ޒިޔަދަމްގެ މަރު: ޚުލާސާ ބަޔާން އިއްވުން ކުރިއަށް
25 އެޕްރީލު 2022 | ހޯމަ 10:02ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ ވަނީ ކޮށްފައި
މި މައްސަލާގައި ދައުލަތުން ދައުވާ އުފުލާފައިވަނީ ހީނާވިލާ، މުހައްމަދު ޝަނޫނާއި، ބީޗްވިލާ އަލީ ސިފާމްގެ މައްޗަށް | ރާއްޖެއެމްވީ
ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލައިގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ތޫނު އެއްޗަކުން ހަމަލާދީ ޒިޔަދަމް މަރާލާފައިވަނީ 2015 ވަނަ އަހަރުގެ މާރޗު މަހުގެ 20 ވަނަ ދުވަހުގެ ރޭ 10:30ހާއިރުއެވެ. މި މައްސަލާގައި ދައުލަތުން ދައުވާ އުފުލާފައިވަނީ އެރަށު ހީނާވިލާ، މުހައްމަދު ޝަނޫނާއި، ބީޗްވިލާ އަލީ ސިފާމްގެ މައްޗަށެވެ.
މި ދެ މީހުންގެ މައްޗަށްވެސް ދައުލަތުން އުފުލާފައިވާ ދައުވާއަކީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ. އެ ދެ މީހުންގެ މައްޗަށް އުފުލާފައިވާ ދައުވާގައި ބުނެފައިވަނީ, 2015 ވަނަ އަހަރުގެ މާޗް 20 ވަނަ ދުވަހުގެ ރޭ 10:30ހާއިރު އެރަށު ވަގުތީހިޔާ ކައިރިން ޒިޔަދަމް ހިނގާފައި ދަނިކޮށް, ޝަނޫނާއި ސިފާމް, އޭނާގެ ފަލަމަސްގަނޑަށް 8 އިންޗި ހުންނަވަރުގެ ވަޅިއެއް ހަރާލާފައިވާ ކަމަށެވެ.
އަދި އެ ހަމަލާއިން ސަލާމަތްވުމަށް ޒިޔަދަމް ދުވެފައި ދަނިކޮށް އެ ދެ މީހުން އޭނާގެ ފަހަތުން ގޮސް އަނެއްކާވެސް ވަޅިން ހަމަލާދީ އޭނާ މަރާލާފައިވާކަމަށް ދައުލަތުން އުފުލި ދަައުވާގައި ބުނެފައިވެއެވެ.
ޒިޔަދަމް މަރާލުމުގެ ދައުވާގެ އިތުރުން، އިތުރު ދެ ދައުވާއެއް އޭރު ޝަނޫންގެ މައްޗަށް އުފުލާފައިވެއެވެ.
ކްރިމިނަލް ކޯޓުގައި މި މައްސަލަ މިހާރު ބައްލަވަނީ ގާޒީ އިސްމާއިލް ޝަފީއުއެވެ.
ހޯމަ ދުވަހުގެ އަޑުއެހުމުގައި ތާވަލު ކުރެވިފައި އޮތީ ހެއްކާ ގުޅޭގޮތުން ވާހަކަ ދެއްކުމާއި، ޚުލާސާ ބަޔާން އިއްވުމެވެ. އެގޮތުން ފުރަތަމަ ދައުލަތަށް ވަނީ ފުރުސަތު ދެއްވާފައެވެ.
ދައުލަތުގެ ވަކީލު އެންމެ ފުރަތަމަ ވަނީ ޝަނޫންގެ މައްޗަށް ކޮށްފައިވާ ދެ ދައުވާއާ ގުޅޭ ޚުލާސާ ރިޕޯޓު އިއްވަވާފައެވެ. އެގޮތުން މާރާމާރީ ހިންގުމުގެ ދައުވާ އުފުލާފައިވަނީ, ބަޔަކު ޒިޔަދަމްގެ ހަށިގަނޑު ހޮސްޕިޓަލަށް ގެންދަނިކޮށް އޭގެތެރެއިން މީހަކަށް ޝަނޫން ހަމަލާދިން ކަމަށް ބުނެއެވެ. މި މައްސަލައާ ގުޅޭގޮތުން ހެކިބަސް ދީފައިވާ ސިއްރު ހެކިވެރިން ވަނީ އެ މަންޒަރު ފެނުނުކަމަށް ބުނެ ހެކިބަސް ދީފައެވެ.
