ފާއިތުވި ދެ ހުކުރުގައި އަގްސާ މިސްކިތުގައި ހިނގި ހަމަނުޖެހުންތަކުގައި އަނިޔާވި މީހުންގެ އަދަދު 200ން މައްޗަށް

އަލް-އަގްސާ މިސްކިތުގައި އިސްރާއިލްގެ ސިފައިންނާ ފަލަސްތީންގެ އާންމު ރައްޔިތުންނާ ދެމެދު ވިދި ވިދިގެން ދެ ހުކުރު ދުވަހު ކުރިމަތިލުންތައް ހިނގާފައިވާއިރު، މި ކުރިމަތިލުންތަކުގައި އަނިޔާވި މީހުންގެ އަދަދު ވަނީ 200ން މައްޗަށް އަރާފައެވެ.

ރޮއިޓަރސް އިން ރިޕޯޓުކޮށްފައިވާ ގޮތުން ފާއިތުވި ހުކުރު ދުވަހު އަނެއްކާވެސް އިސްރާއިލްގެ ސިފައިންނާ ފަލަސްތީންގެ އާންމު ރައްޔިތުންނާ ދެމެދު ކުރިމަތިލުންތަކެއް ވަނީ ހިނގާފައެވެ.

އިސްރާއިލުން ބުނަނީ ގާޒާއިން އެގައުމަށް ދެ ރޮކެޓް ހަމަލާ ފޮނުވާލާފައިވާ ކަމަށެވެ. އޭގެ ތެރެއިން އެއް ރޮކެޓް ހަމަލާ ފެއިލްވި ނަމަވެސް ދެ ވަނަ ހަމަލާ އެގައުމުގެ ބޯޑަރަށް އަމާޒުވެފައިވާ ކަމަށް އިސްރާއިލާ ހަވާލާދީ ރޮއިޓަރސް އިން ރިޕޯޓުކޮށްފައިވެއެވެ.

ފަލަސްތީނުން ބުނަމުން އަންނަނީ އެގައުމުގެ މުސްލިމު ރައްޔިތުންނަށް އަގްސާ މިސްކިތުގައި ނަމާދުކޮށް އަޅުކަން ކުރުމުގެ ފުރުސަތު އިސްރާއިލުން ނުދޭ ކަމަށެވެ. މިސްކިތުގައި އިސްރާއިލް ސިފައިން ހަމަނުޖެހުން ހިންގާކަމަށް ފަލަސްތީންގެ ރައްޔިތުން ބުނަމުންދާއިރު އިސްރާއިލުން ދަނީ މިކަން ދޮގުކުރަމުންނެވެ.

އިސްރާއިލުން ބުނަނީ އެގައުމުގެ ސިފައިން މުސްލިމުން އަޅުކަން ކުރާ ސަރަހައްދަށް ދާން ޖެހުނީ ފަލަސްތީންގެ އާންމު ރައްޔިތުން ހިލަ އަދި ހަވާ ބޭނުންކޮށްގެން ޔަހޫދީންނަށް ހަމަލާދޭން ފެށުމުންކަމަށެވެ.

ހުކުރު ދުވަހުގެ މި ހަމަނުޖެހުންތަކުގައި އިސްރާއިލް ސިފައިން ރަބަރު ވަޒަން ބޭނުންކޮށްގެން ނަމާދަށް ގޮސްތިބި މީހުންނަށް އަމާޒުކޮށް ހަމަލާތައް ދީފައިވާ އިރު، ޑްރޯން ބޭނުން ކޮށްގެން އިސްރާއީލް ސިފައިން ވަނީ މިސްކިތުގައި ތިބި މީހުންނަށް އަމާޒުކޮށް ކަރުނަ ގޭސްވެސް ޖަހައިފައެވެ. މީގެ ސަބަބުން އެތަނުގައި ތިބި އެތައް ހާސް ރައްޔިތުންނަށް ވަނި ނޭވާ ހާސްވުމުގެ މައްސަލަ ކުރިމަތި ވެފައެވެ.

މީގެ ކުރީ ހަފުތާގެ ހުކުރު ދުވަހު އަގްސާ މިސްކިތުގައި ހިނގާދިޔަ ހަމަނުޖެހުމުގައި ފަލަސްތީނުގެ 158 މީހަކަށްވަނީ އަނިޔާވެފައެވެ. އަދި 400ށްވުރެ ގިނަ މީހުން ހައްޔަރު ކުރިއެވެ. މާޗް މަހުން ފެށިގެން ހިނގަމުން އަންނަ ކުރިމަތިލުންތަކުގައި 29 މީހަކު ވަނީ މަރުވެފައެވެ.

އިސްރާއިލް ސިފައިންގެ އަނިޔާވެރި ހަމަލާތައް ކޮންމެ ރަމްޟާން މަހަކުވެސް އިތުރު ކުރާކަން ފާހަގަ ކުރެވިފަވެއެވެ.