މުސާރަ ބޮޑުކޮށް، ދެއަހަރަށް ކޮންޓްރެކްޓް އައުކުރަން ލެވަންޑޯސްކީ ޑިމާންޑްކޮށްފި!
28 އެޕްރީލު 2022 | ބުރާސްފަތި 16:52ބަޔާންއާއެކު ލެވަންޑޮސްކީ ހަދާފައިވާ އެއްބަސްވުމުގެ މުއްދަތު ހަމަވާނީ މިއަންނަ އަހަރު
ބަޔާން މިއުނިކްގެ ތަޖުރިބާކާރު ފޯވާރޑް ރޮބަޓް ލެވަންޑޯސްކީ
މުސާރަ ބޮޑުކޮށް، އިތުރު ދެއަހަރުގެ މުއްދަތަކަށް ކޮންޓްރެކްޓް އައުކުރުމަށް ބަޔާންގެ ފޯވާޑް ރޮބަޓް ލެވަންޑޯސްކީ ޑިމާންޑްކޮށްފިއެވެ.
ބަޔާންއާއެކު ލެވަންޑޯސްކީ ހަދާފައިވާ އެއްބަސްވުމުގެ މުއްދަތު ހަމަވާނީ މިއަންނަ އަހަރުއެވެ. އެހެންކަމުން އޭނާ ހޯދުމަށްޓަކައި ގިނަ ކްލަބުތަކަކުން މަސައްކަތްކުރަމުން އެބަދެއެވެ. މީގެ ތެރޭގައި މާލީ ދަތިކަން އިންތިހާއަށް އޮތް ސްޕެއިންގެ ބާސެލޯނާވެސް ހިމެނެއެވެ. ނަމަވެސް ލެވަންޑޯސްކީ ވަނީ އޭނާގެ ކޮންޓްރެކްޓް އައުކުރުމަށް ދެޝަރުތަކާއެކު ބަޔާންއަށް ހުށަހަޅާފައެވެ.
މުސާރަ ބޮޑުކުރުމަށް ލެވަންޑޯސްކީ ހުށަހަޅާފައި ވާއިރު، އޭނާއަކީ މިހާރުވެސް ބަޔާންއިން އެންމެ ބޮޑު މުސާރަދޭ ކުޅުންތެރިޔާއެވެ. އެހެންކަމުން އޭނާގެ މުސާރަ އިތުރަށް ބޮޑުކުރަން ނިންމައިފިނަމަ މީގެ އަސަރު އެހެން ކުޅުންތެރިންގެ މުސާރައަށްވެސް އަންނާނެއެވެ.
ޓީމުން ހިފަހައްޓަމުން އަންނަ އުސޫލުތަކުގެ ތެރޭގައި 30 އަހަރުން މަތީގެ ކުޅުންތެރިންނަށް ދެނީ އިތުރު އެއްއަހަރުގެ މުއްދަތެކެވެ. ޓީމުގެ ތަޖުރިބާކާރު ގޯލް ކީޕަރު މެނުއެލް ނޯޔާއާއި ތޯމަސް މުލާއަށްވެސް ކަންއޮތީ މިހެންނެވެ. ނަމަވެސް 33 އަހަރުގެ ލެވަންޑޯސްކީގެ ފަރާތުން ފެންނަ ތަފާތު ކުޅުމާއި، ޓީމަށް އޭނާގެ މުހިންމުކަން ބޮޑުވުމުން، މި އުސޫލުން ބޭރުން ދެއަހަރުގެ ކޮންޓްރެކްޓެއްް އޭނާއަށް ދިނުން އެކަށީގެންވާކަމަށް ރިޕޯޓުތައް ބުނެއެވެ.
