ހިޔާ ފްލެޓެއްގައި ޑްރަގް ވިޔަފާރިކުރާ މައްސަލައެއްގައި ހައްޔަރުކުރި 5 މީހުން ބަންދުކޮށްފި
30 އެޕްރީލު 2022 | ހޮނިހިރު 07:47އެ 5 މީހުންގެ ބަންދަށް ބުރާސްފަތި ދުވަހު ވަނީ 15 ދުވަސް ޖަހާފައި
ކްރިމިނަލް ކޯޓް- އެ 5 މީހުންގެ ބަންދަށް ބުރާސްފަތި ދުވަހު ކްރިމިނަލް ކޯޓުން ވަނީ 15 ދުވަސް ޖަހާފައި
ހިޔާ ފްލެޓެއްގެ އެޕާޓްމަންޓެއްގައި ޑްރަގް ވިޔަފާރިކުރާ މައްސަލައެއްގައި 5 މީހަކު ހައްޔަރުކޮށްފިއެވެ.
އެ 5 މީހުންގެ ބަންދަށް ބުރާސްފަތި ދުވަހު ކްރިމިނަލް ކޯޓުން ވަނީ 15 ދުވަސް ޖަހާފައެވެ. އެމީހުންގެ މައްޗަށް ތުހުމަތު ކުރެވޭ މިންވަރަށް ހެކި ހުށައަޅާފައިވާކަމަށް ކޯޓު އަމުރުގައި ބަޔާން ކޮށްފައިވެއެވެ. އޭގެ ތެރޭގައި ހިމެނެނީ 19 އަހަރުގެ މީހަކާއި، 21 އަހަރުގެ މީހަކާއި، 24 އަހަރުގެ ދެ މީހުންގެ އިތުރުން، 26 އަހަރުގެ މީހެކެވެ.
ފުލުހުން އެ އެޕާޓްމަންޓަށް ގޮސް ބެލި ބެލުމުން، ސިޓިންގ ރޫމް ތެރެއިން މަސްތުވާތަކެތިކަމަށް ޝައްކު ކުރެވޭ އެއްޗެހި ހުރި ރަބަރު ޕެކެޓުތަކަކާއި، މަސްތުވާތަކެތި ބަންދުކުރުމަށް ބޭނުންކުރާ އާލަތްތަކެއް ވަނީ ފެނިފައެވެ.
އޭގެ އިތުރުން، އެޕާޓްމަންޓުގެ 2 ކޮޓަރި ބަލައި ފާސްކުރިއިރު، ހާމަކަން ބޮޑު ގޮތެއްގައި ގިނަ އަދަދެއްގެ ފައިސާ ފެނިފައިވާކަން ސީންއަށް ދިޔަ ފުލުހުން ފާހަގަ ކުރެއެވެ. އެގޮތުން 50،300 ރުފިޔާ ފުލުހުން ވަނީ ހޯދާފައެވެ.
އޭގެ ތެރެއިން އެކަކު ވަނީ އެ ފައިސާއަކީ ވަޒީފާ އަދާކުރާ ތަނުން ލިބިފައިވާ ފައިސާކަމަށް ބުނެފައެވެ. އަދި އެކަކު ވަނީ މަސްތުވާތަކެތި ބޭނުން ކުރާކަމަށާއި، ފަރުވާ ބޭނުންވާކަމަށް ބުނެފައެވެ. މި މައްސަލައިގައި ފުލުހުން ހައްޔަރުކުރި މީހުންގެ ތެރޭގައި މަސްތުވާތަކެތީގެ ފަރުވާ ޕްރޮގްރާމް ނިންމާފައި ހުރި މީހެއްވެސް ހިމެނެއެވެ.
ގާޒީ ހަސަން ސައީދު ވަނީ މުޖުތަމައުގެ ސަލާމަތަށް ބަލައި، އެ 5 މީހުންވެސް ބަންދު ކުރެއްވުމަށް އަމުރު ކުރައްވާފައެވެ.
ހިޔާ ފްލެޓުތަކުގައި މަސްތުވާތަކެތި ބޭނުންކުރާ މައްސަލަތައް މީގެ ކުރިންވެސް ފެންމަތިވެފައިވެއެވެ.
