އިނގިރޭސި ޕްރިމިއަރ ލީގު ތާވަލުގެ ފުލުގައި އޮތް ނޮރިޗް ސިޓީ ބާންލީ އާއި ބައްދަލުކުރި މެޗުން މޮޅުވެއްޖެއެވެ.

ނޮރިޗްގެ ދަނޑުގައި އާދީއްތަ ދުވަހުގެ ރޭ ކުޅުނު މިމެޗު އެޓީމުން ކާމިޔާބު ކުރީ 2-0 ންނެވެ. ރެލިގޭޝަން ޒޯނުން ސަލާމަތްވުމަށް މަސައްކަތް ކުރަމުން އަންނަ ނޮރިޗްއަށް މިއީ މުހިންމު މޮޅެކެވެ. މި މެޗު ފަށައިގެން މާގިނައިރެއް ނުވަނީސް ނޮރިޗްއިން ލަނޑެއް ޖަހާ ލީޑު ނެގިއެވެ. ފުރަތަމަ ހާފުގެ 9 ވަނަ މިނެޓުގައި ނޮރިޗްއަށް ލީޑު ނަގައިދިނީ ލީސް މެލޯއެވެ. މެޗު ނިމެން ހަތަރު މިނެޓަށްވެފައި ވަނިކޮށް އެޓީމަށް ލީޑު ފުޅާކޮށްދިނީ ޕުއްކީއެވެ.

މި މޮޅާއެކުވެސް ނޮރިޗް އޮތީ ތާވަލުގެ ފުލުގައެވެ. ލީގުގައި 31 މެޗު ކުޅެގެން އެޓީމަށް ލިބުނީ 21 ޕޮއިންޓެވެ. ބާންލީ މެޗުން ބަލިވިއިރު 30 މެޗު ކުޅެގެން ލިބުނު 24 ޕޮއިންޓާއެކު އެޓީމު އޮތީ ތާވަލުގެ 18 ވަނައިގައެވެ.

ލީގުގައި ކުޅުނު އެހެން މެޗުތަކަށް ބަލާއިރު ތާވަލުގެ ހަވަނައިގައި އޮތް ވެސްޓްހޭމް ޔުނައިޓެޑާއި ބްރެންޓްފޯޑް ބައްދަލުކުރި މެޗު ކާމިޔާބު ކުރީ ބްރެންޓްފޯޑުންނެވެ. ބްރެންޓްފޯޑުން މެޗު ކާމިޔާބުކުރީ 2-0 ންނެވެ. މެޗުގެ ދެލަނޑުވެސް އެޓީމުން ކާމިޔާބު ކުރީ ދެވަނަ ހާފުގައެވެ. ލެސްޓަރ ސިޓީއިން ކްރިސްޓަލް ޕެލެސްގެ މައްޗަށް ކުރި ހޯދީ 2-1 ންނެވެ.