ހާލަންޑުގެ ލަނޑުން މޮޅުވެ ސިޓީ އެއް ވަނަ އަށް

އިނގިރޭސި ޕްރިމިއާ ލީގުގައި ސައުތެމްޓަންއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން މެންޗެސްްޓަރ ސިޓީ އެއް ވަނަ އަށް ޖެހިލައިފި އެވެ.

ސިޓީގެ އިއްތިހާދު ސްޓޭޑިއަމްގައި ކުޅުނު އެ މެޗު އެ ޓީމުން ކާމިޔާބު ކުރީ 1-0 އިންނެވެ. އެއީ މެޗުގެ ފުރަތަމަ ހާފުގައި ލަނޑު ޖަހައިގެންނެވެ.

މެޗު ފަށައިގެން ފަސް ވަނަ މިނެޓުގައި ސިޓީން ވަނީ ލަނޑު ޖަހައި ލީޑު ނަގައިފަ އެވެ. މަތެއުސް ނޫނޭޒް ތަނަވަސްކޮށްދިން ފުރުސަތެއްގައި ސިޓީ އަށް އެ ލަނޑު ޖަހައިދިނީ ނޯވޭގެ ފޯވާޑު އާލިން ހާލަންޑު އެވެ. މެޗުގައި ސިޓީން ވަނީ އިތުރު ލަނޑު ޖަހާނެ ފުރުސަތުތަކެއް ވެސް ތަނަވަސްކޮށްފަ އެވެ. އެގޮތުން ދެ ވަނަ ލަނޑެއް ޖަހާނެ ފުރުސަތު ހާލަންޑަށް ވެސް ވަނީ ލިބިފަ އެވެ. މީގެ އިތުރުން ސިޓީ އަށް ކުޅެމުން އަންނަ އިންގްލެންޑުގެ ފިލް ފޮޑެން އަށް ވެސް ވަނީ މެޗުގައި ލަނޑު ޖަހާނެ ފުރުސަތު ލިބިފަ އެވެ.

މޮޅާއެކު ސިޓީ އެއް ވަނައިގައި އޮތީ ދެ ޕޮއިންޓުގެ ލީޑަކުންނެވެ. އެއީ މިހާތަނަށް ލީގުގައި ކުޅުނު ނުވަ މެޗުން 23 ޕޮއިންޓު ހޯދައިގެންނެވެ. ހަތް މެޗުން ސިޓީ މޮޅުވެފައިވާއިރު، ދެ މެޗުން ވަނީ އެއްވަރުވެފަ އެވެ. ސިޓީ އަށް ވުރެ އެއް މެޗު މަދުން ކުޅެގެން ދެ ވަނައިގައި އޮތް ލިވަޕޫލަށް ލިބެނީ 21 ޕޮއިންޓެވެ. ލީގުގައި އާސެނަލާ ދެކޮޅަށް ކުޅޭ މެޗުން މޮޅުވެ އަލުން އެއް ވަނަ މަގާމަށް ޖެހިލުމުގެ ފުރުސަތު ލިވަޕޫލަށް އޮންނާނެ އެވެ.