މިއަހަރުގެ ފުރަތަމަ ކުއާޓަރުގައިވެސް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއަށް ބޮޑު ފައިދާއެއް ލިބިފައިވާކަމަށް އެ ކުންފުނިން ހާމަކޮށްފިއެވެ.

އެމްޓީސީސީން ވަނީ 2022 ވަނަ އަހަރުގެ ފުރަތަމަ ކުއާޓަރުގެ މާލީ ނަތީޖާ އާންމުކޮށްފައެވެ. މިއަހަރުގެ ފުރަތަމަ ކުއާޓަރުގެ މާލީ ނަތީޖާ ދައްކާގޮތުން ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 75.31 މިލިއަން ރުފިޔާ ވަނީ އެކުންފުންޏަށް ލިބިފައެވެ. މިއީ 2021 ވަނަ އަހަރުގެ ފުރަތަމަ ކުއާޓަރުގެ ނަތީޖާއާއި އަޅާބަލާއިރު 3.79 އިންސައްތަ އިތުރު އަދަދެކެވެ.

މިއަހަރުގެ ފުރަތަމަ ކުއާޓަރުގައި އެކުންފުނިން ވަނީ ބޮޑު އަދަދަކުން ވިޔަފާރިކޮށް ބޮޑު ފައިދާއެއް ހޯދާފައެވެ. ފުރަތަމަ ކުއާޓަރުގައި 550.4 މިލިއަން ރުފިޔާގެ ވިޔަފާރިކޮށްގެން 88.62 މިލިއަން ރުފިޔާ ލިބިފައިވާކަމަށް އެމްޓީސީސީން ހާމަކުރެއެވެ. މިދިޔަ އަހަރުގެ ފުރަތަމަ ކުއާޓަރުގައި އެކުންފުނިން ކޮށްފައިވަނީ 423 މިލިއަން ރުފިޔާގެ ވިޔަފާރިއެވެ.

މިއަހަރުގެ ފުރަތަމަ ކުއާޓަރުގައި ހިންގުމުގެ ފައިދާގެ ގޮތުގައި 88.6 މިލިއަން ރުފިޔާ އެކުންފުންޏަށް ލިބިފައިވެއެވެ. ފާއިތު އަހަރުގެ މި މުއްދަތުގައި ހިންގުމުގެ ފައިދާގެ ގޮތުގައި ލިބިފައިވަނީ 82.2 މިލިއަން ރުފިޔާއެވެ. މިއާއެކު މިއަހަރުގެ ފުރަތަމަ ކުއާޓަރުގައި ޓެކުހަށް ކެނޑުމުގެ ކުރިން ލިބުނު ފައިދާގެ ގޮތުގައި 75.31 މިލިއަން ރުފިޔާ ވަނީ ރެކޯޑުކުރެވިފައެވެ. މި ނަތީޖާއާއިއެކު ހިއްސާއަކަށް ޖެހުނު ފައިދާވަނީ 7.96 ރުފިޔާއަށް އަރާފައެވެ. ޓެކުހަށް ކެނޑުމަށްފަހު މި އަދަދު ވަނީ 64 މިލިއަން ރުފިޔާއަށް ދަށްވެފައެވެ. މިދިޔަ އަހަރުގެ ފުރަތަމަ ކުއާޓަރުގައި ޓެކުހަށް ކެނޑުމުގެ ކުރިން ފައިދާގެ ގޮތުގައި 72.55 މިލިއަން ރުފިޔާ ލިބިފައިވެއެވެ.

މިއަހަރުގެ ފުރަތަމަ ކުއާޓަރުގައިވެސް އެމްޓީސީސީން ވަނީ އުމްރާނީ ތަރައްޤީގެ ގިނަ މަޝްރޫއުތަކެއް ކުރިއަށް ގެންގޮސްފައެވެ. އެގޮތުން އެކި މަރުހަލާގައި ޖުމްލަ 108 މަޝްރޫއެއްގެ މަސައްކަތް ކުންފުނިން ދަނީ ކުރަމުންނެވެ. އަދި މި ކުއާޓަރުގެ ތެރޭގައި 8 މަޝްރޫއެއްގެ މަސައްކަތްވަނީ ކާމިޔާބުކަމާއެކު ނިންމާލާފައެވެ. އަދި 14 މަޝްރޫއެއްގެ އަމަލީ މަސައްކަތް މި ކުއާޓަރުގައި ފަށާފައިވާއިރު، އައު 15 މަޝްރޫއެއްގެ މަސައްކަތް ކުންފުންޏާ ވަނީ ހަވާލުކޮށްފައެވެ.

