ފާއިތުވި ހަފްތާގައި މާލެ ސަރަހައްދުން ކޮވިޑަށް ޕޮޒިޓިވްވީ 37 މީހުން، ޕޮޒިޓިވް ކޭސްއެއް ނުފެންނަ އެއްދުވަސް

ފާއިތުވި ހަފްތާތެރޭގައި މާލެ ސަރަހައްދުން ކޮވިޑް-19އަށް ޕޮޒިޓިވްވެފައިވަނީ 37 މީހުންކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.

އޭޕްރީލް 17ން 25ށް ރާއްޖޭގެ ކޮވިޑް-19ގެ ތަފާސްހިސާބުތައް އެޗްޕީއޭއިން ހާމަކޮށްފައިވާއިރު މިމުއްދަތުގައި އަތޮޅުތަކުން 205 މީހުން ވަނީ ޕޮޒިޓިވްވެފައެވެ. އަދި އެހެނިހެން ހިސާބުތަކުން 46 މީހުން ޕޮޒިޓިވްވެފައިވެއެވެ. މިއާއެކު ފާއިތުވި ހަފްތާ މުޅި ރާއްޖެއިން ކޮވިޑްއަށް ޕޮޒިޓިވްވެފައިވަނީ 288 މީހުންނެވެ.

އެޗްޕީއޭގެ ތަފާސްހިސާބުތައް ދައްކާގޮތުން އޭޕްރީލް މަހުގެ 23 ވަނަ ދުވަހު މާލެ ސަރަހައްދުން އެއްވެސް ކޭސްއެއް ރިކޯޑް ކުރެވިފައެއްނުވެއެވެ. ފާއިތުވި ހަފްތާ މާލެ ސަރަހައްދުން އެންމެ ގިނައިން ކޮވިޑް ޖެހިގެން ރިޕޯޓްކޮށްފައިވަނީ 19 ވަނަ ދުވަހުއެވެ. އެއީ 12 މީހުންނެވެ. އޭގެކުރިން އޭޕްރީލް 17 އަދި 18 ވަނަ ދުވަހު ޕޮޒިޓިވްވެފައިވަނީ މިއިން ކޮންމެ ދުވަހަކު 7 މީހުންނެވެ.

އަތޮޅުތަކަށް ބަލާއިރު އެންމެ ގިނަ މީހުން ކޮވިޑަށް ޕޮޒިޓިވްވެގެން ރިޕޯޓްކޮށްފައިވަނީ އޭޕްރީލް 19ގައެވެ. އެއީ 68 މީހުންނެވެ. އެންމެ މަދުން މީހުންނަށް ކޮވިޑް ޖެހިގެން ރިޕޯޓްކޮށްފައިވަނީ އޭޕްރީލް މަހުގެ 22 ވަނަ ދުވަހުއެވެ. އެއީ 12 މީހުންނެވެ.

މިއާއެކު ރާއްޖެއިން ކޮވިޑަށް ޕޮޒިޓިވްވީ މީހުންގެ ޖުމްލަ އަދަދު ވަނީ 179،171ށް އަރާފައެވެ. އަދި 298 މީހުން ވަނީ ނިޔާވެފައެވެ.

ވެކްސިންގެ ތަފާސްހިސާބުތަކަށް ބަލާލާއިރު ފުރަތަމަ ޑޯޒް ޖެހި މީހުންގެ އަދަދު ވަނީ 398،579ށް އަރާފައެވެ. ދެޑޯޒް 383،925 މީހުން ޖަހާފައިވާއިރު ބޫސްޓަރ ޑޯޒް ޖެހި މީހުންގެ އަދަދު ވަނީ 158،566ށް އަރާފައެވެ.