ބޮޑު މޮޅެއް ހޯދައިގެން މާޒިޔާ މަޤާމަށް!
6 މެއި 2022 | ހުކުރު 14:08މާޒިޔާ އެއްވަނައިގައި އޮތީ 30 ޕޮއިންޓާއެކު
މެޗުގައި ތިން ލަނޑު ޖެހި ކޯނޭ ހަމްޕުއާއެކު އުފާފާޅުކުރަނީ: ފޮޓޯ-މާޒިޔާ
ޔުނައިޓެޑް ވިކްޓްރީ އަތުން ބޮޑު މޮޅެއް ހޯދައިގެން މާޒިޔާ އެމީހުންގެ މަޤާމަށް ޖެހިލައިފިއެވެ. ލީގު ޗެމްޕިއަން މާޒިޔާ މެޗަށް ނިކުއިންއިރު އޮތީ ދެވަނައިގައެވެ. އެއީ އީގަލްސް ގްރީން އަތުން މޮޅުވުމުންނެވެ.
މާޒިޔާ އަލުން އެއްވަނައަށް ޖެހިލީ 7-1 ން ޔުނައިޓެޑް ވިކްޓްރީ ބަލިކޮށްގެންނެވެ. މެޗުގައި މާޒިޔާގެ ކޯނޭ ތިން ލަނޑުޖަހާ ހެޓްރިކް ހެދިއެވެ. ކޯނޭ ފުރަތަމަ ލަނޑު ޖެހީ މެޗު ފަށައިގެން ދެވަނަ މިނިޓްގައެވެ. މާޒިޔާގެ އެހެން ލަނޑުތައް ޖެހީ ޓަނާ, އިބްރާހީމް އައިސަމް, ނާއިޒު ހަސަން (ދާދު), އަދި އަކްރަމް އަބުދުލްޣަނީއެވެ. ޔުނައިޓެޑް ވިކްޓްރީގެ ހަމައެކަނި ލަނޑުޖެހީ އިވާންއެވެ. މިމޮޅާއެކު މާޒިޔާ އެއްވަނައިގައި އޮތީ 11 މެޗުން 30 ޕޮއިންޓް ހޯދައިގެންނެވެ. ދެވަނައިގައި އީގަލްސް އޮތީ 28 ޕޮއިންޓާއެކުއެވެ. ފައިދާ ގޯލުން މިހާރު ތިންވަނަ ލިބެނީ ސުޕަރ ޔުނައިޓެޑް ސްޕޯރޓްސްއަށެވެ. ޔޫވީއަށް ލިބެނީ ހަތަރުވަނައެވެ. އެއީ 14 ޕޮއިންޓާއެކުއެވެ. ސަސްވެސް އޮތީ 14 ޕޮއިންޓާއެކުއެވެ.
ލީގުގައި ހުކުރު ދުވަހުގެރޭ ވާދަކުރާނީ ޓީސީއާއި ދަ ގްރާންޑޭއެވެ.
