އެމްބާޕޭގެ ހިޔާލު އެއްފަރާތްކޮށް ހާލަންޑް ގަންނަނީ

ކީލިއަން އެމްބާޕޭ ގަތުމަށް ކުރާ މަސައްކަތް ކާމިޔާބުވަމުންނުދާތީވެ، މެންޗެސްޓާ ސިޓީގެ އާލިން ހާލަންޑް ގަތުމަށް ރެއާލް މެޑްރިޑުން އަމާޒު ޖަހައިފި އެވެ.

ނޯވޭގެ ފޯވަޑަށް ރެއާލްގެ ކަޅި އަމާޒުވީ މިދިޔަ ސީޒަނުގައި 53 މެޗުން 52 ގޯލު އަދި މި ސީޒަނުގައި 20 މެޗުން 19 ގޯލު ޖެހުމުންނެވެ. އޭނާ އަކީ ގިނަ ބަޔަކު ފާހަގަ ކުރާ ގޮތުގައި މިވަގުތު ދުނިޔޭގައި ހުރި އަދި ކުރިއަށް އޮތްތަނުގައި ދުނިޔޭގެ ފުޓްބޯޅަ ލީޑްކުރާނެ ފޯވަޑެވެ.

ހާލަންޑް ވިއްކާލަން ޖެހިއްޖެނަމަ އެކަމަށް ސިޓީން ހަމަޖައްސާފައިވާ އަގަކީ 200 މިލިއަން ޔޫރޯ އެވެ. އެކަމަކު ހާލަންޑް އޭނާ ސިޓީއާއެކު ހަދާފައިވާ ކޮންޓްރެކްޓްގެ ފުރިހަމަކުރާނަމަ މި އަގު 150 މިލިއަން ޔޫރޯ އަށް ކުޑަވާނެ އެވެ. އެއީ ކޮންޓްރެކްޓްގައި ބާކީ އަހަރެއް އޮއްވައި އެހެން ކުލަބަކަށް ބަލުވާނަމަ އެވެ.

ސިޓީއާއެކު ހާލަންޑް ހަދާފައިވާން ކޮންޓްރެކްޓްގެ މުއްދަތު ހަމަވާނީ 2027 ވަނަ އަހަރު އެވެ. އިނގިރޭސި ރިޕޯޓްތައް ބުނާ ގޮތުން ކެޕްޓަން އިކާއީ ގުންޑޮގަން ކޮންޓްރެކްޓް ހަމަކޮށް ފްރީ ޓްރާންސްފާއެއްގައި ބާސެލޯނާ އަށް ބަދަލުވެފައިވާތީވެ މިފަދަ ތަކުރާރުވިޔަ ނުދިނުމަށް ސިޓީން ކޮންޓްރެކްޓް ހަމަވުމުގެ ކުރިން ނުވަތަ އައު ކޮންޓްރެކްޓެއްގައި ސޮއިނުކުރާނަމަ ހާލަންޑް ވިއްކާލާނެ އެވެ.

ރެއާލް މެޑްރިޑްގެ އިތުރުން އޭނާ ގަތުމަށް ބާސެލޯނާއިން ވެސް 2025ގައި ބިޑްކުރާނެ ކަމަށް ސްޕޭނުގެ ނޫސްތަކުން ލަފާކުރެ އެވެ.

ރެއާލްއަށް ވަނީ ދެ ފަހަރެއްގެ މަތީން އެމްބާޕޭ ގަތުމަށް މަސައްކަތްކޮށް ނާކާމިޔާބުވެފަ އެވެ. އެއީ ބުނެވޭ ގޮތުގައި ކުޅުންތެރިޔާއާއެކު ސިއްރު އެއްބަސްވުމަށް ވެސް އާދެވުނު ފަހުން، އޭނާގެ ކުލަބުން ވިއްކާލަން ބޭނުންނުވެގެންނެވެ.