ހައި ސްޕީޑް ފެރީ ނިޒާމުގެ ފުރަތަމަ ފިޔަވަހި ހދ އަތޮޅުގެ ރަށްތަކުގައި ފެށުމަށް ދަތުރުތައް ތާވަލުކޮށްފި
ޒޯން 1 ގެ އަތޮޅުތަކުގެ ތެރެއިން އެންމެ ފުރަތަމަ ޙިދުމަތް ފެށުމަށް ހަމަޖެހިފައިވަނީ ހދ އަތޮޅުގެ ރަށްތަކަށް
ހައި ސްޕީޑް ފެރީ - ހދ އަތޮޅުގެ 13 ރަށް ހިމެނޭހެން 5 ރޫޓުގެ ދަތުރުތައް ފެށިގެން ދާނެ
ހައި ސްޕީޑް ފެރީ ނިޒާމަކުން ރާއްޖެ ގުޅާލުމުގެ ފުރަތަމަ ފިޔަވަހި ހދ އަތޮޅުގެ ރަށްތަކުގައި ފެށުމަށް ތާވަލު ކޮށްފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.
ދިވެހިރާއްޖެ ހައި-ސްޕީޑް ފެރީ ނިޒާމަކުން ގުޅާލުމަށް ފަރުމާކޮށްފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ދަށުން ފޯރުކޮށްދިނުމަށް ހަމަޖެހިފައިވާ ރާއްޖެ ޓްރާންސްޕޯޓް ލިންކް (އާރް.ޓީ.އެލް) ގެ ފަހުގެ މައުލޫމާތުތައް ހިއްސާ ކޮށްފައެވެ.
އެމްޓީސީސީން ބުނީ، އެ މަސައްކަތުގެ ފުރަތަމަ ފިޔަވަހީގެ ޒޯން 1 ގެ އަތޮޅުތަކުގެ ތެރެއިން އެންމެ ފުރަތަމަ ޙިދުމަތް ފެށުމަށް ހަމަޖެހިފައިވަނީ ހދ އަތޮޅުގެ ރަށްތަކަށް ކަމަށެވެ. އެގޮތުން މެއި މަހުގެ 2 ވަނަ ދުވަހުގެ މެންދުރުފަހުން ފެށިގެން ހދ އަތޮޅުގެ 13 ރަށް ހިމެނޭހެން 5 ރޫޓުގެ ދަތުރުތައް ފެށިގެން ދާނެކަމަށް އެ ކުންފުނިން މައުލޫމާތު ދެއެވެ.
ޒޯން 1 ގައި ދެން ހިމެނޭ ރަށްތަކަކީ ހއ އަދި ށ އަތޮޅުގެ ރަށްތަކެވެ.
މި ޙިދުމަތަކީ މުޅިން އަލަށް ފެށޭ ޙިދުމަތަކަށް ވުމާއެކު ރައްޔިތުން އަހުލުވެރިވުމަކީ މުހިއްމު ކަމެއްކަން ފާހަގަކޮށް އެމްޓީސީސީން ބުނީ، ޢީދު ބަންދަށް ދަތުރުތައް ފެށިގެންދިޔުމާ އެކު ރައްޔިތުންނަށް ލުއިފަސޭހަކަން ހޯދައިދިނުމުގެ ގޮތުން މެއި މަހުގެ 2 ވަނަ ދުވަހުން ފެށިގެން 10 މެއިގެ ނިޔަލަށް ހދ އަތޮޅުގައި ކުރެވޭ ދަތުރުތައް ފޯރުކޮށްދޭނީ މުޅިން ހިލޭ ކަމަށެވެ.
އެމްޓީސީސީން މައުލޫމާތު ދޭ ގޮތުގައި މި ޙިދުމަތް ފެށުމަށް ބޭނުންވާ 4 ސްޕީޑް ފެރީވެސް މިހާރު ވަނީ ހދ އަތޮޅަށް ބަނދަރުކުރެވި ދަތުރުތައް ފެށުމަށް ތައްޔާރުކުރެވިފައެވެ.
އެމްޓީސީސީން ވަނީ މި ފެރީތަކުގައި ހުންނާނެ ޚިދުމަތްތަކުގެ ތަފްސީލުތައްވެސް ހިއްސާކޮށްފައެވެ. އެގޮތުން މި ޚިދުމަތުގައި ބޭނުންކުރާ ސްޕީޑް ފެރީތަކަކީ 50 މީހުންގެ ޖާގަ ހިމެނޭ ގޮތަށް ތައްޔާރުކުރެވިފައިވާ ފެރީތަކެކެވެ. އަދި މިހާރު ސްޕީޑް ފެރީތައް ހުންނާނީ ދަތުރުވެރިންނަށް ހިތްފަސޭހަކަމާއިއެކު ދަތުރުކުރެވޭނެގޮތަށް ފަރުމާކުރެވިފައެވެ.
އެއަރކޯން ކުރެވިފައިވާ މި ސްޕީޑް ފެރީތަކުގެ ސީޓާއި ޕަސެންޖަރުންގެ ކެބިން ފަރުމާކުރެވިފައި ހުންނާނީ މިފަދަ ދަތުރުތައް ކުރުމަށް އެންމެ އެކަށޭނެ ގޮތަށެވެ. މިއިން ކޮންމެ ސީޓެއްގައި މޯބައިލް ޗާޖް ކުރެވޭގޮތަށް ޔޫއެސްބީ އައުޓްލެޓެއް ހަރުކުރެވިފައި ހުންނާނެއެވެ.
ފެރީގައި ފާޙާނާއާއި ލަގެޖް ބެހެއްޓޭ ޖާގަ ޚާއްސަ ކުރެވިފައި ހުންނާނެއެވެ. އަދި އާރްޓީއެލް ގެ ޚިދުމަތް ހޯދާ ކޮންމެ ފަރާތަކަށް އެއް ލަގެޖްގެ އިތުރުން ކެރީއޮން ލަގެޖެއް ގެންދެވޭނެއެވެ.
އެމްޓީސީސީން ބުނާ ގޮތުގައި އާރް.ޓީ.އެލްގެ ފެރީތަކުން ހިލޭ ދަތުރުކުރެވޭ މުއްދަތުގެ ތެރޭގައި ފެރީގެ ޖާގަ ހޯދޭނީ ހަމައެކަނި ހދ އަތޮޅުގެ ރަށްރަށުގެ ކައުންސިލް މެދުވެރިކޮށެވެ. އަދި މި މުއްދަތަށް ފަހު 11 މެއި 2022 އިން ފެށިގެން އާރް.ޓީ.އެލްގެ ފެރީ ޚިދުމަތައް ކަނޑައެޅިފައިވާ ރޭޓްތަކުގައި ފައިސާ ނެގެމުން ދާނެކަންވެސް ކުންފުނިން ފާހަގަ ކުރެއެވެ.
އާރް.ޓީ.އެލްގެ ފެރީ ޚިދުމަތައް ފައިސާ ނަގަން ފެށުމާއެކު ކައުންސިލް މެދުވެރިކޮށް ޖާގަ ހޯދުންވެސް ހުއްޓާލެވޭނެކަމަށް ކުންފުނިން ވަނީ ބުނެފައެވެ.
އެމްޓީސީސީން މިހާރު ވަނީ ދަތުރުތަކުގެޝެޑިއުލްވެސްއާންމުކޮށްފައެވެ.
