މަރަޑޯނާ "ހޭންޑް އޮފް ގޯޑް" ލަނޑު ޖެހި ބޯޅަ ވިއްކާލަނީ

"ހޭންޑް އޮފް ގޯޑް"ގެ ނަމުން މަޝްހޫރުވެފައިވާ އާޖެންޓީނާގެ ފުޓްބޯޅަ ލެޖެންޑް ޑިއެގޯ މަރަޑޯނާ ލަނޑު ޖެހި ބޯޅަ ނީލަމުގައި ވިއްކާލުމަށް ނިންމައިފިއެވެ.

މި ބޯޅަ ވިއްކާލުމަށް ހަމަޖެހިފައިވަނީ ލަންޑަނުގައި ހުންނަ ގްރަހަމް ބަޑް އޯކްޝަންގައެވެ. ބިޑް ކުރުމަށް ފުރުސަތު ހުޅުވާލާނީ އަންނަ ނޮވެމްބަރު މަހުގެ 16 ވަނަ ދުވަހުއެވެ. ނަމަވެސް މި ބޯޅަ ގަންނަން ބޭނުންވާ ފަރާތްތަކަށް މި މަހުގެ 28ން ފެށިގެން އޮންލައިންކޮށް ނީލަމުގައި ރަޖިސްޓަރވުމުގެ ފުރުސަތު ވަނީ ހުޅުވާލާފައެެވެ. ބިޑު ކުރުން ފަށަން ހަމަޖެހިފައިވަނީ 3.4 މިލިއަން ޑޮލަރުންނެެވެ.

ހޭންޑް އޮފް ގޯޑުގެ ނަމުން މަޝްހޫރުވެފައިވާ މި ލަނޑު މަރަޑޯނާ ޖެހީ 1986 ވަނަ އަހަރުގެ ވޯލްޑް ކަޕްގައި އިންގްލެންޑާއި ދެކޮޅަށް އާޖެންޓީނާ ކުޅުނު ކުއާޓާ ފައިނަލް މެޗުގައެވެ. މި ލަނޑަކީ އެމެޗުގައި އިންގްލެންޑުގެ ގޯލު އޭރިއާތެރެއިން ފުންމައިގެން އަރާ އަތުން ގޯލުގެ ތެރެއަށް ބޯޅަ ފޮނުވާލައިގެން މަރަޑޯނާ ކާމިޔާބުކުރި ލަނޑެކެވެ.

ކުއާޓާ ފައިނަލުގައި 2-1ން އިންގްލެންޑުގެ މައްޗަށް އާޖެންޓީނާ ކުރިހޯދި މި މެޗުގައި މަރަޑޯނާ ވަނީ ދެލަނޑު ޖަހާފައެވެ. ފުރަތަމަ ލަނޑު ޖެހިތާ ހަތަރު މިނެޓު ފަހުން މަރަޑޯނާގެ ދެވަނަ ލަނޑު ޖެހީ އިންގްލެންޑުގެ ފަސް ކުޅުންތެރިން ކައިރިން ނައްޓާލުމަށްފަހު ކީޕަރު ޕީޓަރ ޝިލްޓަން ކައިރިންވެސް ބޯޅަ ނައްޓާލާފައެވެ. އާޖެންޓީނާ އެެމެޗުން މޮޅުވީ މަރަޑޯނާ އަތުން ޖެހި ލަނޑަކީ ގޯލެއް ކަމަށް އެމެޗުގެ ރެފްރީ އަލީ ބިން ނަސީރު ނިންމުމުންނެވެ. ނަމަވެސް އޭގެ ގިނަ ދުވަސްތަކެއް ފަހުން މަރަޑޯނާ ވަނީ އޭނާ ލަނޑު ޖެހީ އަތުން ކަމަށް އެއްބަސްވެފައެވެ.

މެޗުގެ ރެފްރީ އަލީ ބިން ނަސީރުގެ މިލްކިއްޔާތުގައި މިހާރުވާ އެބޯޅަ ވިއްކާލުމާއި ގުޅޭގޮތުން އޭނާ ބުނީ އެބޯޅައަކީ ދުނިޔޭގެ ފުޓްބޯޅައިގެ ތާރީޚުގައި ފާހަގަކުރެވޭ ބޯޅައެއް ކަމަށެވެ. އަދި އޭނާ ޤަބޫލުކުރާ ގޮތުގައި މިއީ އެބޯޅަ ވިއްކާލުމަށް އެންމެ ރަނގަޅު ވަގުތު ކަމަށެވެ.

އެމެޗުގައި މަރަޑޯނާ ލައިގެން ހުރި ޖާޒީވެސް ވަނީ މިދިޔަ މޭ މަހު ވިއްކާލާފައެވެ. ނީލަމަށް ލައިގެން އެޖާޒީ ވިއްކާލީ 9.3 މިލިއަން ޑޮލަރަށެވެ. އެއީ ޖާޒީ ވިކޭނެކަމަށް އަންދާޒާ ކުރިވަރަށްވުރެ ދެގުނައަށްވުރެ ބޮޑު އަގެކެވެ.

މިހާތަނަށް ކުޅުންތެރިއެއްގެ ޖާޒީ އެންމެ އަގުބޮޑުކޮށް ވިއްކާލާފައިވަނީ 10.1 މިލިއަން ޑޮލަރަށެވެ. އެއީ 1998 ވަނަ އަހަރު އެންބީއޭ ފައިނަލުގައި ބާސްކެޓް ލެޖެންޑު މިކޭލް ޖޯޑަން ކުޅުނު ޖާޒީއެވެ. އެޖާޒީ ނީލަމުގައި ވިއްކާލީ މިދިޔަ ސެޕްޓެމްބަރު މަހުއެވެ.