ކޮވިޑުގެ ކޭސްތައް އިތުރުވުމާއި ގުޅިގެން ނިއުދިއްލީގައި މާސްކް އެޅުން މަޖުބޫރު ކޮށްފި

ކޮވިޑުގެ ކޭސްތައް އިތުރުވުމާއި ގުޅިގެން އިންޑިއާގެ ނިއުދިއްލީގައި އާންމު ތަންތަނުގައި އުޅޭއިރު އާންމުން މާސްކް އެޅުން މަޖުބޫރު ކޮށްފިއެވެ.

ސަރުކާރުން ހުކުރު ދުވަހު ނެރުނު އިއުލާނެއްގައި ބުނެފައިވަނީ ހުކުރު ދުވަހުން ފެށިގެން އާންމުން މާސްކް އެޅުން މަޖުބޫރުވާނެ ކަމަށެވެ. އަދި މި އުސޫލާއި ޚިލާފުވާ މީހުން 500 ރުޕީސް އިން ޖޫރިމަނާ ކުރުމަށް ވެސް ވަނީ ނިންމާފައެވެ. އެެހެންނަމަވެސް ހަތަރު ފުރޮޅުލީ ޕްރައިވެޓް އުޅަނދުތަކުގައި އެކުގައި ދަތުރު ކުރާ މީހުން މާސްކް އެޅުމުން އިސްތިސްނާވާނެ ކަމަށް ވަނީ ބުނެފައެވެ.

ދިއްލީ ޑިޒާސްޓަރ މެނޭޖްމަންޓް އޮތޯރިޓީން ބުދަ ދުވަހު ބޭއްވި ބައްދަލުވުމެއްގައި ބުނެފައިވަނީ ދިއްލީގައި ކޮވިޑްގެ ޕޮޒިޓިވިޓީ ރޭޓް ފާއިތުވި ދުވަސްތަކުގައި އިތުރުވެފައިވާ ކަމަށެވެ.

ބުރާސްފަތި ދުވަހު ކޮވިޑުގެ ޖެހިިގެން 965 މީހުން ރިޕޯޓްކޮށްފައިވާއިރު ޕޮޒިޓިވިޓީ ރޭޓް ހުރީ 4.71 އިންސައްތައިގައެވެ. އަދި ބުރާސްފަތި ދުވަހު އެކަކު މި ބަލީގައި މަރުވި ކަމަށް ވަނީ ރިޕޯޓްކޮށްފައެވެ.

ބުދަ ދުވަހު 1،009 މީހުން ކޮވިޑް ޖެހިގެން ރިޕޯޓް ކޮށްފައިވާއިރު އަންގާރަ ދުވަހު 632 މީހުން ވަނީ ރިޕޯޓްކޮށްފައެވެ. އަދި ހޯމަ ދުވަހު 501 މީހުންނަށް ދިއްލީ އިން ކޮވިޑް ޖެހިގެން ވަނީ ރިޕޯޓްކޮށްފައެވެ.