މި ފަހަކަށް އައިސް ޕާޓީތަކަށް ވަނުމަށް ހުށަހަޅާ ފޯމު އެމީހަކަށް ނޭނގި ހުށަހަޅާ މައްސަލަތައް ވަނީ އިތުރުވެފައެވެ. އެގޮތުން އެކި ޕާޓީތަކުން ފޯމު ހުށަހަޅާއިރު، އެކަމާގުޅިގެން އާންމު ރައްޔިތުންގެ ފަރާތުން ޝަކުވާ އަންނަ މިންވަރުވެސް ވަނީ އިތުރުވެފައެވެ.

މި މުޅި މައްސަލައަށް ހައްލެއް ހޯދުމަށް އިލެކްޝަންސް ކޮމިޝަނުގެ މަސައްކަތްތަކަށް ބަދަލުތަކެއް ގެނައުމުގެ މަސައްކަތް އީސީން ގެންދަނީ ކުރަމުންނެވެ. އެގޮތުން ޕާޓީތަކަށް ވަނުމަށް ފޯމު ހުށަހަޅާ ފަރާތްތަކުގެ ނަންތައް ކޮމިޝަނުގެ ވެބްސައިޓުގައި އާންމު ކުރުމަށް މިހާރު ކޮމިޝަނުން ވަނީ ނިންމާފައެވެ.

އެހިސާބުން އެއްވެސް މީހެއްގެ ޝަކުވާއެއް ލިބިއްޖެނަމަ، އެ މައްސަލައެއް ބަލައި، އެކަމާގުޅިގެން އަޅަންޖެހޭ ފިޔަވަޅުތައް އަޅާނެކަމަށް ރާއްޖެއެމްވީއާ ވާހަކަ ދައްކަވަމުން އެ ކޮމިޝަނުގެ ރައީސް ފުވާދު ތައުފީގު ވިދާޅުވިއެވެ.

ފުވާދު ވިދާޅުވާ ގޮތުގައި, މިހާރުވެސް މި މައްސަލައާ ގުޅޭގޮތުން ސިޔާސީ ޕާޓީތަކާ އީސީން ގެންދަނީ މަޝްވަރާ ކުރަމުންނެވެ.

ގިނަ ފަހަރު މި މައްސަލައާ ގުޅިގެން ސިޔާސީ ޕާޓީތައް ޒިންމާދާރު ކުރުވުމުގެ މަސައްކަތުގައި ޕާޓީތަކުން ލިބޭ ޖަވާބަކީ މިއީ ޕާޓީގެ ސަޕޯޓަރުން ފޮނުވާ ފޯމުތަކެއް ކަމާއި، އެކަށީގެންވާ ގޮތެއްގައި ފޯމުތައް ޗެކް ނުކުރެވޭކަމަށެވެ.

އެހެންނަމަވެސް، އެއަށްވުރެ ބޮޑަށް ސިޔާސީ ޕާޓީތައް ޒިންމާދާރުވާން ޖެހޭކަމަށް ފުވާދު ވިދާޅުވިއެވެ.

މި ކަމަކީ ސިޔާސީ ޕާޓީތަކުން އެކަމުގެ ޒިންމާ ނަގަންޖެހޭ ކަމެއްކަމަށް ފުވާދު ވިދާޅުވިއެވެ. ސަބަބަކީ ފޯމުތައް ހުށައަޅަނީ ޕާޓީތަކުން ޗެކްކޮށް، ޕާޓީގެ ފަރާތުން އެއީ ސައްހަ ފޯމުކަމަށް ސޮއި ކުރުމަށްފަހު ކަމަށްވާތީއެވެ.

ފުވާދު އެ ވިދާޅުވާ ފަދައިން، އިލެކްޝަންސް ކޮމިޝަނަށް ޕާޓީން ހުށައަޅާ ކޮންމެ ފޯމަކަށް ޕާޓީން ޒިންމާވާނެކަމަށް ބަޔާންކޮށް، ފޯމުގައި ދެ ހެކިވެރިއަކު ސޮއިކޮށްފައިވެސް އޮވެއެވެ.

