ރިސޯޓުތައް ހިއްކާއިރު އެތަންތަން ފެހި ކުރުމުގެ ދުރު ރާސްތާ ޕްލޭނެއް އޮންނަންވާނެ: ނައީމް

ރިސޯޓުތައް ހިއްކާއިރު އެތަންތަން ފެހި ކުރުމުގެ ދުރު ރާސްތާ ޕްލޭނެއް އޮންނަންވާނެ ކަމަށް އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ) ގެ ޑިރެކްޓަރ ޖެނެރަލް މުހައްމަދު ނައީމް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ނައީމް ވިދާޅުވީ މީހުން ދިރިއުޅޭ ރަށްރަށުގައި ހޭޅިފަށުގައްޔާއި އެތަން މިތާނގައި ހެދިފައި ހުންނަ ރުއްތައް މީހުންގެ ރުއްތަކާއި ބަންޑާރަ ރުއްތައް ނަގައިގެން މަގު ހެދުމުގެ ނަމުގައި އަދި ކޮންމެހެން ބޭނުމެއް ނެތަސް ބައެއް ފަހަރު ކައުންސިލްތަކުން ރުއްގަސްތައް ނަގައިގެން ވިއްކާ ކަމަށެވެ.

ބޭނުމެއް އޮވެގެން ނަގާ ރުއްގަސްތަކާއި ބޭނުމެއް ނެތިގެން ސީދާ ރިސޯޓުތަކަށް ގެންދިޔުމުގެ ބޭނުމުގައި ނަގާ ރުއްގަސްތައް ވެސް ހިމެނޭ ކަމަށާއި މިކަމަށް ހައްލު އެބައޮތް ކަމަށާއި ނަމަވެސް އެ ހައްލާ ދިމާލަށް އަދި މަސައްކަތް ނުކުރެވޭ ކަމަށް ނައީމް ވިދާޅުވިއެވެ.

ފަޅު ހިއްކައިގެން ހަދާ ރިސޯޓްތައް ފެހި ކުރުމަށް ރުއްގަސް ނަގާ މައްސަލަ ބޮޑުވެފައިވާއިރު ތިމާވެއްޓަށް ބެލުމެއްނެތި އެތައް ސަތޭކަ ރުކެއް އެތައް ރަށަކުން ނަގައިގެން ގެންދިޔަ މައްސަލައެއް ވެސް މީގެ ކުރިން ވަނީ ފެންމަތިވެފައެވެ.

ކުރީގެ ގަވައިދު ބުނާގޮތުން 10 ރުކަށްވުރެ ގިނައިން ނަގާނަމަ އީއައިއޭ ހަދަން ޖެހެ އެވެ. ނަމަވެސް 2017 ގައި އެ ގަވައިދަށް ގެނައި އިސްލާހުގައި ބުނަނީ 200 ރުއް ނުވަތަ 8،250 އަކަމީޓަރަށް ވުރެ ބޮޑު ސަރަހައްދެއް ސާފު ކުރާނަމަ އީއައިއޭ ހަދަން ނުޖެހޭނެކަމަށެވެ.

ރުއްގަސް އުފުރުމާއި ބެހޭ ޤަވާއިދެއް މިހާރުވެސް އެބައޮތްކަން ފާހަގަކުރައްވާ ނައީމް ވިދާޅުވީ އެއްވެސް ބޭނުމެއް ނެތި ރިސޯޓުތަކަށް ރުއްގަސް ގެންދާކަން ފާހަގަކުރެވިފައިވާ ކަމަށެވެ. ނައީމް ވިދާޅުވީ ރުއްގަހާއި ބެހޭގޮތުން އަލަށް ހަދާ ޤަވާއިދުގައި ވަރަށް ގިނަކަންތައް ބަލަން ހުންނާނެ ކަމަށެވެ. މިހާރު ޤަވާއިދު އޮތީ އެންމެ ފަހުގެ ޑްރާފްޓް ސްޓޭޖްގައި ކަމަށް ވެސް ނައީމް ވިދާޅުވިއެވެ.

މަގޫ ހިރުންދު ދިއްގާ ފަދަ ގަސްތައް ހައްދައިގެން ބައެއް މީހުން ބޮޑެތި ކުރާ ކަމަށާއި އެކަން ކުރަނީ ސީދާ ގަސްތައް ބޭރު ކުރުމުގެ ނިޔަތުގައި ކަމަށް ވެސް ނައީމް ވިދާޅުވިއެވެ. އެކަން ބައެއް މީހުން ފަށައިގެން އުޅޭއިރު ޑިމާންޑާއި އެއްވަރަށް ސަޕްލައި ނުކުރެވޭ ކަމަށް ވެސް ވަނީ ބުނެފައެވެ.

އީއައިއޭ ހަދަން ޖެހޭ ވަރަށް ގިނަ ޕްރޮޖެކްޓްތަކުގައި އެ މަސައްކަތްތައް ކުރިއަށްދާ ކަމަށާއި އެންމެ ފަހުގެ ތިން އަހަރު ވަރަށް ގިނަ އީއައިއޭ ދޫކުރެވިފައިވާ ކަމަށް ވެސް ނައީމް ވިދާޅުވިއެވެ.