ސޮކަމޭޓްސް ވެޓަރެންސް ލީގުގެ ފައިނަލަށް

މައިލޯ އެފްއޭއެމް ވެޓަރެންސް ލީގުގެ ފައިނަލުގެ ޖާގައެއް މޯލްޑިވްސް ސޮކަރ މޭޓްސްއިން ކަށަވަރުކޮށްފިއެވެ.

ލީގުގައި އާދީއްތަ ދުވަހު ހަވީރު ކުޅުނީ ދަ ގްރާންޑޭ ސްޕޯޓްސް ކްލަބާއި މޭޓްސްއެވެ. މޭޓްސްއިން މެޗު ކާމިޔާބުކުރީ 3-2 ގެ ނަތީޖާއަކުންނެވެ. އަންނަ ހޮނިިހިރު ދުވަހު ކުޅޭ ފައިނަލުގައި މޭޓްސްއިން ނުުކުންނާނީ ހުޅުމާލެ ވެޓެރަންސްއާ ދެކޮޅަށެވެ. ދެޓީމު ވެސް ފައިނަލުން ޖާގަ ހޯދީ ބަލިނުވެ، ލީގު ބުރުުގައި ބާކީ ނުކުޅެ އެއް މެޗު އޮއްވައެވެ. ލީގު ބުރުގެ އެއްވަނައިގައި ހުޅުމާލެ ވެޓެރަންސް އޮތީ ފަސް މެޗުން 13 ޕޮއިންޓާ އެކުއެވެ. ދެވަނައިގައި އޮތް މޭޓްސްއަށް ވަނީ ފަސް މެޗުން 11 ޕޮއިންޓް ލިބިފައެވެ. ތިން ވަނައިގައި އޮތް ދަ ގްރާންޑޭ ލީގު ބުރުގެ ހުރިހާ މެޗެއް ނިމުނުއިރު، ހަމަކުރެވުނީ 10 ޕޮއިންޓެވެ.

އާދީއްތަ ދުވަހު ހަވީރު ކުޅުނު މެޗުގެ 13 ވަނަ މިނިޓްގައި ސޮކަ މޭޓްސް އިން ލީޑުނެގީ ކޯނަރެއްގައި ހުރަސްވި ބޯޅައަކުން އައްސަދު އަބްދުލް ގަނީ ބޮލުން ޖެހި ގޯލުންނެވެ. މެޗުގެ 25 ވަނަ މިނިޓްގައި މޭޓްސްއިން ލީޑުފުޅާކުރީ އޭރިއާތެރެއިން އަހުމަދު އަފުރާދު (އަފޭ) ޖެހި ގޯލުންނެވެ.

ދެ ވަނަ ހާފުގައި ކުޅެން ނުކުމެ، ދަ ގްރާންޑޭ އިން ދެ ގޯލު ޖަހައި ނަތީޖާ ހަމަހަމަކުރިއެވެ. ގޯލުތައް ޖެހީ ހަސަން ޝަރީފް އާއި އަހުމަދު ސާއިގްއެވެ. ގްރާންޑޭއަށް ލީޑުނަގައިދޭން ޝުއައިބު ޒާހިރަށް ލިބުނު ފުރުސަތުގެ ބޭނުން ނުހިފުނެވެ.

މެޗު ނިމެން އަށް މިނިޓަށް ވެފައި ވަނިކޮށް އަބްދުﷲ ވަހީދު (ބިންމާ އައްލޯ) ދިން ބޯޅައަކުން ސޮކަ މޭޓްސް މޮޅުކޮށްދިން ގޯލު ޖެހީ އަހުމަދު މަމްދޫހު (ފެނާންޑޯ) އެވެ.