އިހުމާލުވުމުގެ ދައުވާ، މަރަޑޯނާގެ މެޑިކަލް ޓީމުގެ މައްޗަށް އުފުލައިފި

ފަރުވާދިނުމުގައި އިހުމާލުވިކަމުގެ ދައުވާ، ފުޓްބޯޅަ ލެޖެންޑު ޑިއޭގޯ މަރަޑޯނާގެ މެޑިކަލް ޓީމުގެ މައްޗަށް އުފުލައިފިއެވެ. ދައުވާ އުފުލާފައިވަނީ އޭނާގެ މެޑިކަލް ޓީމުގައި ހިމެނޭ 8 މީހުންގެ މައްޗަށެވެ.

އުމުރުން 60 އަހަރުގައި މަރަޑޯނާ މަރުވީ ހާރޓްއެޓޭކެއްގެ ސަބަބުންނެވެ. އޭގެ ކުރިން އޭނާގެ ސިކުނޑީގައި ލޭކޮޅެއް ގަނޑުވެފައި ހުރުމުގެ ސަަބަބުން ވަނީ ކުއްލި އޮޕަރޭޝަނެއްވެސް ކޮށްފައެވެ. މަރަޑޯނާ މަރުވީ އެ އޮޕަރޭޝަނަށްފަހު ހޮސްޕިޓަލުން ދޫކޮށްލިތާ ދެ ހަފުތާއެއްހާ ދުވަސް ފަހުން، 2020 ވަނަ އަހަރުގެ ނޮވެމްބަރު މަހުއެވެ.

މަރަޑޯނާ މަރުވުމުގައި، ސިއްހީ ކަންތައްތަކާބެހޭ ފަރާތްތަކުގެ އިހުމާލެއް އޮތްކަމަށް އޭނާގެ އާއިލާއިން މީގެ ކުރިންވެސް ތުހުމަތުކޮށްފައިވާއިރު، މަރަޑޯނާގެ ވަކީލު މަޓިއަސް މޯލާ ވަނީ، އޭނާ މަރުވި ދުވަހު އެމްބިއުލަންސްއަށް ގުޅައިގެން އެ އައުން ލަސްވި މައްސަލައާއި، ސިކުނޑީގެ އޮޕަރޭޝަނަކަށްފަހު ދެ ހަފުތާއެއްހާ ދުވަސް ފަހުން ގެއަށް ބަދަލުކުރި މީހެއްގެ ސިއްހީ ކަންތައްތައް ބެލުމުގައި ހޮސްޕިޓަލުން އިހުމާލުވެފައިވާ މައްސަލަ ހުށަހަޅާފައެވެ.

މަރަޑޯނާ މަރުވިތާ ދޮޅު އަހަރެއްހާ ދުވަސް ފަހުން މިހާރު މިވަނީ އޭނާގެ މެޑިކަލް ޓީމުގައި މަސައްކަތްކުރި 8 މީހުންގެ މައްޗަށްވެސް، އިހުމާލުވުމުގެ ދައުވާ އުފުލާފައެވެ. މި މައްސަލާގައި ވާގޮތުން، މެޑިކަލް ޓީމުން އެކަށީގެންވާ ފަރުވާ މަރަޑޯނާއަށް ދިންނަމަ އޭނާގެ ފުރާނަ ސަލާމަތްކުރެވޭނެއެވެ.

ނަމަވެސް ދައުވާ ލިބޭ މަރަޑޯނާގެ މެޑިކަލް ޓީމުން ވަނީ ދައުވާއަށް އިންކާރު ކޮށްފައެވެ. އަދި މި މައްސަލަ ވީހާވެސް އަވަހަކަށް ކޯޓުން ބޭރުކުރުމަށްވެސް މި ފަރާތްތަކުގެ ވަކީލުން އެދިފައިވެއެވެ.

އާޖެންޓީނާއަށް 1986 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްދިން ކެޕްޓަން މަރަޑޯނާއަކީ ފީފާއިން ހޮވި 20 ވަނަ ގަރުނުގެ އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ފުޓްބޯޅަ ލެޖެންޑެކެވެ.