ކުންފުނިން ފޯރުކޮށްދޭ އާންމު ދަތުރުފަތުރުގެ ޚިދުމަތް އިތުރަށް ފުޅާކުރުމުގެ ގޮތުން މާލެއާއި ހުޅުމާލެ ފޭސް 2 އާދެމެދު ސީދާ ބަސް ރޫޓެއް އިތުރުކޮށް، މިކުއާޓަރުގެ ތެރޭގައި ޚިދުމަތްދޭން ފަށާފައިވެއެވެ. ކުންފުނީގެ އާންމު ވިޔަފާރި ދާއިރާއާއި ކުންފުނީގެ އެހެނިހެން ވިޔަފާރި ދާއިރާތަކަށް އަމާޒުކޮށް ތަފާތު އެކި މާކެޓިންގ ހަރަކާތްތަކެއްވެސް މިކުއާޓަރު ތެރޭގައިވަނީ ހިންގާފައެވެ. އަދި ކުންފުނީގެ މަޝްރޫޢުތައް ހިނގަމުންދާ ރަށްރަށަށް ކުންފުނީގެ އިޖުތިމާއީ ޒިންމާގެ ދަށުން ވަނީ އެކި ގޮތްގޮތުން އެހީތެރިކަން ފޯރުކޮށްދީ ގިނަ މަސައްކްތަކެއް ކޮށްދީފައެވެ.

މިއަހަރުގެ ފުރަތަމަ ކުއާޓަރުގައި އެމްޓީސީސީއަށް ބޮޑު ފައިދާއެއް ލިބިފައިވާއިރު، މިދިޔަ އަހަރު ނިމުނުއިރު ކުންފުންޏަށް ވަނީ ކުންފުނީގެ ދިގު ތާރީޚުގައިވެސް ލިބިފައިނުވާވަރުގެ ބޮޑު ފައިދާއެއް ލިބިފައެވެ. މިދިޔަ އަހަރު އެކުންފުންޏަށް ވަނީ 271.82 މިލިއަން ރުފިޔާގެ ފައިދާއެއް ލިބިފައެވެ. އަދި ސާފު ފައިދާގެ ގޮތުގައި 232 މިލިއަން ރުފިޔާ ވަނީ ލިބިފައެވެ.

އެމްޓީސީސީން ބުނީ ކުންފުނީގެ އެކި ވިޔަފާރިތައް އިތުރަށް ފުޅާކޮށް ހަރުދަނާކުރުމަށް އަޅަންޖެހޭ އެންމެހާ ފިޔަވަޅުތަކާއި އިސްތިރާޖީ ޕްލޭންތައް އެކުލަވާލާ، ހާލަތު ބަދަލުވަމުންދާ މިންވަރަށް ރިޢާޔަތްކޮށް މުރާޖާ ކުރަމުންދާކަމަށެވެ. އަދި ވިޔަފާރިތަކަށް ގެންނަންޖެހޭ ބަދަލުތައް ދިރާސާކޮށް، ވިޔަފާރި ކުރިއަރުވާ، ކުންފުނީގެ މަޤުސަދުތައް ހާސިލްކުރުމަށް ފިޔަވަޅުތައް އަޅައި، މިފިޔަވަޅުތަކުގެ ނަތީޖާ ހާސިލްކުރެވިފައިވާކަމުގައިވެސް އެމްޓީސީސީން ބުނެއެވެ. އަދި އީޖާދީ ތަރައްޤީއަށް ހިތްވަރުދިނުމާއި، ޚިދުމަތުގެ ފެންވަރު ރަނގަޅުކޮށް، ކުންފުނީގެ ކަންކަން އިސްލާޙުކުރުމުގައި މެދުނުކެނޑި މަސައްކަތް ކުރާނެކަމުގެ ޔަޤީންކަންވެސް ވަނީ ދީފައެވެ.