ޔުއެފާ ޗެމްޕިއަންސްލީގުގެ ފައިނަލުގެ ޖާގައެއް ހޯދުމަށް ގަދަ ދެބާރު, މެންޗެސްޓަރ ސިޓީއާއި ރެއާލް މެޑްރިޑް "ބޮޑު" ފައިނަލަކަށް މިރޭ ނިކުންނާނެއެވެ. ޗެމްޕިއަންސް ލީގު ސެމީފައިނަލް ދެވަނަ ލެގަށް ދެޓީމް ރެއާލް މެޑްރިޑްގެ ދަނޑުގައި ނިކުންނައިރު އެއް ގޯލުން ކުރީގައި އޮތީ ސިޓީއެވެ. އެއީ އިއްތިހާދު ސްޓޭޑިއަމްގައި ކުޅުނު ފުރަތަމަ ލެގު 3-2 ން ކާމިޔާބުކޮށްގެންނެވެ.

ފުރަތަމަ ލެގުގެ މެޗަށްފަހު ރެއާލްގެ ކެޕްޓްން ބެންޒިމާ ބުނެފައިވަނީ ދެވަނަ ލެގުގެ މެޗަކީ ރެއާލްގެ ސަޕޯޓަރުންގެ އެހީ އެންމެ ބޮޑަށް ބޭނުންވާނެ މެޗުކަމަށެވެ. ސަޕޯޓަރުންގެ އެހީގައި މެޗު އަނބުރާލެވޭނެކަމަށާއި, ފައިނަލްގެ އުއްމީދު އެބައޮތްކަމަށެވެ. ކޯޗު ކާލޯ އެންޗެލޮޓީ ބުނީ ފަހަތަށް ފައިބައިގެން ޑިފެންސް ކުރަން އުޅެފިނަމަ ބޮނޑި ލިބޭނެކަމަށާއި, ރިކްސް ނަގަން ޖެހޭނެކަމަށެވެ. ރިސްކް ނަގައިގެން މިސީޒަންގައި ރެއާލްއަށް ކާމިޔާބީތަކެއް ލިބިފައިވާކަމަށާއި, އެކަމުގައި އޮތް އެންމެ ބޮޑު ހިތްހަމަޖެހުމަކީ ފޯވާޑުންނަށް އޮތް އިތުބާރުކަމަށެވެ. ލަލީގާގެ ޗެމްޕިއަންކަން ހޯދައިގެން އިތުބާރާއެކު އޮތް ޓީމްގެ ކޯޗަށް އޮތް ހިތްހަމަޖެހުމަކީ އަމިއްލަ ދަނޑުގައި ދެވަނަ ލެގު ކުޅުމެވެ. ހޯމް އެޑްވާންޓޭޖް ނެގޭނެކަމަށް އެންޗެލޮޓީ ޤަބޫލުކުރެއެވެ. ސިޓީ ބަލިކޮށް ފައިނަލަށް ދަތުރުކުރެވިއްޖެނަމަ އެކަން ވާނީ 35 އަހަރުގެ މޮޑްރިޗް ރެއާލްއާއެކު ދަތުރުކުރާނެ ފަސްވަނަ ޗެމްޕިއަންސްލީގު ފައިނަލަށެވެ.

އަނިޔާއަށްފަހު ކަސެމީރޯ އެނބުރި އައުމަކީ ރެއާލްއަށް އޮތް ހިތްހަމަޖެހުމެކެވެ. ނަމަވެސް ޑޭވިޑް އަލަބާ ފިޓެއް ނޫނެވެ. ސިޓީއަށް ބަލާއިރު ކަންސޭލޯ ސަސްޕެންޝަނަށްފަހު ދެވަނަ ލެގުގައި ކުޅުމުގެ ފުރުޞަތު ބޮޑެވެ. ކައިލް ވޯކާ އަނިޔާއަށްފަހު ވަނީ ޓީމާ ގުޅިފައެވެ. ސިޓީގެ ކޯޗު ޕެޕް ގާޑިއޯލާ ބުނީ ވާނެގޮތް އެއްވެސް މީހަކަށް ނޭންގޭނެކަމަށާއި, ފުޓްބޯޅަ މެޗެއްގެ ނަތީޖާ ނިކުންނާނެގޮތް ނޭންގޭނެކަމަށެވެ. ބައެއް ފަހަރު ހައްޤު ނަތީޖާ ނުލިބޭކަމަށާއި, ބައެއް ފަހަރު ހައްޤު ނޫން ނަތީޖާ ލިބޭކަމަށެވެ.

ރެއާލް ފަހަތަށް ޖައްސާލެއްވިއްޖެނަމަ އެކަން ވެގެންދާނީ ސިޓީ ވިދިދިގެން ޗެމްޕިއަންސްލީގުގެ ފައިނަލްގައި ކުޅޭ ދެވަނަ ފަހަރަށެވެ. އެންމެ ފަހުން ފައިނަލްގައި ސިޓީ ބަލިވީ ޗެލްސީ އަތުންނެވެ. ރެއާލްއަކީ މިމުބާރާތުގެ އެންމެ ކާމިޔާބު ޓީމެވެ. 13 ފަހަރު މުބާރާތް ކާމިޔާބުކޮށްފައިވާ ރެއާލްއިން ވަނީ މިހަފްތާގައި 35 ވަނަ ފަހަރަށް ލަލީގާގެ ޗެމްޕިއަންކަންވެސް ހޯދާފައެވެ. ރެއާލްއާއި ސިޓީ ވާދަކުރާ ސެމީފައިނަލް ދެވަނަ ލެގު ފަށާނީ ބުދަ ދުވަހުގެރޭ 12 ޖަހާއިރުއެވެ. ފައިނަލްގެ ފުރަތަމަ ޖާގަ ހޯދީ ލިވަޕޫލެވެ.