އަފްގާނިސްތާންގެ ވެރިރަށް ކާބުލްގެ މިސްކިތަކަށް ދިން ބޮމުގެ ހަމަލާއެއްގައި 50ށްވުރެ ގިނަ މީހުން މަރުވެފައިވާކަމަށް ރިޕޯޓުތައް ބުނެފިއެވެ.
މި ހަމަލާ ދީފައިވަނީ ހުކުރު ދުވަހުގެ ހުކުރު ނަމާދު ވަގުތުގައެވެ. ފަހަކަށް އައިސް މިގޮތަށް ދެމުން އަންނަ ހަމަލާތައް އަމާޒުވަމުން އަންނަނީ އާންމު ރައްޔިތުންނަށް ކަމަށް ހުކުރު ދުވަހުގެ ހަމަލާ އަމާޒުވި މިސްކިތުގެ އިމާމު ވިދާޅުވިއެވެ.
ހުކުރު ދުވަހު ބޮމުގެ ހަމަލާ ދީފައިވަނީ ކާބުލްގެ ހުޅަނގުގައި ހުންނަ ޚަލީފާ ސާހިބު މިސްކިތަށެވެ.
ހަމަލާދިންވަގުތަކީ ހުކުރު ނަމާދަށްފަހު ގިނަ އަދަދެއްގެ އާންމު ރައްޔިތުން ކީރިތި ޤުރުއާން ކިޔެވުމަށާ ޒިކުރު ކުރުމަށް މިސްކިތުގައި މަޑުކޮށްލައިގެން ތިބި ވަގުތެވެ. މި ހަމަލާއަކީ ޖާނުން ފިދާވެގެން ދީފައިވާ ހަމަލާއެއް ކަމަށްވަނީ ބެލެވިފައެވެ.
"ކަޅު ދުން މުޅި ހިސާބަށް ފެތުރިގެން ދިޔައީ. ގަބޫލު ކުރެވޭ ގޮތުގައި މިއީ ޖާނުން ފިދާވެގެން ދީފައިވާ ހަމަލާއެއް. ބޮން ހަރުކޮށްފައި ހުރި މީހާ އާންމު ރައްޔިތުންނާއެކު ޒިކުރު ކުރުމުގައި އިންކަމަށް ބޮޑަން ބެލެވެނީ" މިސްކިތުގެ ހެޑް ފާޒިލް ވިދާޅުވިއެވެ.
ކާބުލްގައި ހުންނަ އިމަރޖެންސީ ހޮސްޕިޓަލާ ހަވާލާދީ ރޮއިޓާރސްގައި ބުނެފައިވަނީ 21 މީހަކަށް ފަރުވާ ދެމުން އަންނަ ކަމަށާއި، ހޮސްޕިޓަލަށް ގެނައި އިރުވެސް ދެ މީހުން މަރުވެފައިވާ ކަމަށެވެ. އަދި ހޮސްޕިޓަލަށް ގެންދިޔަ ގިނަ މީހުންގެ ހާލު ވަރަށް ދެރަ ކަމަށެވެ.
މިހަމަލާއާ ގުޅިގެން ތާލިބާންގެ ތަރުޖަމާނު ޒަބިހުއްލާ މުޖާހިދު ވިދާޅުވީ، އެ ހަމަލާ ކުށްވެރިކުރާކަމަށާއި، މިކަމުގެ ފަހަތުގައި ތިބި މީހުން ހޯދައި އަދަބު ދެއްވާނެކަމަށެވެ.
އަފްގާނިސްތާންގެ މިސްކިތަށް ދިން ބޮމުގެ ހަމަލާގެ ޒިންމާ އަދި އެއްވެސް ފަރާތަކުން އުފުލާފައެއް ނުވެއެވެ. އަދި މިކަމުގެ ފަހަތުގައި ތިބީ ކޮންބައެއް ކަން އަދި ހާމަވެފައެއް ނުވައެވެ.
މި ރަމަޟާން މަހު ދިން ބައެއް ހަމަލާތަކުގެ ޒިންމާ އައިއެސް ޖަމާއަތުން ވަނީ އުފުލާފައެވެ.
