ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި ޗެލްސީ އާއި ރެއާލް މެޑްރިޑް ބައްދަލުކުރާ ދެވަނަ މެޗުގައި ޗެލްސީގެ ރޮމެލޫ ލުކާކޫ ނުފެންނާނެއެވެ.

މި މެޗު ކުޅުމަށް ޗެލްސީ ޓީމު ހޯމަ ދުވަހު ސްޕެއިންއަށް ފުރާއިރު، ލުކާކޫ މި ދަތުރުގައި ބައިވެރި ނުވާނެއެވެ. ދެވަނަ ކުއާޓާ ފައިނަލް މެޗު ލުކާކޫއަށް ގެއްލުނީ އަނިޔާގެ ސަބަބުންނެވެ. ޕްރިމިއަރ ލީގުގައި ސައުތެމްޕްޓަން އާއި ވާދަކޮށް 6-0 ން ޗެލްސީ މޮޅުވި މެޗުގައި ވެސް އަނިޔާގެ ސަބަބުން ލުކާކޫ ނުކުޅެއެވެ.

ލުކާކޫގެ އިތުރުން ހުޑްސަން އޮޑޮއީވެސް އަނިޔާގެ ސަބަބުން މި މެޗުގައި ނުކުޅޭނެއެވެ. ނަމަވެސް ޗެލްސީއަށް އޮތް ހިތްހަމަޖެހުމަކީ ކެޕްޓަން ސީޒާ އަޒްޕިލިކޭޓާ މި މެޗަށް ފިޓް ވާނެތީއެވެ. ކޮވިޑަށް ޕޮޒިޓިވް ވުމުގެ ސަބަބުން ސައުތެމްޕްޓަން މެޗުގައި އޭނާވެސް ނުކުޅެއެވެ. ނަމަވެސް ރެއާލްގެ މެޗަށް ޓީމު ފުރުމުގެ ކުރިން އޭނާ ވަނީ ނެގެޓިވް ނަތީޖާއަކާއެކު ޓީމާއި ގުޅިފައެވެ.

ޗެމްޕިއަންސް ލީގު ކުއާޓާ ފައިނަލުގެ ފުރަތަމަ މެޗުގައި ރެއާލް އަތުން 3-1 ން ޗެލްސީ ބަލިވީ އަމިއްލަ ދަނޑުގައި ކުޅެގެންނެވެ.