އެތުލެޓިކޯއަށް ފާޑު ނުކިޔަން: ގާޑިއޯލާ

އެތުލެޓިކޯ މެޑްރިޑްގެ ކުޅުމަށް ފާޑު ނުކިޔާ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

އިނގިރޭސި ޕްރިމިއާ ލީގުގައި މިދިޔަ އާދިއްތަ ދުވަހު ލިވަޕޫލާއި ދެކޮޅަށް ކުޅުނު މެޗުގެ ކުރިން ގާޑިއޯލާ ބުނީ ބައެއް ޓީމުތައް ކުޅޭގޮތަށް 0-0 ށް ވިސްނައިގެން ފަހަތުގައި ތިބެގެން ސިޓީއަށް ވެސް ކުޅެވިދާނެ ކަމަށެވެ. އެއީ އެތުލެޓިކޯއަށް އަމާޒުކޮށް ގާޑިއޯލާ ބުނި ވާހަކައެއް ކަމަށް ބުނެ އެތުލެޓިކޯގެ ކޯޗު ސިމިއޯނީ ވަނީ ނުރުހުން ފާޅުކޮށްފައެވެ. މިކަމާއި ގުޅިގެން ގިނަ ބަޔަކުގެ ފާޑުކިޔުން ސިޓީއަށް އަމާޒުވިއެވެ.

ޔުއެފާ ޗެމްޕިއަންސް ލީގު ކުއާޓާ ފައިނަލުގެ ދެވަނަ މެޗުގައި އެތުލެޓިކޯ އާއި ބައްދަލުކުރި މެޗަށްފަހު ގާޑިއޯލާ ވަނީ އޭނާ ދެއްކި ވާހަކަ އޮޅުވާ ނުލުމަށް އެދިފައެވެ. ގާޑިއޯލާ ބުނީ އޭނާ މާނަކުރީ ވަރުގަދައަށް ޑިފެންޑު ކުރާ ޓީމަކާއި ދެކޮޅަށް ކުޅެން އަބަދުވެސް އުނދަގޫވާނެ ކަމަށެވެ. އަދި އެތުލެޓިކޯގެ ފަރާތުން އޭނާ އުންމީދު ކުރީ ވަރަށް ޑިފެންސިވް ކުޅުމެއް ފެންނާނެ ކަމަށްވެސް ގާޑިއޯލާ ބުންޏެވެ.

މުބާރާތުގެ ސެމީ ފައިނަލުގައި ސިޓީން ރެއާލް މެޑްރިޑާއި ބައްދަލުކުރަން ޖެހޭއިރު އެމެޗު ފަސޭހަ ނުވާނެ ކަމަށް ގާޑިއޯލާ ބުންޏެވެ. ރެއާލްއަކީ މުބާރާތުގެ ރަސްގެފާނުންގެ ގޮތުގައި ފާހަގަކޮށް ގާޑިއޯލާ ބުނީ ރޭގެ މެޗުގެ ދެވަނަ ހާފުގައި ކުޅުނު ގޮތަށް ކުޅެގެން ރެއާލް ކައިރިން މޮޅު ނުވާނެ ކަމަށެވެ. ރެއާލްއަކީ އެންމެ ގިނަ ފަހަރަށް ޗެމްޕިއަންސް ލީގު ކާމިޔާބު ކުރި ޓީމެވެ. އެޓީމުން ވަނީ 13 ފަހަރު މުބާރާތް ކާމިޔާބު ކޮށްފައެވެ.

އެހެން ކަމުން ކުއާޓާ ފައިނަލުގެ ފުރަތަމަ ލެގުގައި ކުޅުނު ގޮތަށް އަދި ދެވަނަ ލެގުގެ ފުރަތަމަ ހާފުގައި ކުޅުނު ގޮތަށް ކުޅެން ޖެހޭނެ ކަމަށް ގާޑިއޯލާ ބުންޏެވެ. ކުއާޓާގެ ދެވަނަ ލެގުގެ ދެވަނަ ހާފުގައި ސިޓީގެ ފަރާތުން މާ ރަނގަޅު ކުޅުމެއް ނުފެނެއެވެ.