ބައްސާމަށް މަހެއްގެ މައްޗަށް 34،000 ޑޮލަރު ޖަމާވެފައިވޭ، އެ ފައިސާ އިން ބޭރުން ވިޔަފާރިކޮށް އަމިއްލަ ބޭނުމަށް ހަރަދުކުރި: ހުކުމް

އެފްއޭއެމްގެ ކުރީގެ ރައީސް ބައްސާމް އަދީލް ޖަލީލަށް މަގާމުގައި ހުރި 8 ވަނަ އަހަރު މަހެއްގެ މައްޗަށް 34،965.75 އެމެރިކާ ޑޮލަރު ޖަމާވަމުން ދިޔަކަން އޭނާގެ މައްޗަށް އިއްވި ހުކުމުން އެނގިއްޖެއެވެ.

ބައްސާމްގެ މައްޗަށް އިއްވި ހުކުމުގައި ބުނެފައިވަނީ ބައްސާމްގެ އަމިއްލަ އެކައުންޓަށް 10,000 ޔޫއެސް ޑޮލަރު ޖަމާކޮށްފައި ވަނީ ޑޮލަރު މާރުކުރުމުގެ މުއާމަލާތެއްގެ ގޮތުގައި ކަމަށް ވާއިރު، މި މުއާމަލާތާ ގުޅިގެން އެފްއޭއެމް އަށް ދައްކަންޖެހޭ އެއްވެސް ފައިސާ އެއް ބައްސާމް މިހާތަނަށް ދައްކާފައިނުވާކަން އެނގޭ ކަމަށެވެ. އަދި، މި ފައިސާ އަކީ ބައްސާމް ދައްކަންޖެހޭ ފައިސާ އެއް ނޫންކަން ތަކުރާރުކޮށް ޝަރީއަތުގައި އޭނާ ފާހަގަކޮށްފައިވާ ކަމަށް ހުކުމުގައި ވެއެވެ.

ހުކުމުގައި އިތުރަށް ބުނެފައި ވަނީ މި ފައިސާ ބައްސާމް ބޭންކް އެކައުންޓަށް ޖަމާވުމުން، އެ ފައިސާ އޭނާ ހޭދަކޮށްފައި ވަނީ އަމިއްލަ ބޭނުންތަކަށް ކަމަށެވެ. އެގޮތުން ބައްސާމުގެ ހިއްސާ އޮންނަ ގްލޭޝިއަރ އިންވެސްޓްމަންޓް ޕްރައިވެޓް ލިމިޓެޑްގެ ދަށުން ހިންގަމުން އަންނަ ވިޔަފާރިތަކަށް ހަރަދުކޮށްފައިވާ ކަމާއި، ފޮރިން ޕާޗޭސްގެ ގޮތުގައި ރާއްޖެ އިން ބޭރުން ވިޔަފާރި ކޮށްފައި ވާކަން ބައްސާމް ގެ ނަމުގައިވާ އެކައުންޓްތަކުގައި ފައިސާ ދައުރު ވެފައިވާ ގޮތަށް ބެލުމުން ފާހަގަވާ ކަމަށް ހުކުމުގައި ވެއެވެ. މި ފައިސާ ޖަމާވި ދުވަސްވަރު މި އެކައުންޓުން ސިންގަޕޫރުގެ އެކި ފިހާރަތަކުން އަގުހުރި މުދާ ގަނެފައިވާކަން ބޭންކް ސްޓޭޓްމަންޓުން އެނގޭ ކަމަށް ވެސް ހުކުމުގައި ވަނީ ފާހަގަ ކޮށްފައެވެ.

