އަވަށްޓެރި ޤައުމަކާއި ދެކޮޅަށް ބަދުބަސް ބުނެ ބެނަރ ހަރުކުރުން ހަަމަ މިހާރު ހުއްޓުވަން ޖެހޭ - ރައީސް ނަޝީދު

އަވަށްޓެރި ޤައުމަކާއި ދެކޮޅަށް ބަދުބަސް ބުނެ ބެނަރ ހަރުކުރުން ހަަމަ މިހާރު ހުއްޓުވަން ޖެހޭކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބުދަ ދުވަހުގެ ޖަލްސާ ފެށުމާއެކު، ރައީސް ނަޝީދު ވިދާޅުވީ، މާލޭގެ ބޮޑެތި އިމާރާތްތަކުގައި އަވަށްޓެރި ޤައުމުތަކާއި ބެހޭ ގޮތުން ބަދު ބަސް ބުނެ ބޮޑެތި ބެނާތައް ނަގާފައި ހުރުމަކީ ޤާނޫނޫލް އުޤޫބާތާ ޚިލާފު އަދި އާންމު މަސްލަހަތާ ޚިލާފު ކަމެއް ކަމަށެވެ. އެތަކެތި ވަގުތުން ވަގުތައް ފުލުހުން ނަގަން ޖެހޭ ކަމަށް ރައީސް ނަޝީދު ވިދާޅުވިއެވެ.

ބޮޑުތަކުރުފާނު މަގުގައި ހުންނަ ކުރީގެ ރައީސް ޔާމީންގެ ގެކޮޅުގައި އިންޑިއާ އައުޓް ބޮޑު ބެނަރ ހަރު ކުރީ އަންގާރަ ދުވަހުގެ ހަވީރުއެވެ. އެ ބެނާގައި ހުރީ ރާއްޖޭގެ ގައުމީ ދިދައިގައި ހިމެނޭ ފެއްސާރައި ރަތާއި ހުދު ކުލައެވެ. އަދި ރަތް ކުލައިން އިންޑިއާ އައުޓް ވަނީ ލިޔެފައެެވެ. މީގެ އިތުރުންވެސް މާލޭގެ އެކި ސަރަހައްދުގެ މަގު މަތީގައާއި ފާރުތަކުގައިވެސް އިންޑިއާ އައުޓް އަދި އިންޑިއާ މިލިޓަރީ އައުޓް މިގޮތަށް ދަނީ ލިޔަމުންނެވެ.