ރެއާލް މެޑްރިޑަށް ކުޅެމުން އަންނަ ސްޕެއިންގެ ފޯވާޑް އަލްވަރާ މޮރާޓާ ހޯދުމަށް މެންޗެސްޓާ ހޔުނައިޓެޑޫން ކުރި ބިޑް އެޓީމުން 60 މިލިއަން ޕައުންޑަށް އިތުރުކޮށްފިކަމަށް ރިޕޯޓްތައް ބުނެފި އެވެ.

ދަ ގާޑިއަން އިން ބުނީ ޔުނައިޓެޑުން އަންނަނީ މޮރާޓާ ހޯދުމަށް މަސައްކަތްކުރަމުން ކަމަށާއި، އެގޮތުން އެ ކްލަބުން ފުރަތަމަ އޭނާ ހޯދުމަށް ހުށަހެޅި 52 މިލިއަން ޕައުންޑު ކަމަށެވެ. އެހެންނަމަވެސް މިހާރު އެ އަގު 60 މިލިއަން ޕައުންޑަށް އިތުރުކޮށްފައިވާ ކަމަށެވެ.

މޮރާޓާ ހޯދުމަށް ނަން މަޝްހޫރު ކްލަބްތަކުން މަސައްކަތްކުރާއިރު، ރެއާލްގެ ފުރަތަމަ އެގާރައިން ޖާގަ ލިބުން ދަތިވާތީ އޭނާ ރެއާލް ދޫކޮށްލާނެ ކަމަށް ބެލެވެއެވެ.

ރެއާލް މެޑްރިޑް ޔޫތް ޓީމުން ކެރިޔަރު ފެށި މޮރާޓާ އެ ކްލަބްގެ ސީނިއާ ޓީމަށް ކުޅެން ފެށީ 2010 ވަނަ އަހަރެވެ. އެގޮތުން އޭނާ ވަނީ އެ ކްލަބުގައި ހަތަރު ސީޒަން ހޭދަކޮށް ކުޅުނު 52 މެޗުގައި 11 ލަނޑު ކާމިޔާބުކޮށްފައެވެ.

ރެއާލް ދޫކޮށްލުމަށްފަހު މޮރާޓާ ޔުވަންޓަސް އަށް 2014 ވަނަ އަހަރު ބަދަލުވެފައިވާއިރު، އެ ކްލަބުގައި ދެ ސީޒަން ވަނީ ހޭދަކޮށްފައެވެ. އެގޮތުން އޭނާ ވަނީ އެޓީމަށް ކުޅުނު 94 މެޗުގައި 31 ލަނޑު ކާމިޔާބުކޮށް، އެޓީމާއެކު އިޓާލިއަން ލީގު ދެފަހަރު، އިޓާލިއަން ކަޕް ދެފަހަރު ކާމިޔާބުކޮށްފައެވެ. މީގެއިތުރުން އޭނާ ވަނީ އިޓާލިއަން ސުޕާކަޕްގެ ދެވަނަ އަދި ޔުއެފާ ޗެމްޕިއަންސް ލިގުގެ ދެވަނަ ވެސް ޔުވަންޓަސްއާއެކު ކާމިޔާބުކޮށްފައެވެ.

ޔުވަންޓަސް ދޫކޮށްލުމަށްފަހު މޮރާޓާ ރެއާލް އަށް ބަދަލުވީ މި ސީޒަނުގައެވެ. އެގޮތުން އޭނާ ވަނީ މިވީތަނަށް މި ސީޒަނުގައި އެޓީމަށް ކުޅުނު 42 މެޗުގައި 20 ލަނޑު ކާމިޔާބުކޮށްފައެވެ.