ޖޭއެސްސީއަށް ފަނޑިޔާރު ނިޔާޒު އައްޔަންކުރައްވައިފި
ނިޔާޒް އައްޔަންކުރައްވާފައިވަނީ އެމަގާމުގައި ކުރިން ހުންނެވިފަނޑިޔާރު އަލީ ސަމީރު އިސްތިއުފާ ދެއްވުމުން
ފަނޑިޔާރު މުހައްމަދު ނިޔާޒް
ޖުޑީޝަލް ސަރވިސް ކޮމިޝަންއަށް، ހައި ކޯޓުގެ ފަނޑިޔާރު މުހައްމަދު ނިޔާޒް އައްޔަންކުރައްވައިފިއެވެ.
ޖުޑީޝަލް ސަރވިސް ކޮމިޝަންއަށް، ފަނޑިޔާރު މުހައްމަދު ނިޔާޒް އައްޔަންކުރައްވާފައިވަނީ އެމަގާމުގައި ކުރިން ހުންނެވި ހައިކޯޓުގެ ފަނޑިޔާރު އަލީ ސަމީރު މަގާމުން އިސްތިއުފާ ދެއްވުމާއި ގުޅިގެންނެވެ.
ގާނޫނު އަސާސީގެ 158 ވަނަ މާއްދާގެ (ނ) ގައިވާ ގޮތުގެ މަތިން ޖުޑީޝަލް ސަރވިސް ކޮމިޝަންއަށް، ފަނޑިޔާރު މުހައްމަދު ނިޔާޒް އިންތިޚާބު ކުރައްވާފައިވަނީ ހައިކޯޓުގެ ފަނޑިޔާރުންގެ އިއްތިފާގުންނެވެ.
ފަނޑިޔާރު ނިޔާޒު ހައި ކޯޓުގެ ފަނޑިޔާރުކަމަށް އައްޔަންކުރައްވާފައިވަނީ 2019 ވަނަ އަހަރުއެވެ.
އެމަގާމުގައި ކުރިން ހުންނެވި ހައިކޯޓުގެ ފަނޑިޔާރު ޢަލީ ސަމީރު އޭޕްރީލް 17 ވަނަ ދުވަހުން ފެށިގެން ފަނޑިޔާރުކަމުގެ މަގާމުން އިސްތިއުފާ ދެއްވާފައިވާ ކަމަށް ޖޭއެސްސީން ވަނީ ބުނެފައެވެ. ފަނޑިޔާރުކަމުގެ މަގާމުން އިސްތިއުފާ ދެއްވުމާއި ގުޅިގެން އަލީ ސަމީރު ވަނީ ޖުޑީޝަލް ސަރވިސް ކޮމިޝަންގެ މެންބަރުކަމުގެ މަގާމުން ވެސް ވަކިވެފައެވެ.
ޢަލީ ސަމީރު ވަނީ 15 އަހަރަށްވުރެ ދިގު މުއްދަތެއްގައި ފަނޑިޔާރުކަމުގެ މަގާމުގައި ޚިދުމަތް ކުރައްވާފައެވެ.
