ނިއު ދެއްލީގައި އިމާރާތެއް ވެއްޓި ހަ މީހުން މަރުވެއްޖެ، ގިނައީ ދަރިވަރުން ކަމަށް ބެލެވޭ

އިންޑިއާގެ ވެރިރަށް ނިއު ދެއްލީގެ ސަތުޔާ ނިކޭތަން އަވަށުގައި ހުރި ފަސް ފަންގިފިލައަށް ބިނާކޮށްފައިވާ އިމާރާތެއް ވެއްޓި، ހަ މީހުން މަރުވެއްޖެ އެވެ. 'ހޮސްޓެލް ޑޭޒް' ނަމަކަށް ކިޔާ މި އިމާރާތް ވެއްޓުނީ އާދީއްތަ ދުވަހުގެ މެންދުރުފަހު 13:30 ހާއިރު އެވެ. ވެއްޓުނު އިމާރާތުގެ ދަށުން ހަ މީހުން ސަލާމަތް ކުރެވިފައިވާއިރު، އެ މީހުންނަށް ފަރުވާދެމުންދާ ކަމަށް އެއިމްސް ހޮސްޕިޓަލުން ބުނެ އެވެ. އާދީއްތަ ދުވަހަކީ ކިޔެވުން ބަންދު ދުވަހަކަށް ވުމުން، ހާދިސާ ހިނގި ވަގުތު ގިނަ ދަރިވަރުން ތިބީ އެ ކުދިންގެ ކޮޓަރިތަކުގަ އެވެ. އިމާރާތް ވެއްޓުނު ވަގުތު އެ ތަނުގައި 24 އާއި 48 އާ ދެމެދުގެ އަދަދަކަށް މީހުން ތިބި ކަމަށް ބެލެވޭއިރު، ބައެއް ދަރިވަރުން އަދިވެސް ތިބީ ތާށިވެފަ އެވެ.

އިމާރާތް ވެއްޓުނީ ބޭސްމަންޓުގައި ފެންބޮޑުވެފައި ވަނިކޮށް، މަރާމާތުގެ މަސައްކަތްތަކެއް ކުރިއަށްދިއުމުން ކަމަށް ދިއްލީގެ ޗީފް މިނިސްޓަރު ރޭކާ ގުޕްތާ ވިދާޅުވި އެވެ. "ތާށިވެފައި ތިބި މީހުން ސަލާމަތުން ނެރުމަށް ކުރެވެން ހުރި ހުރިހާ މަސައްކަތެއް ދަނީ ކުރަމުން،" އޭނާ ވިދާޅުވި އެވެ. އަދި، "މިހާތަނަށް 12 މީހަކު ވަނީ ފެނިފައި. އޭގެ ތެރެއިން ހަ މީހަކު މަރުވެފައިވާއިރު، އަނެއް ހަ މީހުންގެ ހާލު މިހާރު އަންނަނީ ރަނގަޅުވަމުން. އަޅުގަނޑުމެން މިދަނީ އެ ކުދިންގެ ބެލެނިވެރިންނާ ގުޅަމުން، އަދި، އެއްވެސް ދަތިކަމެއް ކުރިމަތިނުވާނެ ކަން ކަށަވަރުކުރުމަށް މަސައްކަތް ކުރަމުން. ކުދިންނަށް ދަނީ އެކަށީގެންވާ ސިއްހީ ފަރުވާ ދެމުން،" ގުޕްތާ ވިދާޅުވި އެވެ.

އިމާރާތް ވެއްޓުނު އަޑު އިވުނީ "ބިންހެލުމެއް އައިސްގެން އިވޭ ކަހަލަ ގުގުމާލި އަޑެއް" ފަދައިން ކަމަށް މަންޒަރު ފެނުނު މީހަކު ބުންޏެވެ. އަދި، އިމާރާތުގެ ދަށުން "އަޅުގަނޑުމެން ސަލާމަތްކޮށްދީ، ސަލާމަތްކޮށްދީ!" އޭ ކިޔައި ކުދިން ރޮއި އާދޭސްކުރަމުންދިޔަ ކަމަށް ވެސް އޭނާ ބުނެ އެވެ. "ދަރިވަރުންނާއި އާންމު ރައްޔިތުންގެ ސަލާމަތަށް އިހުމާލުވުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން،" ކަމަށް އިންޑިއާގެ ނޭޝަނަލް ސްޓޫޑެންޓްސް ޔޫނިއަނުން ބުނެ އެވެ. "މެދުނުކެނޑި ވާރޭ ވެހުމުގެ ސަބަބުން، ފެން ފޭދި އިމާރާތުގެ އޮނިގަނޑު ބަލިކަށިވީތޯ އަޅުގަނޑުމެން މި ދަނީ ބަލަމުން. މަރާމާތުގެ މަސައްކަތްތަކަކީ ވެސް އިމާރާތް ވެއްޓުމަށް މެދުވެރިވި ސަބަބަކަށް ވެދާނެ. ނަމަވެސް، މި ވަގުތު ސީދާ ސަބަބު ދެނެގަތުން ދަތި،" އެ ޔޫނިއަންގެ އޮފިޝަލަކު ވިދާޅުވި އެވެ.

ސަތުޔާ ނިކޭތަންއަކީ ދެއްލީ ޔުނިވާސިޓީގެ ދެކުނު ކެމްޕަހާ ކައިރީގައި ގިނަ އަދަދެއްގެ ދަރިވަރުން ދިރިއުޅޭ ސަރަހައްދެކެވެ. "ސައުތު ކެމްޕަހުގެ ފަސް ކޮލެޖެއްގެ ހުރިހާ ދަރިވަރުން ދިރިއުޅެނީ ސަތުޔާ ނިކޭތަންގައި. އެ އިމާރާތްތައް ހުރީ ވަރަށް ބޮޑަށް ބާވެ، ވީރާނާވެފައި. އެއްވެސް އިންސްޕެކްޝަނެއް ނުހަދާ. މި ތަނުގައި އެއްވެސް ގަވާއިދެއް ނުވަތަ އުސޫލެއް ނޯވޭ،" އެ ސަރަހައްދުގައި ދިރިއުޅޭ ދަރިވަރެއް ކަމަށްވާ ޝިވަމް ޔާދަވް ކިޔައިދިނެވެ. އިންޑިއާގެ ކާރިސާތަކާ ބެހޭ އިދާރާއިން މިހާރު އެ ސަރަހައްދުގައި ހަރަކާތްތެރިވަމުންދާއިރު، ފުލުހުން ދަނީ މި މައްސަލަ ރަޖިސްޓްރީކޮށް އިމާރާތުގެ ވެރިފަރާތް ހޯދުމުގެ މަސައްކަތް ކުރަމުންނެވެ.