އެމްއެންޑީއެފްގެ ޖުމްލަ 13 ފަޔަރ ސްޓޭޝަނެއް މިހާރު އެބަހުރި
3 މެއި 2022 | އަންގާރަ 02:159 ފަޔަރ ސްޓޭޝަންގައި ވޮލަންޓިއަރ ފަޔަރ ފައިޓަރުން ހަރަކާތްތެރިވޭ
މޭޖަރ އަހުމަދު ފާއިޒް ރަޝާދު
އެމްއެންޑީއެފްގެ ޚިދުމަތް ދެމުންދާ 4 ސަރަހައްދުގެ ރަށްތަކުގައި ޖުމްލަ 13 ފަޔަރ ސްޓޭޝަނެއް މިހާރު އެބަހުރި ކަމަށް އެ ޚިދުމަތުން ބުނެފިއެވެ.
އެމްއެންޑީއެފް ފަޔަރ އެންޑް ރެސްކިއު ޚިދުމަތަށް މިހާރު ވަނީ 32 އަހަރު ފުރިފައެވެ. މި ޚިދުމަތުގެ އަހަރީ ދުވަހުގައި ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަފުޅުދައްކަވަމުން މޭޖަރ އަހުމަދު ފާއިޒް ރަޝާދު ވިދާޅުވީ އެމްއެންޑީއެފްގެ ފަޔަރ އެންޑް ރެސްކިއު ސެކްޝަން ވުޖޫދުވެގެންއައީ ވަރަށް މަދު މީސްކޮޅަކާ އެކުގައި ކަމަށެވެ. ވަރަށް މަދު އާލާތްތަކަކާއެކު ފެށުނު މި ޚިދުމަތް މިހާރު އެމްއެންޑީއެފްގެ ޚިދުމަތްދެމުންދާ ސަރަހައްދުތަކުގައި ގާއިމްކުރެވިފައިވާކަމަށް ފާއިޒް ވިދާޅުވިއެވެ.
އެމްންޑީއެފްގެ ޚިދުމަތްދެމުންދާ 4 ސަރަހައްދުގައި ހިމެނޭ ރަށްތަކުގައި 13 ވަރަކަށް ފަޔަރ ސްޓޭޝަން މިހާރު ގާއިމުކުރެވިފައިވާކަމަށް ފާއިޒް ވިދާޅުވިއެވެ. މީގެ ތެރެއިން 9 ވަރަކަށް ފަޔަރ ސްޓޭޝަންގައި ވޮލަންޓިއަރ ފަޔަރ ފައިޓަރުން މަސައްކަތްކުރަމުންދާކަމަށް އޭނާ ވިދާޅުވިއެވެ. އަދި އެމީހުން މަސައްކަތަށް ނެރުމަށް ދޭންޖެހޭ ތަމްރީނުތައް އެމްއެންޑީއެފުން ދީފައިވާނެކަމަށްވެސް ވިދާޅުވިއެވެ.
ފާއިޒު ވިދާޅުވީ އެމްއެންޑީއެފް ފަޔަރ އެންޑް ރެސްކިއު ޚިދުމަތް ފެށިގެން އައިއިރު މުވައްޒަފުންނަށް ތަމްރީނު ދިނުމުގެ މަސައްކަތް ފެށިގެން އައީ ވަރަށް އާދައިގެ ގޮތަކަށް ކަމަށެވެ. އޭރު ރާއްޖެއިން ބޭރުން ތަމްރީނުތައް ހެދުމުގެ ފުރުސަތު ދެވިފައިނުވާކަމަށާއި، މިހާރު މި ފުރުސަތު ދެވިފައިވާކަމަށް އޭނާ ވިދާޅުވިއެވެ. މިއަދު އިނގިރޭސިވިލާތް، އިންޑިއާ، މެލޭޝިއާ، ޖަޕާނު، ކޮރެއާ ފަދަ ގައުމުތަކުން ތަމްރީނު ހޯދާފައިވާ އޮފިސަރުން އެބަތިބި ކަމަށް އޭނާ ވިދާޅުވިއެވެ.
