ދުނިޔޭގެ އެންމެ މޮޅު އެއް ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯގެ އެއްމާބަނޑު ދެކުދިންގެ ތެރެއިން އެއް ކުއްޖަކު މަރުވެއްޖެއެވެ.

މިކަން ހާމަކޮށް އިންސްޓަގްރާމްގައި ރޮނާލްޑޯ އަދި އޭނާގެ ބައިވެރިޔާ ޖޯޖީނާގެ ފަރާތުން ކުރި ޕޯސްޓެއްގައި ބުނީ އެމީހުންނަށް ލިބުނު އެއްމާބަނޑު ދެކުދިންގެ ތެރެއިން އެއް ކުއްޖަކު މަރުވެފައިވާކަން ހިތާމައާއެކު އާންމުކުރާ ކަމަށެވެ. ހޯމަ ދުވަހު ރޮނާލްޑޯއަށް ލިބުނީ އެއްމާބަނޑު ދެބެން ނެވެ. އެއީ އަންހެންކުއްޖަކާ ފިރިހެން ކުއްޖެކެވެ. މީގެ ތެރެއިން މަރުވީ ފިރިހެން ކުއްޖާއެވެ.

ރޮނާލްޑޯ ކުރި ޕޯސްޓުގައި އިތުރަށް ބުނީ މިއީ ބެލެނިވެރިއަކަށް ލިބޭނެ އެންމެ ބޮޑު ހިތާމަ ކަމަށެވެ. އަދި ދިރިއުޅުމުގައި އިތުރަށް ކުރިއަށް ދާން މިހާރު ލިބޭ ހިތްވަރަކީ އަދި އުފާވެރިކަމަކީ ލިބުނު އަންހެން ދަރިފުޅުކަމަށެވެ. މިކަމަށްޓަކައި ޑޮކްޓަރުންގެ ޓީމުގެ ފަރާތުން ލިބުނު އެހީތެރިކަމަށް ރޮނާލްޑޯ ވަނީ ޚާއްސަ ޝުކުރެއް އަދާކޮށްފައެވެ.

މި ދަނޑިވަޅުގައި ލިބިފައިވާ ހިތާމައިން އަރައިގަތުމަށް މަސައްކަތް ކުރަމުން އަންނަކަން ފާހަގަކޮށް ރޮނާލްޑޯ ބުނީ މިވަގުތު އެމީހުން ޕްރައިވެސީ ބޭނުންވާ ކަމަށެވެ. އެހެންކަމުން އެކަމަށް ހުރިހާ ފަރާތެއްގެ އެއްބާރުލުން ދިނުމަށް އެދިފައިވެއެވެ.

ރޮނާލްޑޯއަށް މީގެ ކުރިން ހަތަރު ކުދިން ލިބިފައިވެއެވެ. ހޯމަ ދުވަހު ލިބުނު ދެކުދިންނާއެކު ޖުމްލަ ހަކުދިން އޭނާއަށް ލިބިފައިވެއެވެ.