މި މުއާމަލާތާ ގުޅިގެން ފުލުހުން ތައްޔާރުކޮށްފައިވާ ފައިނޭންޝަލް އެސެސްމަންޓް ރިޕޯޓުގައި ބަޔާންކޮށްފައިވާ ގޮތުގައި ބައްސާމް ބޭންކްތަކުގައި ޑިކްލެއަރކޮށްފައިވާ އަދަދުތަކާ ނުބައްދަލު މިންވަރަކަށް ޑޮލަރުގެ މުއާމަލާތްތައް ކޮށްފައިވެއެވެ. އެގޮތުން އޭނާ މަހެއްގެ މައްޗަށް ލިބޭ އާމްދަނީ އަކީ 5,000 ޑޮލަރު ކަމަށް ބޭންކް އޮފް މޯލްޑިވްސްގައި ޑިކްލެއަރކޮށްފައި ވާއިރު، އޭނާގެ ނަމުގައި އެ ބޭންކްގައި ހުޅުވާފައިވާ އެކައުންޓަށް 2018 ވަނަ އަހަރު މަހެއްގެ މައްޗަށް ގާތްގަނޑަކަށް 34,965.75 (ތިރީސް ހަތަރުހާސް ނުވަސަތޭކަ ފަސްދޮޅަސް ފަސް ޔޫއެސް ޑޮލަރު ހަތްދިހަ ފަސް ސެންޓް) ޖަމާވެފައިވާކަން އެކައުންޓް ސްޓޭޓްމަންޓުން އެނގޭކަމަށް މި ރިޕޯޓުގައި ބަޔާން ކޮށްފައި ވެއެވެ.

ފީފާ އިން އެފްއޭއެމް އަށް ދޭ ފައިސާ އަކީ ފުޓުބޯޅަ އިން ދިވެހިރާއްޖެ ކުރިއަރުވާ ތަރައްގީ ކުރުމަށް ދޭ ފައިސާ ކަމާއި، މި ގޮތަށް ދެވޭ ފައިސާ އަކީ ދިވެހިރާއްޖޭގެ ފުޓުބޯޅަ ކުރިއަރުވާ ތަރައްގީކުރުމަށް މުހިއްމު ގިނަ މަސައްކަތްތަކެއް ކުރުމަށް އަމާނާތްތެރި ކާމާއެކު ބެލެހެއްޓުމަށް ހަވާލު ކުރެވޭ ފައިސާ ކަމަށް ހުކުމުގައި ވެއެވެ. އެހެން ނަމަވެސް މި ފައިސާ ބޭނުން ކޮށްފައި ވަނީ އަމިއްލަ ބޭނުން ތަކަށް ކަމަށް ހުކުމުގައި ވެއެވެ.

އަދި ދިވެހިރާއްޖޭގެ ފުޓުބޯޅަ ކުރިއެރުވުމަށް ހަވާލުކުރެވޭ މިފަދަ ގިނަ ފައިސާތަކާ ގުޅިގެން ބައްސާމް އާ ދެކޮޅަށް ތުހުމަތުގެ އިނގިލި ދިއްކުރެވޭ ގޮތަކަށް ފައިސާގެ މުއާމަލާތުތައް ކޮށްފައި ހުރިކަން ފައިނޭންޝަލް އެސެސްމަންޓް ރިޕޯޓުން ފާހަގަކުރެވެއެވެ. އަދި މި ސަބަބުތަކުގެ މައްޗަށް ރިއާޔަތްކޮށް ދިވެހިރާއްޖޭގެ ޤާނޫނުލްޢުޤޫބާތު 1003 ވަނަ މާއްދާ އާއި ދިވެހިރާއްޖޭގެ ސުޕްރީމް ކޯޓުގެ ޝަރީއަތުން އަދަބު ކަނޑައެޅުމުގައި އަމަލު ކުރާނެ އުސޫލުގެ 6 ވަނަ ނަންބަރާއި ހަވާލާދީ، އަދަބު މަތިކުރުމުގައި ފަނޑިޔާރަށް ލިބިދެވޭ އިހުތިޔާރުގެ ދަށުން މި ކުށަށް ގާނޫނުގައި ކަނޑައަޅާފައިވާ އެންމެ ބޮޑު އަދަބު ދިނުމަށް ނިންމި ކަމަށް ގާޒީ ވަނީ ވިދާޅުވެފައެވެ. އެގޮތުން 4 އަހަރުގެ ޖަލު ހުކުމެއް ވަނީ އިއްވާފައެވެ.