ދ. އަތޮޅު މަދަރުސާގެ ބިދޭސީ ޓީޗަރެއް ބަދުއަހުލާގީ މައްސަލައެއްގައި ހައްޔަރު ކޮށްފި

ދަރިވަރަކާއެކު ބަދުއަހުލާގީ އަމަލެއް ހިންގި ކަމުގެ ތުހުމަތުގައި ދ. މީދޫގައި ހުންނަ ދ. އަތޮޅު މަދަރުސާގެ ބިދޭސީ ޓީޗަރެއް ހައްޔަރު ކޮށްފިއެވެ.

ދ. އަތޮޅު މަދަރުސާގެ މުވައްޒަފަކު "ރާއްޖެއެމްވީ"އަށް މަޢުލޫމާތު ދެމުން ބުނީ، ދަރިވަރަކާއެކު ބަދުއަހުލާގީ އަމަލެއް ހިންގި ކަމުގެ ތުހުމަތުގައި ކޯޓު އަމުރެއްގެ ދަށުން ހައްޔަރުކޮށްފައިވަނީ އިންޑިއާއަށް ނިސްބަތްވާ ޓީޗަރެއް ކަމަށާއި އޭނާ ހައްޔަރު ކޮށްފައިވަނީ ބުދަ ދުވަހު ފުލުހުންނަށް ހުށަހެޅު މައްސަލައަކާ ގުޅިގެން ކަމަށެވެ.

އޭނާ ބުނީ އެ މައްސަލަ ފެންމަތި ވުމުން އެޑިއުކޭޝަން މިނިސްޓްރީއާއި ސްކޫލްގެ އިދާރާއާ ގުޅިގެން އޭނާ މާލެ ފޮނުވާލުމަށް މަސައްކަތް ކޮށްފައިވާ ކަމަށެވެ. އަދި ބުރާސްފަތި ދުވަހު ކޯޓު އަމުރެއްގެ ދަށުން ފުލުހުން އޭނާ ހައްޔަރު ކޮށްފައިވަނީ، އެ ޓީޗަރު އެރަށުން ފުރުމަށް ލޯންޗަކަށް އަރައި އިންދާ ކަމަށެވެ.

މައުލޫމާތު ދިން ފަރާތުންބުނީ އެމައްސަލަ ފެންމަތި ވުމާއެކު އެޓީޗަރު އެހެން ދަރިވަރުންތަކަކާއެކު ބަދުއަހުލާގީ އަމަލު ހިންގާފައިވާ ކަމުގެ ތުހުމަތު ވެސް ކުރެވެމުންދާ ކަމަށެވެ.

އޭނާ ބުނީ އެޑިއުކޭޝަން މިނިސްޓްރީއާއި ސްކޫލްގެ މެނޭޖްމަންޓުން މިމައްސަލަ އޮއްބާލަން މަސައްކަތް ކުރަމުންދާ ކަމަށެވެ. ނަމަވެސް އެ މައްސަލަ ހުށަހެޅި ފަރާތުން ފުލުހުންނަށް ހުށަހެޅީ ދަރިވަރުން އެފަދަ ކަންކަމުން ސަލާމަތް ކުރުމަށާއި ދަރިވަރުންގެ ހައްގުތައް ރައްކާތެރި ކުރުމަށް ކަމަށެވެ.

އޭނާ ބުނީ އެ ބިދޭސީ ޓީޗަރު ހައްޔަރު ކުރުމަށްފަހު، ތިން ދުވަހުގެ ބަންދުގެ މުއްދަތު ކޯޓުން ޖަހާފައިވާ ކަމަށެވެ. އަދި އޭނާ މިވަގުތު ހުރީ ދ. ކުޑަހުވަދޫ ޕޮލިސް ސްޓޭޝަންގެ ބެލުމުގެ ދަށުގައި ކަމަށް ވެސް މައުލޫމާތުދިން ފަރާތުން ބުނެއެވެ.

މިމައްސަލައާ ގުޅިގެން ފުލުހުންގެ މީޑިއާ އޮފިޝަލް ވަނީ، ކުޑަ ކުއްޖަކާމެދު ބަދުއަހުލާގީ އަމަލެއް ހިންގި ކަމުގެ ތުހުމަތުގައި ބިދޭސީ ޓީޗަރެއް ހައްޔަރުކޮށް، ތިންދުވަހުގެ ބަންދުގެ މުއްދަތު ޖަހާފައިވާ ކަން "ރާއްޖެއެމްވީ"އަށް ކަށަވަރު ކޮށްދީފައެވެ.

މިމައްސަލައާ ގުޅިގެން އެޑިއުކޭޝަން މިނިސްޓްރީގެ ބަހެއް ވަނީ ލިބޭގޮތް ނުވެފައެވެ.