ބިރުދެއްކުމުގެ ދައުވާ އޭނާގެ މައްޗަށް ކުރަނީ, ޒިޔަދަމް މަރާލި ފަހުން ހޮސްޕިޓަލް ކައިރީގައި ހުރި މީހަކަށް ބިރު ދެއްކިކަމަށް ބުނެއެވެ. އެގޮތުން އެމީހާއަށް އިންޒާރުދީ، ބިރު ދައްކާފައިވާކަމަށް ސާބިތުކޮށްދިނުމަށް 7 ސިއްރު ހެއްކެއްވެސް ދައުލަތުން އޭރު ހުށައެޅިއެވެ. އޭގެ ތެރެއިން ބައެއް ސިއްރު ހެކިން ވަނީ ޝަނޫން އިންޒާރު ދީފައިވަނީ ޒިޔަދަމްގެ ބައްޕައަށް ކަމަށް ބުނެފައެވެ. އެގޮތުން "ލޮލަށް ވަޅި ޖަހާނެ" ކަމަށް ބުނެ އިންޒާރު ދީފައިވާކަމަށް ބައެއް ސިއްރު ހެކިން ބުނެއެވެ.
އެއަށްފަހު ދައުލަތުން ވަނީ ޝަނޫންއާއި ސިފާމްގެ މައްޗަށް ކުރާ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއާ ގުޅިގެންވެސް ހެއްކާއި ގުޅޭގޮތުންނާއި ޚުލާސާ ގޮތުން ވާހަކަ ދައްކަވާފައެވެ.
ދައުލަތުން ބުނާ ގޮތުގައި ޒިޔަދަމްގެ ހަށިގަނޑުން ގިނަ އަދަދެއްގެ ލޭ ބޭރުވެފައިވެއެވެ. އެމީހުންގެ ތެރޭގައި ހިންގި މާރާމާރީގައި ފުރަތަމަ ޝަނޫން ވަޅި ހަރާފައިވަނީ ޒިޔަދަމްގެ ފައިގެ ފަލަމަސްގަނޑަށް ކަމަށް ދައުލަތުން ހުށައެޅި ހެކިތަކާއި ޙަވާލާދީ ޚުލާސާ ރިޕޯޓުގައި ފާހަގަކުރިއެވެ. އަދި އެހިސާބުން ޒިޔަދަމް ދުވެފައި ގޮސް ގެއަކަށް ވަނުމުން، އޭނާގެ ފަހަތުން ގޮސް، އޭނާއަށް ޙަމަލާދީ މަރާލީކަމަށް ދައުލަތުން ބުނެއެވެ.
ޝަނޫންގެ މައްޗަށް މި ދައުވާއާ ގުޅިގެން 9 ސިއްރު ހެއްކާކާއި، 10 ސީން އޮފް ކްރައިމް ރިޕޯޓުގެ އިތުރުންވެސް އިތުރު ކިތާބީ އަދި ޝަފަހީ ހެއްކެއް ވަނީ ހުށައަޅާފައެވެ. އޭގެ ތެރެއިން ބައެއް ސިއްރު ހެކިވެރިން ހާޒިރު ކުރެވިފައެއް ނުވެއެވެ.
ދައުލަތުން ޝަނޫންގެ މައްޗަށް ކުރާ ދައުވާތަކާއި ސިފާމްގެ މައްޗަށް ކުރާ ދައުވާއާއި ގުޅިގެން ޚުލާސާ ގޮތެއްގައި ވާހަކަ ދައްކަވާފައިވާއިރު، ޝަރީއަތުގެ ވަގުތު ހަމަވިއިރުވެސް ދައުލަތުގެ ޚުލާސާ މުޅިން ނުނިމެއެވެ. ވުމާއެކު، މައްސަލަ ބައްލަވާ ގާޒީ އިސްމާއިލް ޝަފީއު ވަނީ ދެން އޮންނަ އަޑުއެހުމެއްގައި ދައުލަތުން ހުށައަޅާފައިވާ ޤާނޫނީ ނުކުތާތަކާއި، ދިފާއުގެ ޚުލާސާގެ ބައި ކުރިއަށް ގެންދެވުމަށް ނިންމަވާފައެވެ.
ދެން މި މައްސަލައިގެ އަޑުއެހުމެއް އޮންނާނީ އީދު ބަންދަށް ފަހު ފެށޭ ހަފްތާގައެވެ.
