ޖެހިޖެހިގެން 10 ވަނަ ފަހަރަށް ބަޔާނުން ބުންޑަސްލީގާ ކާމިޔާބުކޮށްފި!
މި މޮޅާއެކު ބަޔާންގެ ތޯމަސް މުލަރ ވެފައިވަނީ 11 ފަހަރަށް ބުންޑަސްލީގާ ކާމިޔާބުކުރި ފުރަތަމަ ކުޅުންތެރިޔާއަށް
ބަޔާނުން ބުންޑަސްލީގާ ކާމިޔާބުކުރުން
ޖަރުމަނުގެ ގަދަބާރު ބަޔާން މިއުނިކުން ޖެހިޖެހިގެން 10 ވަނަ ފަހަރަށް ބުންޑަސްލީގާ ކާމިޔާބުކޮށްފިއެވެ.
ބަޔާނުން މުބާރާތް ކަށަވަރުކުރީ ހޮނިހިރު ދުވަހުގެރޭ ބޮރޫޝިޔާ ޑޯޓްމަންޑް ބަލިކޮށްގެންނެވެ. ތާވަލުގެ ދެވަނާގައި އޮތް ޑޯޓްމަންޑް ބަލިވީ 3-1 ގެ ނަތީޖާއަކުންނެވެ. ފުރަތަމަ ހާފުގައި 15 ވަނަ މިނެޓުގައި ބަޔާނަށް ލީޑު ނަގައިދިނީ ސާޖް ގިނާބްރީއެވެ. އޭގެ ފަހުން އެޓީމަށް ލީޑު ފުޅާކޮށްދިނީ ރޮބާޓް ލެވަންޑޮސްކީއެވެ. ނަމަވެސް ދެވަނަ ހާފުގައި ލިބުނު ޕެނަލްޓީއަކުން ޑޯޓްމަންޑަށް ފަރަގު ކުޑަކޮށްދިނީ ކޭންއެވެ. މެޗުގެ ފަހު ލަނޑު ބަޔާންއަށް ކާމިޔާބުކޮށްދިނީ މުސިއަލާއެވެ.
އަމިއްލަ ދަނޑުގައި ކުޅެގެން ބަޔާނުން މުބާރާތް ކާމިޔާބުކުރީ ލީގުގައި ބާކީ ތިން މެޗު ނުކުޅެ އޮއްވައެވެ. މިއީ ބަޔާނުން ބުންްޑަސްލީގާ ކާމިޔާބުކުރި 31 ވަނަ ފަހަރެވެ. އަދި މިއީ ޔޫރަޕުގެ ގަދަ ފަސް ލީގުގެ ތެރެއިން ލީގެއް ޖެހިޖެހިގެން 10 ފަހަރަށް ޓީމަކުން ކާމިޔާބުކުރި ފުރަތަމަ ފަހަރެވެ. ބަޔާނުން މުބާރާތް ކާމިޔާބުކުރިއިރު، އެޓީމުން ވަނީ 31 މެޗު ކުޅެގެން 75 ޕޮއިންޓު ހޯދާފައެވެ. ދެވަނާގައި އޮތް ޑޯޓްމަންޑަށް 31 މެޗުން ލިބުނީ 63 ޕޮއިންޓެވެ.
މިއީ ބަޔާނުގެ ކޯޗުކުމާއި އަލަށް ހަވާލުވި ހޫލިއަން ނާގަލްސްމަންގެ ކޯޗިންގ ކެރިއަރުގައި ލިބުނު ފުރަތަމަ ތަށްޓެވެ. ހަމައެހެންމެ މި މޮޅާއެކު ބަޔާންގެ ތޯމަސް މުލަރ ވެފައިވަނީ 11 ފަހަރަށް ބުންޑަސްލީގާ ކާމިޔާބުކުރި ފުރަތަމަ ކުޅުންތެރިޔާއަށެވެ.
