ރައީސް ޔާމީން ހައްޔަރުކުރުމަށް ގޮވާލައި މުޒާހަރާކޮށްފި
މިއީ މޯލްޑިވްސް ޔޫތު ފޯސްއިން ކުރިއަށްގެންދިޔަ މުޒާހަރާއެއް
މޯލްޑިވްސް ޔޫތު ފޯސްއިން ކުރިއަށްގެންދިޔަ މުޒާހަރާގެ ތެރެއިން
ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހައްޔަރުކުރުމަށް ގޮވާލައި, އެމަނިކުފާނުގެ ގެކޮޅު ކުރިމަތީގައި މުޒާހަރާކޮށްފިއެވެ.
އަންގާރަ ދުވަހުގެ ހަވީރު 16:30ގައި މޯލްޑިވްސް ޔޫތު ފޯސްއިން ވަނީ، ރައީސް ޔާމީން ދިރިއުޅުއްވާ ގެކޮޅު ހ. ދޫވެހި ކުރިމައްޗަށް އެއްވެ މުޒާހަރާ ކޮށްފައެވެ. މޯލްޑިވްސް ޔޫތު ފޯސްގެ އިތުރުން ގިނަ ބައެއްގެ އާންމުންވެސް އެތަަނަށް އެއްވެ ވަނީ މުޒާހަރާއާ ގުޅިފައެވެ.
މި މުޒާހަރާގެ ބައިވެރިން ގޮވާލަމުންދިޔައީ ރައީސް ޔާމީން ހައްޔަރުކޮށް ޖަލަށް ލުމަށެވެ. އަދި އެމަނިކުފާނު އިސްވެހުންނަވައި ރާއްޖޭގެ އެކި ކަންކޮޅުތަކުގައި ހިންގަވަމުންގެންދަވާ އިންޑިއާ އައުޓް ކެންޕެއިނާ ދެކޮޅަށްވެސް މި މުޒާހަރާގައި ވަނީ އަޑުއުފުލާފައެވެ.
މި މުޒާހަރާ ފެށުމާއެކު ރައީސް ޔާމީނަށް ތާއީދުކުރާ ފަރާތްތަކުންވެސް ވަނީ އެ ސަރަހައްދަށް އެއްވެފައެވެ. އަދި ދެބައިމީހުންގެ މެދުގައި ހަމަނުޖެހުންވެސް ހިނގާފައިވާއިރު، ހަމަނުޖެހުން ކޮންޓްރޯލްކުރުމަށް ފުލުހުން ވަނީ އެ ސަރަހައްދުގައި ހަރަކާތްތެރިވެފައެވެ.