އިލެކްޝަންސް ކޮމިޝަނުން މިހާރު ނިންމާފައިވަނީ ޕާޓީތަކުގައި ރަޖިސްޓްރީވެފައިވާ ހުރިހާ މެމްބަރުންގެ ނަންތައް މި އަހަރުގެ އޯގަސްޓު މަހުގެ ތެރޭގައި އާންމު ކުރުމަށެވެ. އެގޮތުން ނަމާއެކު، އެމީހެއްގެ އައިޑީ ކާޑުގެ 3 ޑިޖިޓް ހިމެނިފައިވާނެއެވެ. މިއީވެސް، އެމީހަކަށް ނޭނގި ޕާޓީ ބަދަލުކުރުމުގެ މައްސަލައަށް ހައްލެއް ގެނައުމަށް އީސީން ނިންމާފައިވާ ނިންމުމެކެވެ.

ސިޔާސީ ޕާޓީތަކަށް ވަނުމަށްޓަކައި ފޯމު ފުރުމުގެ ކަންކަން ކުރިއަށް ގެންދަނީ ސިޔާސީ ޕާޓީތަކުންނެވެ. އެ ފޯމު ކޮމިޝަނަށް ހުށަހަޅަނީ އެ ސިޔާސީ ޕާޓީއަކުންނެވެ.

ސިޔާސީ ޕާޓީތަކުގެ މެމްބަރަކަށް ވުމަށް އެދި ހުށަހަޅާ ފޯމަށް ބަލާއިރު، ޕާޓީތަކުން ހުށަހަޅާ ކޮންމެ ފޯމަކަށް އެ ޕާޓީން ޒިންމާވާނެކަމަށް ބަޔާން ކޮށްފައިވެއެވެ. މާނައަކީ، ސައްހަނޫން ފޯމު ހުށައެޅި ނަމަވެސް، ނުވަތަ އޮޅުވާލައިގެން މީހެއްގެ ނަމުގައި ފޯމު ހުށައެޅި ނަމަވެސް، އެކަމުގެ ޒިންމާއިން އެ ޕާޓީތަކަށްވެސް ރެކެވޭނެ ގޮތެއް ނެތެވެ.

އެހިސާބުން ދެން އުފެދޭ ސުވާލަކީ އެކަމުގައި އީސީގެ ޒިންމާއަކީ ކޮބައިތޯއެވެ؟ އާންމު ރައްޔިތުމީހާ އުފައްދާ ސުވާލަކީ އީސީއަށް ހުށައަޅާ ފޯމުތަކުގެ މައުލޫމާތުގެ ސައްހަކަން އީސީން ކަށަވަރުނުކުރަނީ ކީއްވެތޯއެވެ.

މިއީ އަބަދުވެސް ހިނގާ ކަމެއް ނަމަވެސް، ޕާޓީތަކަށް ވަނުމަށް އެދި ހުށަހަޅާ ފޯމުގައި އެންމެ ފުރަތަމަ ފިންގަރ ޕްރިންޓް ޖެހުމަށް ލާޒިމުކުރި ހިސާބުން މި މައްސަލަ ކޮންމެވެސް ވަރަކަށް މަދުވެގެން ދިޔައެވެ.

އޭރު ފިންގަރ ޕްރިންޓާ ގުޅިގެން މައްސަލައެއް ދިމާވެއްޖެނަމަ ފުލުހުންގެ އެހީތެރިކަންވެސް އީސީން ގެންދިޔައީ ހޯދަމުންނެވެ. އެހެންނަމަވެސް، ފުލުހުންގެ އަތުގައިވެސް ހުރިހާ އެންމެންގެ ފިންގަރ ޕްރިންޓެއް ނުހުރެއެވެ.

