މަރަޑޯނާ ވޯރލްޑް ކަޕުގައި ކުޅުނު ޖަރޒީއެއް 7.1 މިލިއަން ޕައުންޑަށް ވިއްކާލައިފި

އާޖެންޓީނާގެ ފުޓްބޯޅަ ލެޖެންޑު ޑިއެގޯ މަރަޑޯނާ 1986 ވަނަ އަހަރުގެ ވޯރލްޑް ކަޕުގައި ކުޅުނުއިރު ލައިގެން ހުރި ޖަރޒީއެއް 7.1 މިލިއަން ޕައުންޑަށް ވިއްކާލައިފިއެވެ.

މިއީ އެތުލީޓެއްގެ ޖަރޒީއެއް މިހާތަނަށް ވިއްކާލި އެންމެ ބޮޑު އަގެވެ. ރެކޯޑު އަގަކަށް ވިއްކާލާފައިވާ މި ޖަރޒީއަކީ 1986 ވަނަ އަހަރުގެ ވޯލްޑް ކަޕުގެ ކުއާޓަރ ފައިނަލުގައި އިންގްލެންޑާއި އާޖެންޓީނާ ބައްދަލުކުރި ކުއާޓަރ ފައިނަލް މެޗުގައި މަރަޑޯނާ ލައިގެން ހުރި ޖަރޒީއެވެ. އުމުރުން 25 އަހަރުގައި މަރަޑޯނާ ވަނީ ތަފާތު މޮޅު ކުޅުމެއް ދައްކައި އާޖެންޓީނާ މޮޅުކޮށްދީގެން އެފަހަރުގެ މުބާރާތުން އިންގްލެންޑު ކަޓުވާލާފައެވެ.

މި ޖަރޒީ ޚާއްސަވަނީވެސް ސަބަބުތަކަކާލައިގެންއެވެ. މި މެޗުގައި މަރަޑޯނާ ވަނީ ދެލަނޑު ޖަހާފައެވެ. އެއީ ދުނިޔޭގެ ފެންވަރުގައި އަދިވެސް ނަން މަޝްހޫރުކޮށް ފާހަގަކުރާ ދެލަނޑެވެ. އޭގެ ތެރެއިން ފުރަތަމަ ލަނޑު މަޝްހޫރުވެފައި ވަނީ "ހޭންޑް އޮފް ގޯޑް ގޯލް"ގެ ނަމުންނެވެ. އެލަނޑު މަރަޑޯނާ ޖެހީ މަތިމަތިން އައި ބޯޅައަކަށް އިންގްލެންޑުގެ ކީޕަރު ޕީޓާ ޝިލްޓަން ފުންމާފައިވަނިކޮށް މަރަޑޯނާގެ އަތުން ޖަހައިގެންނެވެ.

ދެވަނަ ލަނޑަކީ ދަނޑުގެ މެދުތެރެއިން ބޯޅަ ހޯދައި، އިންގްލެންޑުގެ މުޅި ޑިފެންސްލައިން ބީޓް ކުރުމަށްފަހު މަރަޑޯނާ ޖެހި ލަނޑެކެވެ. މި ލަނޑު ވަނީ ފީފާގެ ގޯލް އޮފްދަ ސެންޗުރީއަށްވެސް ހޮވިފައެވެ.

މި މެޗަށްފަހު މަރަަޑޯނާ ވަނީ އޭނާގެ ޖަރޒީ އިންގްލެންޑުގެ މިޑްފީލްޑަރު ސްޓީވް ހޮޖްއާއެކު ބަދަލުކޮށްފައެވެ. އުމުރުން 60 އަހަރުގައި 2020 ވަނަ އަހަރު މަރަޑޯނާ މަރުވުމުން, ޓޮޓެންހަމަށްވެސް ކުޅުނު 59 އަހަރުގެ ސްޓީވް ބުނީ އެޖަރޒީ ނުވިއްކާނެ ކަމަށެވެ. ނަމަވެސް ނިމުނު އޭޕްރިލް މަހުގައި އޮތް އޯކްޝަނެއްގައި އެޖަރޒީ ވަނީ ވިއްކާލާފައެވެ.