އީގަލްސް އެކަކަށް!

ދިވެހި ޕްރިމިއަރ ލީގު ތާވަލްގެ އެއްވަަނައަށް އީގަލްސް ޖެހިލައިފިއެވެ. މިއީ މިސީޒަންގެ ލީގު ފެށިފަހުން މާޒިޔާ ނޫން ޓީމަކަށް އެއްވަނަ ލިބުނު ފުރަތަމަ ފަހަރެވެ. އީގަލްސް އެއްވަނައަށް ޖެހިލީ ޓީސީ 3-0 ން ބަލިކޮށް ހޯދި ތިން ޕޮއިންޓާއެކު ޖުމްލަ 22 ޕޮއިންޓް ހަމަކޮށްގެންނެވެ. ދެވަނާގައި މާޒިޔާ އޮތީ 21 ޕޮއިންޓާއެކުއެވެ. އެކަމަކު އީގަލްސް 22 ޕޮއިންޓް ހަމަކުރީ ނުވަ މެޗުންނެވެ. މާޒިޔާ 21 ޕޮއިންޓްގައި އޮތީ 8 މެޗުންނެވެ. އާދިއްތަ ދުވަހުގެރޭ ވެލެންސިޔާ ބަލިކޮށްގެން މާޒިޔާއަށް އަލުން އެއްވަނަ ލިބޭނެއެވެ.

ޓީސީ އަތުން މޮޅުވި މެޗުގެ 13 ވަނަ މިނިޓްގައި ފުރަތަމަ ލަނޑުޖަހާ ކުރި ހޯދައިދިނީ ޒައިން ޒަފަރުއެވެ. ދެވަނަ ލަނޑު ދެވަނަ ހާފް ފަށައިގެން ދެވަނަ މިނިޓްގައި ޖެހީ ޑިފެންޑަރ ނޫމާންއެވެ. މިއީ ހުސެއިން ޝިފާއު ނަގައިދިން ހުރަހެއް ބޮލުން ފޮނުވާލައިގެން ނޫމާން ކާމިޔާބުކުރި ލަނޑެކެވެ. ތިންވަނަ ލަނޑު ޖެހީ މެޗުގެ މޮޅު ކުޅުންތެރިޔާ ހަސަން ރާއިފް އަހުމަދު (ހަންނަ) އެވެ. އޭނާ ލަނޑު ޖެހީ އޭރިޔާތެރެއަށްވަދެ ޑިފެންޑަރުވެސް ނައްޓާލުމަށްފަހުއެވެ. ހަންނަ ވަނީ ފުރަތަމަ ލަނޑު ޖަހަން ޒައިންއަށް ފުރުސަތުވެސް ތަނަވަސްކޮށްދީފައެވެ. އީގަލްސްއިން ވަނީ ލީގުގައި މާޒިޔާވެސް ބަލިކޮށްފައެވެ. އެއީ ލީގުގައި މާޒިޔާ ބަލިވި ފުރަތަމަ މެޗުވެސް މެއެވެ.

އާދިއްތަ ދުވަހުގެރޭ މާޒިޔާއާއި ވެލެންސިޔާ ވާދަކުރާ މެޗަކީ މިހަފްތާގެ ފަހު މެޗެވެ. އެމެޗާއެކު ކޮންމެ ޓީމެއް ނުވަ މެޗު ކުޅެ ނިމޭނެއެވެ.