ފުލުހުންނެކޭ އެއްގޮތަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން އަދި އިލެކްޝަންސް ކޮމިޝަނުގައިވެސް އެކަށީގެންވާ ފިންގަރ ޕްރިންޓް ޑޭޓާބޭސްއެއް ނުހުރެއެވެ. ވުމާއެކު، މައްސަލައެއް އުފެދިއްޖެ ހާލަތެއްގައި ކަމެއް ސާބިތު ކުރުމަށް އެކަށީގެންވާ ނިޒާމެއް ރާއްޖޭގައި ގާއިމުވެފައެއް ނެތެވެ.

އެކަމާ ގުޅޭގޮތުން ފުވާދު ތައުފީގު ވިދާޅުވީ، އީސީން މޯލްޑިވްސް އިމިގްރޭޝަނާ ވާހަކަ ދައްކައިގެން، އެކަމާ ގުޅޭ މަޝްވަރާތަކެއްވެސް ކުރެވުނު ކަމަށެވެ.

ފުވާދު ވިދާޅުވާގޮތުގައި ފިންގަރ ޕްރިންޓް ވެރިފިކޭޝަން ހެދުމަށްފަހު ފޯމުތައް ޕްރޮސެސް ކުރުމަށް އެކަށީގެންވާ ނިޒާމެއް ގާއިމުކުރުމަކީ، އުނދަގޫ, އަދި ގޮންޖެހުންބޮޑު ކަމަކަށް ވާނެއެވެ.

މި މައްސަލައާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން އިލެކްޝަންސް ކޮމިޝަނުގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ، ފިންގަރ ޕްރިންޓް ވެރިފިކޭޝަންގެ ގާބިލުކަން އެ ކޮމިޝަނުގައި ނެތްކަމަށެވެ. ވުމާއެކު، ހުށަހެޅޭ ފޯމުގައި ޖަހާފައިވާ ފިންގަރ ޕްރިންޓަކީ "ރީޑަބަލް" އަދި ސާފު ފިންގަރ ޕްރިންޓެއް ނަމަ، އަދި އެ ފޯމަށް ޒިންމާވެ ފޯމު ހުށައެޅި ސިޔާސީ ޕާޓީން އެކަމުގެ ޔަގީންކަންދީ ހެކިވެރިން ސޮއިކޮށްފައިވާނަމަ، އީސީން ބަލަނީ އެއީ ސައްހަ ފޯމެއް ކަމަށެވެ.

އެހާހިސާބުން އީސީން ބަލަނީ އެ ފިންގަރ ޕްރިންޓަކީ ތަހުގީގީ މަރުހަލާއަކަށް ދާން ޖެހިއްޖެ ހާލަތުގައި ބޭނުންކުރެވޭ ފަދަ ފިންގަރ ޕްރިންޓެއްތޯއެވެ.

ފިންގަރ ޕްރިންޓް ވެރިފިކޭޝަން ނެތްނަމަވެސް، އީސީއަށް ހުށަހަޅާ ފޯމުގައިވާ މައުލޫމާތުތަކަކީ ސައްހަ މައުލޫމާތުތޯ އެ ކޮމިޝަނުން ޗެކް ކުރެއެވެ. މާނައަކީ މީހާގެ ނަމާއި އައިޑީކާޑު ދިމާވޭތޯއާއި، އޭނާގެ މައުލޫމާތުތައް ސައްހަތޯ އީސީން ޗެކްކުރެއެވެ. އެއަށްފަހު ސައްހަ ފޯމެއް ނަމަ، އެ ފޯމެއް ޕްރޮސެސްކުރަނީ ސިޔާސީ ޕާޓީން ދީފައިވާ ޔަގީންކަމުގެ މައްޗަށެވެ. ދެން އެ ފޯމު ސެޓު ހުށައަޅާ ޕާޓީއެއް އެކަމުގެ ޒިންމާއިން ބަރީއަވެވޭކަށް ހަގީގަތުގައި ނޯންނާނެއެވެ.

