާލަންޑެވެ. އެއީ ރޮޑްރީއަށް ކުރި ފައުލަކަށް ދިން ޕެނަލްޓީއެކެވެ. ދެވަނަ ލަނޑު ޖެހީ ދެވަނަ ހާފް ފަށައިގެން ހަތަރު ވަނަ މިނެޓުގައެވެ. ހެޓްރިކެއް ހަދަން ލިބުނު ފުރުޞަތުގައި ބޯޅަ ފޮނުވާލެވުނީ ކީޕަރު އޮނާނާއާ ދިމާއަށެވެ. އެފުރުޞަތުގެ ބޭނުން ނުކުރެވުނަސް 80 ވަނަ މިނެޓުގައި ފޮޑެން ލަނޑު ޖެހީ ގޯލްއޭރިޔާ ތެރެއިން ސީދާ ފޮޑެން ފަޔަށް ހާލަންޑް ހުރަސްކޮށްލި ބޯޅައިންނެވެ.
ސިޓީއަށް 100 ވަނަ މެޗު ހަމަކުރި މިޑްފީލްޑަރ ގްރީލިޝްއާއި, ބާނާޑޯ ސިލްވާގެ އިތުރުން ރޮޑްރީވެސް މެޗުގައި މޮޅަށް ކުޅުނެވެ. ހާލަންޑް ދެވަނަ ގޯލް ޖެހީ ބާނާޑޯ ސިލްވާ ތަނަވަސްކޮށްދިން ފުރުޞަތަކުންނެވެ. އަދި ތިންވަނަ ގޯލް ޖަހަން ފުރުޞަތު ތަނަވަސްވީ ރޮޑްރީ ފޮނުވާލި ބާރު ބޯޅައެއް ކީޕަރު އޮނާނާ އަތުން ޖައްސާ ފޮނުވާލުމުން, އެބޯޅަ ހާލަންޑަށް ލިބިގެންނެވެ.
މެޗުން މޮޅުވުމުން މެންޗެސްޓަރ ސިޓީ އޮތީ 24 ޕޮއިންޓާއެކު އާސެނަލްއާ އެއް ހަމައެއްގައެވެ. ފައިދާ ގޯލުންވެސް ދެޓީމް ވަނީ އެއްވަރެވެ. ތާވަލްގެ އެއްވަނާގައި އޮތީ ދެ ޕޮއިންޓްގެ ލީޑަކާއެކު ޓޮޓެންހަމް އެވެ.
