އަނަސްގެ މަރު: ސިމާހުއާއި ޖުނައިހުގެ ފަރާތުންވެސް ޙާދިސާ ހިނގި ތަނުގައި ނެތްކަމުގެ ދިފާއު

ރ. މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އަންގާރަ ދުވަހު ބޭއްވި މި އަޑުއެހުމަކީ މި މައްސަލައިގައި ދައުވާ ލިބޭ ޖުނައިޙް އަބްދުﷲ އާއި ސިމާހު މޫސާގެ މައްޗަށް ކުރާ ދައުވާގެ އަޑުއެހުމެކެވެ.

މިއީ އެ ދެމީހުންގެ ފަރާތުން ހުށައަޅާފައިވާ ދިފާއީ ހެކިންގެ ހެކިބަސް ނެގުމަށް ބޭއްވި އަޑުއެހުމެކެވެ. ސަބަބަކީ މި މައްސަލައިގައި 17 ފެބްރުއަރީ 2022 ގައި ބޭއްވި ދިފާއީ ހެކިބަސް ނެގުމުގެއަޑުއެހުމުގައިއެދެމީހުންގެ ފަރާތުން ހުށައެޅި ހެކިންގެ ހެކިބަސް ނެގިފައިނުވާތީއެވެ.

ސިމާހު މޫސާ:

ސިމާހު މޫސާގެ ދިފާއީ ހެއްކެއްގެ ގޮތުގައި ފުރަތަމަ ހާޒިރުކުރީ އިބްރާހިމް ޝައިބާންއެވެ. އެގޮތުން ސިމާހުގެ ދިފާއީ ވަކީލު ހަމްޒާ ލަތީފް ކުރެއްވި ސުވާލުތަކަށް ޖަވާބުދެމުން އޭނާ ބުނެފައިވާ ގޮތުގައި ސިމާހުއަކީ އޭނާގެ ގާތް އެކުވެރިއެކެވެ. އަދި އަނަސްގެ މަރުގެ ޙާދިސާ ހިނގިއިރު، އޭނާއާއި ސިމާހުއާ އުޅުނީ އެއްކޮށްކަމަށް ޝައިބާން ބުންޏެވެ. އެރޭ މެންދަން ވަންދެން އެމީހުން އުޅުނީ އެކުގައިކަމަށް ޝައިބާން ބުންޏެވެ.

އަނަސް މަރާލާފައިވަނީ، 2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެ ރޭ ލިޓަސް ގަރާޖް ތެރޭ ވަޅިން ހަމަލާދީގެންނެވެ. 

ހެކިވެރިޔާ ބުނެފައިވާ ގޮތުގައި އެރޭ އެމީހުން ތިބީ ފިލުމު ބަލާށެވެ. ފިލުމު ބަލަން ތިބި ގޭގައި އިތުރު ދެ މީހަކުވެސް ތިބިކަމަށް އެ ހެކިވެރިޔާ ބުންޏެވެ. އެއީ އެ ގޭގައި ސިމާހުއާއެކު އުޅެމުންދިޔަ ދެމީހުންކަމަށް ހެކިވެރިޔާ ބުންޏެވެ.

ހެކިވެރިޔާ އާއި ދައުލަތުން ކުރި ސުވާލުތަކަށް ޖަވާބުދެމުން އޭނާ ބުނެފައިވާ ގޮތުގައި އެރޭ ބެލީ ކޮން ފިލުމުތަކެއްކަން އޭނާ ހަނދާނެއް ނެތެވެ.

ސިމާހު މޫސާގެ ފަރާތުން ދެން ހުށައެޅި 2 ހެކިން ތިބީ މާފުށީ ޖަލުގައެވެ. ނަމަވެސް އެ ދެ ހެކިންގެ ހެކިބަސް ނެގޭނެ އިންތިޒާމު ހަމަޖެހިފައި ނުވާތީ، އެ ހެކިންގެ ހެކިބަސް ނެގުން އެހެން ދުވަހަކަށް ވަނީ ފަސް ކުރައްވާފައެވެ.

ޖުނައިޙް އަބްދުﷲ:

ޖުނައިހުގެ ދިފާއީ ހެއްކެއްގެ ގޮތުގައި ފުރަތަމަ ހާޒިރުކުރީ ޝައްމާހު އަބްދުލް ރަޝީދުއެވެ. ޖުނައިހުގެ ވަކީލު އާދަމް އާސިފު ކުރެއްވި ސުވާލުތަކަށް ޖަވާބުދެމުން އޭނާ ބުނެފައިވާ ގޮތުގައި ޖުނައިހުއަކީ އޭނާ ދަންނަ އެކުވެރިއެއް ކަމަށެވެ.

ޖުލައި މަހުގެ 31 ވަނަ ދުވަހުގެ ރޭ ޖުނައިހު އާއި ދިމާވި ކަމަށާއި، އެރޭ އެމީހުން އުޅުނީ ރަށުގައި އެކުގައިކަމަށް އޭނާ ބުންޏެވެ. އެރޭ އެމީހުން ދިޔައީ ރަށު ކެފޭއަކަށް ކާންކަމަށްވެސް އޭނާ ބުންޏެވެ. އެރޭ ކާން ތިއްބައި ޖުނައިހުގެ މަންމަ ގުޅާތީ އޭނާ ދިޔައީކަމަށްވެސް ހެކިވެރިޔާ ބުންޏެވެ.

އަނަސްގެ މަރުގެ ޚަަބަރު ލިބުނުއިރުވެސް ޖުނައިހު ހުރީ ރަށުގައިކަމަށް ހެކިބަސް ދެމުން އޭނާ ވަނީ ބުނެފައެވެ. އޭނާ ބުނެފައިވާ ގޮތުން އަނަސްގެ މަރުގެ ޚަބަރު ލިބިގެންދިޔައީ ސޯޝަލް މީޑިއާއިންނެވެ.

ހެކިވެރިޔާ ބުނެފައިވާ ގޮތުގައި ޖުނައިހު މާލެ ދިޔައީ އެ ޙާދިސާ ހިނގުމުގެ ފަހުންނެވެ.

ދެން ހާޒިރުކުރި ހެކިވެރިޔާ އިސްމާއިލް ރަޝީދުވެސް ވަނީ ޖުނައިހުއަކީ އޭނާގެ އެކުވެރިއެއް ކަމަށާއި، އެއީ އެއް ރަށެއްގެ އެއް އަވަށެއްގެ ބައެއްކަމަށް ބުނެފައެވެ. އޭނާ ބުނި ގޮތުން 31 ޖުލައި ވަނަ ދުވަހުގެ ރޭ އެމީހުން އުޅުނީ އެކުގައެވެ. އޭނާވެސް ވަނީ އެރޭ ކާން ދިޔަ ކަމަށް ބުނެ ފުރަތަމަ ހެކިވެރިޔާ ދެއްކި ވާހަކަ ތަކުރާރުކޮށްފައެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.