ސައޫދީއަރަބިއްޔާގެ މިސްކިތްތަކުގައި ކުރެވޭ ދަމުނަމާދުގައި އެހާދިގުކޮން ނުކިޔެވުމަށް އަންގައިފި
ސައޫދީގެ މިސްކިތްތަކުގެ ދަމުނަމާދު، ފަތިސް ނަމާދާ އެހާގާތްކޮށް ނުނިންމުމަށް އަންގާފައިވޭ
ސައޫދީގެ މިސްކިިތެއް
ސައޫދީއަރަބިއްޔާގެ މިސްކިތްތަކުގައި ދަމުނަމާދު އިމާމްވެ ކޮށްދެއްވާ އިމާމުން، ނަމާދުގައި އެހާދިގުކޮށް ނުކިޔެވުމަށް އެގައުމުގެ މިނިސްޓްރީ އޮފް އިސްލާމިކް އެފެއަރޒުން އިރުޝާދު ދީފިއެވެ. ސައޫދީ ގެޒެޓްގައި ރިޕޯޓްކޮށްފައިވާގޮތުގައި, ދަމުނަމާދު ކޮށްދެއްވާ އިމާމުން (ޚާއްސަކޮށް ރަމަޟާން މަހުގެ ފަހު 10ގައި ދަމުނަމާދު ކުރާއިރު) ޖަމާއަތުގައި ބައިވެރިވާ މީހުން ވަރުބަލިވާނެކަން ވިސްނުމަށާއި, އަދި ފަތިސްނަމާދަށް ގޮވުމުގެ ކުރިން އެމީހުން ވަރުބަލި ފިލުވާލާނެހާ ވަގުތު ލިބޭވަރަށް ދަމުނަމާދު ނިންމުމަށްވެސް ވަނީ ބާރުއަޅާފައެވެ.
މީގެ އިތުރުން ފަތިސްނަމާދުގައި ގުނޫތު ކިއުމާއި އެހެންވެސް ވާރިދުވެފައިވާ ދުއާތައް ކިޔުމުގައި, ސީދާ ރަސޫލު ސައްލަﷲ އަލައިހި ވަސައްލަމް އެންގެވި ގޮތަށް އެކަންތައް ކުރުމަށްވެސް ހަދާން ކޮށްދީފައިވެއެވެ.
ދުއާކުރުން ވެސް މާ ދިގުނުކުރުމަށާއި، ތަފާތު އަޑުއަޑުން އެކަން ނުކުރުމަށާއި، އަދި މާދިގުވެގެން ގޮސް ދަރުހަކަށް ބަދަލު ނުކުރުމަށާއި، މަޑުމައިތިރިކަމާ ޚުޝޫއަތްތެރިކަމާއެކު ދުއާކުރުމަށްވެސް ސައޫދީ އިސްލާމިކް މިނިސްޓްރީން އިމާމުންނަށް އަންގާފައިވެއެވެ.
