އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް ކުރާ ހިޔާނާތާއި މަނީ ލޯންޑްރިންގެ ދައުވާގެ އަޑުއެހުންތައް ނިންމައި ހުކުމް އިއްވަން ތައްޔާރުވެއްޖެއެވެ.

މި މައްސަލާގައި ބައްސާމްގެ މައްޗަށް ކުރަނީ ހިޔާނާތުގެ ދައުވާ އާއި މަނީލޯންޑްރިންގެ ދައުވާ އެވެ.

ބައްސާމްގެ މައްޗަށް ދައުލަތުން ދައުވާކުރަނީ އެފްއޭއެމްގެ ރައީސްގެ މަގާމުގައި ބައްސާމް ހުރިއިރު 2018 ވަނަ އަހަރު ފީފާއިން އެފްއޭއެމަށް ޖަމާކުރި ފައިސާގެ ތެރެއިން 10،000 ޑޮލަރު ބޭންކަށް ލިޔުންތަކެއް ހުށަހަޅައިގެން، ބައްސާމްގެ އެކައުންޓަކަށް ޖަމާކުރި ކަމަށް ބުނެ އެވެ. އެ ފައިސާ ޖަމާކުރީ ބޭންކު ޗާޖުތައް އުނިކޮށްގެން ކަމަށްވާތީ ބައްސާމްގެ އެކައުންޓަށް ޖަމާވީ 9،999 ޑޮލަރެވެ.

އެ މައްސަލާގައި ކްރިމިނަލް ކޯޓުގައި ހޯމަ ދުވަހު ބޭއްވި އަޑުއެހުމުގައި ހުލާސާ ބަޔާން ހުށަހެޅުމުން އަޑުއެހުންތައް ނިންމާލައި ދެން އޮންނާނީ ހުކުމް އިއްވުންކަން ވަނީ އިއުލާންކޮށްފައެވެ. އަދި ދައުލަތުން ބުނި ގޮތުގައި، ހިޔާނާތުގެ ކުށުގެ ހުރިހާ އުންސުރެއް އެ މައްސަލާގައި ފުރިހަމަވާތީ ބައްސާމްގެ މައްޗަށް ކުށް ސާބިތުވާނެ އެވެ.

އޭގެ އިތުރުން ދައުލަތުން ބުނީ، ބައްސާމް ބޭނުންކުރީ އެފްއޭއެމްގެ ފައިސާކަން ޝައްކު ކުރެވޭ ހާލަތެއް ކަމަށް ވާތީ މަނީ ލޯންޑްރިންގެ ދައުވާ ވެސް ބައްސާމްގެ މައްޗަށް ސާބިތުވާނެ ހެކި އެބަހުރި ކަމަށެވެ. އަދި އެކި މަރުހަލާތަކުގައި އެކި ގޮތަށް ބައްސާމްގެ ފަރާތުން ވާހަކަ ދައްކާފައިވާ ކަމަށް ވެސް ދައުލަތުން ބުންޏެވެ.

އެފްއޭއެމްގެ އިތުރު ފައިސާތަކަކަށް ހިޔާނާތްތެރިވި ކަމަށް ބުނެ ބައްސާމްގެ މައްޗަށް އިތުރު ދައުވާތަކެއް ވެސް ދައުލަތުން ކުރެއެވެ. އެ މައްސަލާގެ ޝަރީއަތް ކުރިއަށް ގެންދަނީ ވަކިންނެވެ.