ތިންވަނައަށް ޖެހިލަން ލިބުނު ފުރުޞަތު ޔޫވީއަށް ގެއްލިއްޖެ

ދިވެހި ޕްރިމިއަރ ލީގު ތާވަލްގެ ތިންވަނައަށް ޖެހިލަން ލިބުނު ރަނގަޅު ފުރުޞަތެއް ޔުނައިޓެޑް ވިކްޓްރީއަށް ގެއްލިއްޖެއެވެ. ހުކުރު ދުވަހުގެރޭ ގްރީން ސްޓްރީޓްސް ބަލިކޮށްގެން, ތިންވަނަ ހޯދެން އޮތަސް އެމެޗު އެއްވަރުވުމުން އެފުުރުސަތު ޔޫވީއަށް ގެއްލުނީއެވެ. މެޗު އެއްވަރުވީ 1-1 ނެވެ.

މެޗުން މޮޅުވެގެން 13 ޕޮއިންޓާއެކު ވެލެންސިޔާއާ ހަމަކޮށް, ގޯލްގެ ތަފާތުން ކުރި ހޯދެން ޔުނައިޓެޑް ވިކްޓްރީއަށް އޮތެވެ. އެކަމަކު މެޗު އެއްވަރުވުމުން ޔޫވީ އޮތީ 11 ޕޮއިންޓާއެކުއެވެ. ސުޕަރ ޔުނައިޓެޑް ސްޕޯރޓްސް (ސަސް)އާއި, ޓީސީވެސް އޮތީ އެއަދަދަށް ޕޮއިންޓް ހޯދައިގެންނެވެ. ޓީސީ އެއް މެޗު މަދުން ކުޅެފައިވާތީ މިވަގުތު ކުރި ހޯދުމުގެ ފުރުޞަތު އޮތީ ޓީސީއަށެވެ.

ޔޫވީ ކޮޅަށް މެޗުގައި ފުރަތަމަ ލަނޑުޖަހާ ކުރި ހޯދީ ގްރީންއިންނެވެ. ގްރީންގެ ލަނޑު ޖަހައިދިނީ ހޯސޭ އަވީލާއެވެ. އޭނާ ލަނޑުޖެހީ ފުރަތަމަ ހާފްގެ ފަހު މިނިޓްގައެވެ. ޔޫވީއަށް ނަތީޖާ ހަމަހަމަކޮށްދިނީ މެޗުގެ މޮޅުކުޅުންތެރިޔާ ޓޯނީއެވެ. އޭނާ ނަތީޖާ ހަމަހަމަކޮށްދިނީ ހިލޭޖެހުމަކުންނެވެ.

ލީގުގައި ހޮނިހިރު ދުވަހުގެރޭ ވާދަކުރާނީ އީގަލްސްއާއި ޓީސީއެވެ.