މިއީ ސިޓީގައި ފެނާންޑީނިއޯގެ ފަހު ސީޒަން، ގާޑިއޯލާއަށްވީ ސަޕްރައިޒަކަށް!

މިއީ މެންޗެސްޓަރ ސިޓީގައި ހޭދަކުރާ ފަހު ސީޒަންކަން ކްލަބްގެ ކެޕްޓަން ފެނާންޑީނިއޯ އިއުލާންކޮށްފިއެވެ. އޭނާ މިކަން އިއުލާންކުރީ ޗެމްޕިއަންސްލީގު ކްއާޓަރ ފައިނަލް ދެވަނަ ލެގުގެ ޕްރީމެޗު ޕްރެސް ކޮންފަރެންސްގައި ވާހަކަދައްކަމުންނެވެ. ނޫސްވެރިން ކުރި ސުވާލުތަކަށް ޖަވާބުދެމުން ބްރެޒިލްގެ ފެނާންޑީނިއޯ ބުނީ ޤަވާއިދުން ކުޅެން އޭނާ ބޭނުންވާކަމަށެވެ. މިސީޒަންގައި އޭނާ ސިޓީއަށް ކުޅެދިނީ 23 މެޗެވެ. އޭގެތެރެއިންވެސް ފުރުތަމަ އެގާރައިން ފުރުޞަތު ލިބުނީ ހަ މެޗުގައެވެ.

މިސީޒަންގެ ބާކީ އޮތްބައިގައި އޭނާގެ %100 ކްލަބަށް ދޭނެކަމަށާއި, ކެޕްޓަނެއްގެ ޒިންމާ ފުރިހަމައަށް އަދާކުރާނެކަމަށްވެސް އޭނާ ބުންޏެވެ. އަދި ކްލަބް ބަދަލުކުރުމުގެ ވާހަކަތައް ދައްކާނީ އޭގެފަހުންކަމަށް 36 އަހަރުގެ މިޑްފީލްޑަރު ބުންޏެވެ.

ފެނާންޑީނިއޯގެ އެޖަވާބާއި ގުޅިގެން ސިޓީގެ ކޯޗު ޕެޕް ގާޑިއޯލާ ބުނީ އެކަން އޭނާއަށް ނޭންގޭ ކަމަށާއި, ސީޒަން ނިމުމުން ވާގޮތް ބަލާނެ ކަމަށެވެ. އަދި ވާނެ ގޮތް ނޭންގޭ ކަމަށެވެ. ގާޑިއޯލާ ބުނީ ފެނާންޑީނިއޯއަކީ ކިހާ މުހިއްމު ކުޅުންތެރިއެއްކަން އޭނާ އެތައް ފަހަރަކު ބުނެފައިވާނެ ކަމަށާއި, އަދިވެސް އޭނާގެ ކެޕްޓަނާއި ވާހަކަދައްކާނެ ކަމަށެވެ.

ގާޑިއޯލާ ބުނީ ފެނާންޑީނިއޯއަކީ އާދަޔާހިލާފު ކުޅުންތެރިއެއް ކަމަށާއި, ފެނާންޑީނިއޯއާ ގުޅޭ ގޮތުން އެހެން މީހުންނަށް ނޭންގޭ ގިނަ ކަންތައްތަކެއްވެސް އޭނާއަށް އިނގޭކަމަށެވެ. މިދިޔަ ސީޒަން ނިމުމުން ސިޓީއާއެކު ފެނާންޑީނިއޯ ސޮއިކުރީ އެއް އަހަރުގެ އެއްބަސްވުމެއްގައެވެ. މިސީޒަންގެ ނިޔަލަށް އެ އެއްބަސްވުން ހަމަވާނެއެވެ. ސިޓީގައި ހޭދަކުރި މުއްދަތުގައި އޭނާ ވަނީ 4 ޕްރިމިއަރ ލީގު ކާމިޔާބުކޮށްފައެވެ. އަދި އެއް އެފްއޭކަޕާއި, 6 ލީގުކަޕް އުފުލާލިއެވެ.

2013 ވަނަ އަހަރު ސިޓީއާއި ގުޅުނު މިޑްފީލްޑަރު ކްލަބް ދޫކޮށްލާނީ ކްލަބްގެ ލެޖެންޑެއްގެ ގޮތުގައެވެ.