އަނެއްކާވެސް ކާބުލްގައި ބޮމުގެ ހަމަލާއެއް ދީފި

އަފްޣާނިސްތާންގެ ވެރިރަށް، ކާބުލްގައި އަނެއްކާވެސް ބޮމުގެ ހަމަލާއެއް ދީފިއެވެ.

ހުކުރު ދުވަހު ކާބުލްގެ މިސްކިތެއްގައި ދިން ވަރުގަދަ ބޮމުގެ ހަމަލާއަށް ފަހު ހޮނިހިރު ދުވަހުވެސް އެސިޓީގައި މިވަނީ ބޮމުުގެ އިތުރު ހަމަލާއެއް ދީފައެވެ.

ރޮއިޓަރސްގައި ރިޕޯޓުކޮށްފައިވާގޮތުން ހޮނޮހިރު ދުވަހުގެ ބޮމުގެ ހަމަލާދީފައި ވަނީ އާންމުންނާއެކު ދަތުރުކުރަމުން ދިޔަ ވޭނަކަށެވެ. މި ހަމަލާގައި އަންހެނަކު މަރުވެފައިވާއިރު، އިތުރު ތިން މީހަކަށް އެކިވަރުގެ އަނިޔާތައް ލިބިފައިވާކަމަށް ރިޕޯޓުތައް ބުނެއެވެ.

ހޮނިހިރު ދުވަހުގެ މި ހަމަލާގެ ޒިންމާ އިސްލާމިކް ސްޓޭޓުން ނަގާފައިވާ ކަމަށް ރޮއިޓަރސްއިން ރިޕޯޓުކޮށްފައިވެއެވެ.

މި އަހަރުގެ ރަމަޟާން މަހުގެ އެންމެ ފަހު ހުކުރު ދުވަހުގެ ހުކުރު ނަމާދަށް ޚަލިފާ ޝާހިބް މިސްކިތަށް މީހުން ގޮސްތިބި ވަގުތު އެމިސްކިތުގައި ދިން ބޮމުގެ ހަމަލާގައި 60ށް ވުރެ ގިނަ މީހުން މަރުވެފައިވާކަމަށް ރިޕޯޓުތައް ބުނެއެވެ. އެގޮތުން މިހަމަލާއަކީ ހުކުރު ނަމާދުކޮށް ނިންމުމަށްފަހު ޒިކުރު ކުރަން މިސްކިތުގައި މަޑުކޮށްގެން ތިބި މީހުންގެ ތެރޭގައި ޖާނުން ފިދާވެގެން މީހަކު ދިން ހަމަލާއެއް ކަމަށް ބެލެވޭކަމަށް އެމިސްކިތުގެ އެންމެ އިސްފަރާތާ ހަވާލާދީ ރިޕޯޓުކޮށްފައިވެއެވެ.

އަފްޣާނިސްތާންގެ ސަރުކާރާ މިހާރު ހަވާލުވެފައިވާ ތާލިބާން ޖަމާއަތުގެ ތަރުޖަމާނަކު ވަނީ ހުކުރު ދުވަހުގެ މި ހަމަލާ ކުށްވެރިކޮށް އެކަން ކުރި މީހުން ހޯދާ އަދަބު ދޭނެކަމަށް ބުނެ ބަޔާނެއް ނެރެފައެވެ.

ހުކުރު ދުވަހުގެ މިހަމަލާ ދިން މީހުން އަދި ކަށަވަރުކުރެވިފައި ނުވާއިރު، މިމަހުގެ ތެރޭގައި އަފްޣާނިސްތާންގެ އެކި ހިސާބުތަކުގައި ދިން ބައެއް ހަމަލާތަކުގެ ޒިންމާ އިސްލާމިކް ސްޓޭޓުން ވަނީ ނަގާފައެވެ.

މިރަމަޟާން މަހު އަފްޣާނިސްތާންގެ އެކި ހިސާބުތަކުގައި ވަނީ މިފަދަ އެތައް ހަމަލާތަކެއް ދީފައެވެ. މިހަމަލާތަކުގައި ގިނަ އަދަދެއްގެ ބަޔަކަށް އެކިވަރުގެ އަނިޔާތައް ލިބިފައިވާއިރު، އެތައް ބައެެއްގެ ފުރާނަ ވަނީ ގެއްލިފައެވެ.

އަފްޣާނިސްތާނުގެ އެމަރޖެންސީ ހޮސްޕިޓަލުން ވަނީ މި އޭޕްރިލް މަހު އެކަނިވެސް ކާބުލްގައި ދިން މިފަދަ ހަމަލާތަކުގެ ސަބަބުން 100ށް ވުރެ ގިނަ މީހުންނަށް ފަރުވާދިން ކަމަށް ބުނެފައެވެ.