ބަޔާންގެ ކޯޗު ނޭގަލްސްމަންއަށް 450 މަރުގެ އިންޒާރު!
ފާޑުކިއުންތަކާއި ކުރިމަތި ލެވޭނެ
ބަޔާން މިއުނިކްގެ ކޯޗު ޔޫލިއަން ނޭގަލްސްމަންއަށް
ޖަރުމަނުގެ ބަޔާން މިއުނިކަށް ކޯޗުކޮށްދެމުން އަންނަ ޔޫލިއަން ނޭގަލްސްމަންއަށް 450 މަރުގެ އިންޒާރު ލިބިފައިވާ ކަމަށް އޭނާ ބުނެފިއެވެ.
ޔުއެފާ ޗެމްޕިއަންސް ލީގު ކުއާޓާ ފައިނަލްގައި ވިޔަރެއާލް އަތުން އަމިއްލަ ދަނޑުގައި ބަލިވެ ބަޔާން ވަނީ ޗެމްޕިއަންސް ލީގުން ކަޓާފައެވެ. މިއާއެކު ގިނަ ބައެއްގެ ފާޑުކިއުން ވަނީ ޓީމުގެ އިތުރުން ކޯޗަށްވެސް އަމާޒުވެފައެވެ. އަދި މިއާއެކު މަރުގެ އިންޒާރުތައް ފުލުފުލުގައި ލިބެމުންދިޔަ ކަމަށް ކޯޗު ނޭގަލްސްމަން ބުންޏެވެ.
ނޭގަލްސްމަން ބުނީ މެޗަކުން ބަލިވުމުން، ނުވަތަ މުބާރާތަކުން ކެޓުމުން ފާޑުކިއުން އަމާޒުވާނެކަން އެނގޭ ކަމަށެވެ. އަދި އޭނާގެ ވަޒީފާގެ ގޮތުން އެކަމާއި ކުރިމަތިލާން ޖެހޭ ކަމަށާއި އެއީ އޭނާއަށް މައްސަލައެއް ނޫން ކަމަށެވެ. ނަމަވެސް 450 މަރުގެ އިންޒާރާ އޭނާއަށް ކުރިމަތި ނުލެވޭނެ ކަމަށް ނޭގަލްސްމަން ބުންޏެވެ.
ނޭގަލްސްމަން އަށް ގިނަ އަދަދެއްގެ މަރުގެ އިންޒާރުތަކެއް ލިބެން އަންނައިރު، އޭގެން ކޮންމެ މެސެޖެއްވެސް ކިޔާލުމަށްފަހު ޑިލިޓް ކުރާ ކަމަށް ނޭގަލްސްމަން ބުންޏެވެ. އަދި މިފަދަ ބައެއް މެސެޖުތަކުގައި އޭނާގެ މަންމަ އާއި ބެހިފައި ވާތީ ނޭގަލްސްމަން ވަނީ އެކަމާއި ވަރަށް ބޮޑަށް ނުރުހުން ފާޅުކޮށްފައެވެ.
