ފުލުހުން ފޮޓޯ ޑިލީޓް ކުރީ ޖޭއެސްސީގެ ރައީސް ހުސްނީ މުބާރަކަށް ބޮޑުބޭބެ ކިޔާ މީހެއްގެ ކަން ހާމަވެއްޖެ އެވެ.

މަސްތުވާތަކެއްޗާއި އެކު ހައްޔަރުކުރި ޒުވާނެއްގެ ފޮޓޯ އާންމު ކުރުމަށް ފަހު ސުވާލު އުފެދޭ ގޮތަކަށް އޭނާގެ ފޮޓޯ އާއި މައުލޫމާތު ފުލުހުން ވަނީ ސޯޝަލް މީޑި އާއި ވެބްސައިޓުން ނަގާފަ އެވެ. އެކަމާއި މެދު އާއްމުންނާއި މީޑިއާއިން ސުވާލުކުރަމުން ދަނިކޮށް ފުލުހުން ބުނެފައި ވަނީ އެ ފޮޓޯ ނެގީ ތަހުގީގު ބޭނުމަށް ކަމަށެވެ.

ހައްޔަރު ކުރީ ނ. މަނަދޫ / ރޯޝަނީގެ، ޙަސަން ނާހިލް (18އ) އެވެ. އޭނާ ހައްޔަރުކޮށްފައި ވަނީ މި މަހުގެ 22 ވަނަ ދުވަހު ހުޅުމާލެތެރެ ޕެޓްރޯލް ކުރުމުގެ ތެރެއިންނެވެ. ފުލުހުން ބުނިގޮތުގައި އޭނާ ހައްޔަ ކުރީ، އޭނާގެ ޢަމަލުތައް ހުރިގޮތުން އޭނާ ބަލައި ފާސް ކުރި އިރު މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި ފިލްމު ހުސްކުރި ދަޅެއް ފެނުމުންނެވެ. އޭނާގެ އަތުން ފެނުނު މަސްތުވާ ތަކެތީގެ ބަރުދަނުގައި 31.23 ގްރާމު ހުރިކަމަށް ފުލުހުން ބުނެ އެވެ.

ފުލުހުން މިފަދައިން ބުނެފައިވާ އިރު، "މަސްތުވާތަކެއްޗާ އެކު ހުޅުމާލެ އިން މީހަކު ހައްޔަ ރުކޮށްފި" މި ސުރުހީގެ ދަށުން ފުލުހުންގެ ވެބްސައިޓް "ޕޮލިސް ލައިފް" ގައި ލިޔެފައިވާ ހަބަރު ފޮޓޯއާއެކު ސޯޝަލް މީޑިއާގައި ފޮޓޯ އާއްމު ކޮށްފައި ވަނީ އާދީއްތަ ދުވަހު މެންދުރުކުރީގަ އެވެ.

އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން 30 ދުވަހުގެ ބަންދުގެ މުއްދަތެއް ވަނީ ޖަހާފަ އެވެ.

ޕޯސްޓްތައް ފުލުހުން ޑިލީޓް ކުރި މައްސަލައިގައި ފުލުހުން ބުނީ އެކަން ކުރީ ތަހުގީގު ބޭނުމަށް ކަމަށެވެ. އަދި އެކަމާއި ގުޅޭ އިތުރު ތަފްސީލެއް ފުލުހުން ދީފަ އެއް ނުވެ އެވެ. އޭނާ ހައްޔަރު ކުރި މައްސަލަ އާއި އަތުލައިގަތް މަސްތުވާތަކެއްޗާއި އަދި ގުޅުންހުރި މައުލޫމާތު ވެސް ފުލުހުން ހާމަކޮށްފަ އެއް ނުވެ އެވެ.

ފުލުހުންގެ ޕޯސްޓްތައް ޑިލީޓް ކޮށްފައިވާ އިރު، ކްރިމިނަލް ކޯޓުގެ ވެބްސައިޓުގައި ވެސް އޭނާގެ ބަންދުގެ މުއްދަތު ޖަހާފައިވާ ބަންދު އަމުރު ފެންނަން ނެތްކަން ފާހަގަކޮށްލެވެ އެވެ. އޭނާ ހައްޔަރު ކުރީ 22 ވަނަ ދުވަހުގައި ކަމަށް ފުލުހުން ބުނެފައިވާ އިރު، އެ ދުވަހުވެސް އަދި 23 ވަނަ ދުވަހު ވެސް ކްރިމިނަލް ކޯޓުގެ ބަންދު އަމުރުތަކުގައި އޭނާގެ އަމުރު ފެންނަން ނެތެވެ.