ޢީދު ފާހަގަކުރައްވަން ރައީސް މާފުއްޓަށް ވަޑައިގެންފި
ރައީސް މާފުއްޓަށް ވަޑައިގަތީ އެ ރަށު ކައުންސިލުގެ ދައުވަތަކަށް
ރައީސް ކުރިން މާފުއްޓަށް ކުރެއްވި ޒިޔާރަތެއްގެ ތެރެއިން
މިއަހަރުގެ ފިތުރު ޢީދު ދުވަސް ފާހަގަކުރައްވަން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ކ. މާފުއްޓަށް ވަޑައިގެންފިއެވެ.
އެމަނިކުފާނަށް މާފުށިން ވަނީ ހޫނު މަރުހަބާއެއް ދަންނަވާފައެވެ. މިދަތުރުފުޅުގައި ރައީސް އާއެކު ފަސްޓް ލޭޑީ ފަޒްނާ އަހުމަދުވެސް ވަނީ މާފުއްޓަށް ވަޑައިގެންފައެވެ.
ރައީސް މާފުއްޓަށް ވަޑައިގެންނެވީ އެ ރަށު ކައުންސިލުގެ ދައުވަތަކަށެވެ.
މިއަހަރު އެންމެ ކުލަ ގަދަކޮށް ޢީދު ފާހަގަކުރާ އެއް ރަށަކީ މާފުއްޓެވެ. ޢީދު ފާހަގަކުރަން ގިނަ އަދަދެއްގެ މީހުން ވެސް ވަނީ އެ ރަށަށް ގޮސްފައެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ފިތުރު ޢީދާ ދިމާކޮށް މާފުށީގެ ހުރިހާ ގެސްޓުހައުސެއް އެއް ހަފްތާއަށް ވަނީ ފުރިފައެވެ.
ޢީދު ފާހަގަ ކުރަން ގިނަ ހަރަކާތްތަކެއް މާފުށީގައި ކުރިއަށްދާނެއެވެ. މި ހަރަކާތްތައް ފަށާފައިވަނީ ހޯމަ ދުވަހުގެ ހެނދުނު ބޮޑު ޖަމާއަތުގައި ބޭއްވި އީދު ނަމާދާއެކުގައެވެ.
މީގެ އިތުރުން ޢީދު ޝޯއެއްވެސް އެ ރަށުގައި އޮންނާނެއެވެ. މި ޝޯގައި ހަބޭސް ބޮޑު ބެރު ގްރޫޕުގެ ހަރަކާތްތަކާއި ޔާރާ ގްރޫޕުގެ ހަރަކާތްތައް ކުރިއަށްދާނެއެވެ. އެ ޝޯގައި ހަވާ އެރުވުމަށް ވެސް ވަނީ ނިންމާފައެވެ.
