އިންޑޯ ޕްރެކްޓިސްއެއް ނުކޮށް، 12 ފަހަރުގެ ޗެމްޕިއަން އަތުން ބަލިވުމަކީ މައްސަލައެއް ނޫން: މަހްލޫފް

ރާއްޖޭގެ ގައުމީ ފުޓްސަލް ޓީމު ޕްރެކްޓިސް ކުރާނެ އިންޑޯއެއް ނެތި ފުރަތަމަ ކޮލިފިކޭޝަންގައި 12 ފަހަރުގެ ޗެމްޕިއަން އަތުން ބަލިވުމަކީ މައްސަލައެއް ނޫންކަމަށް ކުޅިވަރާއި ބެހޭ ވަޒީރު އަހްމަދު މަހްލޫފް ވިދާޅުވެއްޖެއެވެ.

އޭޝިއަން ފުޓްސަލް ކަޕް ކޮލިފައިންގެ ފުރަތަމަ މެޗުގައި އާދީއްތަ ދުވަހުގެ ހަވީރު އީރާނާއި ވާދަކޮށް ރާއްޖެ ބަލިވީ 17-0 ގެ ތަފާތު ބޮޑު ނަތީޖާއަކުންނެވެ. މިއާއެކު ބައެއް ފަރާތްތަކުގެ ފާޑުކިޔުން ދިވެހި ޓީމަށް އަމާޒުވި ނަމަވެސް، ގިނަ ބަޔަކު ދިވެހި ޓީމަށް ހިތްވަރު ދިނެވެ.

ފުޓްސަލްގައި ދުނިޔޭގެ ރޭންކިންގެ 6 ވަނައިގައި އޮތް އީރާންއަކީ އޭޝިޔާގެ ފުޓްސަލް މުބާރާތުގެ އެންމެ ފަހުގެ ޗެމްޕިއަންއެވެ. މި މުބާރާތް 15 ފަހަރު ބާއްވާފައިވާއިރު، އޭގެ ތެރެއިން 12 މުބާރާތް އީރާނުން ކާމިޔާބު ކޮށްފައިވެއެވެ. މުބާރާތް ކާމިޔާބު ނުކުރެވުނު ތިން ފަހަރުގެ ތެރެއިން ދެފަހަރު އީރާނުން ވަނީ މުބާރާތުގެ ތިންވަނަ ހޯދާފައެވެ. އަދި އެއްފަހަރު މުބާރާތުގެ ރަނަރއަޕްކަން ހޯދިއެވެ.

ކޮލިފައިންގައި ރާއްޖެ ދެން ބައްދަލުކުރަން ޖެހޭނީ ކިރިގިސްތާންއާއެވެ. މި މެޗު އޮންނާނީ މާދަމާ ރޭ ރާއްޖެ ގަޑިން 19:00 ގައެވެ. އޭގެފަހުން ކޮލިފައިންގެ ފަހު މެޗުގައި އަންގާރަ ދުވަހުގެ ހަވީރު 16:00 ގައި ރާއްޖެ ބައްދަލުކުރާނީ ތުރުކުމެނިސްތާނާއެވެ.

މިއީ ރާއްޖެއިން ފުޓްސަލް އޭޝިއަން ކަޕްގެ ކޮލިފައިންގައި ވާދަކުރާ ފުރަތަމަ ފަހަރެވެ.

މި މެޗާއި ގުޅޭ ގޮތުން ފޭސްބުކްގައި މިނިސްޓަރު މަހުލޫފް ކުރެއްވި ޓްވީޓެއްގައި ވިދާޅުވީ ޕްރެކްޓިސް ކުރާނެ އިންޑޯއެއް ނެތި ފުރަތަމަ ކޮލިފިކޭޝަންގައި 12 ފަހަރުގެ ޗެމްޕިއަން އަތުން ބަލިވުމަކީ މައްސަލައެއްނޫން ކަމަށެވެ. އަދި ފުޓުބޯޅަ އާއި ފުޓްސަލްގެ ތަފާތު ނޭންގޭ ބަޔަކު ކުރާ މަލާމާތަށް ނުބަލާ މަސައްކަތް ކުރީމައި ރަނގަޅުވާނެކަމަށް މިނިސްޓަރު ވިދާޅުވިއެވެ. މީގެ އިތުރުން ރާއްޖޭގައި ފުޓްސަލް އިންޑޯއެއް ތަރައްގީކުރުން އަވަސްކޮށްދޭން މަސައްކަތް ކުރައްވާނެ ކަމުގެ އުފާވެރި ޚަބަރު މިނިސްޓަރު ދެއްވިއެވެ.