މީގެ ކުރިން އީސީން ގެންދިޔައީ ސައްހަ ނޫން ފޯމު ހުށަހަޅާނަމަ ކޮންމެ ފޯމަކަށް 5000 ރުފިޔާގެ ޖޫރިމަނާއެއްގެ މަގުން އެ ސިޔާސީ ޕާޓީއެއް ޖޫރިމަނާވެސް ކުރަމުންނެވެ. ނަމަވެސް އެެކަންވެސް ވަކި ހިސާބަކުން ހުއްޓާލާފައިވަނީ ސިޔާސީ ޕާޓީތަކަށް އުފުލަންޖެހޭ ބުރަ ކުޑަކުރުމަށެވެ.

މިހާރު އީސީން އެފަދަ ވިސްނުމެއް ގެންގުޅޭކަން ދާދި ފަހުން އެ ކޮމިޝަނުގެ ރައީސް ވަނީ ހާމަ ކުރައްވާފައެވެ. އެއީ ގާނޫނުން އީސީއަށް ލިބިދޭ ބާރެއްވެސްމެއެވެ.

ރާއްޖެއެމްވީއަށް އެނގިފައިވާ ގޮތުގައި ކޮންމެ އަހަރެއްގެވެސް ބަޖެޓު ފާސްކުރާ ދުވަސްކޮޅާ ދިމާކޮށް ޕާޓީތަކަށް މީހުން ވެއްދުން އިތުރުވެގެން ދެއެވެ. އަތޮޅު ތެރެއިންވެސް އެތައް ފޯމުސެޓުތަކެއް ފޮނުވައެވެ.

ގާނޫނު ބުނާ ގޮތުން 10،000 މެމްބަރުން ހަމަވާ ޕާޓީތަކަށް ދައުލަތުގެ ބަޖެޓުން ފައިސާ ދޭން އެބަޖެހެއެވެ. ވުމާއެކު، ރަށްރަށުންވެސް ފޯމުސެޓުތައް ގެނެސް އީސީއަށް ހުށަހަޅަނީއެވެ. އަދި މައްސަލައެއް ޖެހުމުން, އެއީ ރަށްރަށުން ފޮނުވި ފޯމުސެޓުތަކަށްވުމާއެކު، އެކަށީގެންވާ ގޮތެއްގައި ޗެކް ނުކުރެވުނީކަމަށްވެސް ބައެއް ޕާޓީތަކުން ބުނެއެވެ. ޕާޓީން ޒިންމާވާނެކަމަށް ބަޔާންކޮށް ހެކިވެރިން ކުރާ ސޮޔަކީވެސް އެއްވެސް އެއްޗަކަށް ނުވަނީއެވެ.

އީސީން މިހާރު ވަނީ ސިޔާސީ ޕާޓީތަކަށް ދޫކުރާ ފައިސާ ބަހާނެ ގޮތް ބަދަލު ކުރުމަށް ގާނޫނަށް ބަދަލުތަކެއް ގެނައުމަށްވެސް ހުށަހަޅާފައެވެ.

ހަގީގަތުގައި ސިޔާސީ ޕާޓީތަކުން މިހާރަށްވުރެ ޒިންމާދާރުވާން ޖެހެއެވެ. ޕާޓީތަކުން ހުށަހަޅާ ފޯމުތަކަށް ޒިންމާވާން ޖެހެއެވެ. ސިޔާސީ ޕާޓީތަކަށް މީހުން ވެއްދުމުގެ ޕްރޮސީޖަރ އޮންނަ ގޮތް ކޮންމެ ޕާޓީއަކަށްވެސް އެނގޭނެއެވެ. ވީއިރު، ރައްޔިތުންގެ މެދުގައި މިކަން އޮތްގޮތް އޮޅޭގޮތަށް, ކޮމިޝަނުން މެމްބަރުން "ވަގަށް ނަގާކަމަށް" ބުނަމުން ދިއުމަކީ އެންމެ ޒިންމާދާރު ކަމެއް ނޫނެވެ. އެކަމުގެ ސަބަބުން ކޮމިޝަނުގެ މުވައްޒަފުންނަށްވެސް އެކި ކަހަލަ ފުރައްސާރައާ ކުރިމަތިވާކަން ރާއްޖެއެމްވީއަށް ވަނީ މައުލޫމާތު ލިބިފައެވެ.