ޕާކިސްތާނުގެ ބޮޑުވަޒީރު އިމްރާން ޚާން އެގައުމުގެ ގާނޫނު ހަދާ މަޖިލިސް އުވާލެއްވީ ގާނޫނާ ޚިލާފަށް ކަމަށް އެގައުމުގެ ސުޕްރީމް ކޯޓުން ނިންމައިފިއެވެ.
ބުރާސްފަތި ދުވަހު ސުޕްރީމް ކޯޓުން ވަނީ މަޖިލިސް އުވާލާފައިވަނީ ގާނޫނާ ޚިލާފަށްކަމަށް ނިންމައި, ދެ ދުވަސްތެރޭގައި މަޖިލިސް އަލުން ހުޅުވުމަށް މެމްބަރުންނަށް އަންގާފައެވެ.
ޕާކިސްތަނުގެ ގާނޫނު ހަދާ މަޖިލިސް އުވާލާފައި ވަނީ ބޮޑުވަޒީރު އިމްރާން ޚާންގެ އިތުބާރުނެތްކަމުގެ ވޯޓު ނަގަންއުޅެ އެކަން މަޖިލީހުން ބޭރުކޮށްލި ދުވަސްކަމަށްވާ މިހަފްތާގެ އާދީއަތަ ދުވަހުއެވެ..މަޖިލީހުގެ މަސައްކަތްތައް އަލުން ފަށައިފިނަމަ ބޮޑުވަޒީރުގެ އިތުބާރުނެތްކަމުގެ ވޯޓުނެގުމުގެ ކަންތައް ކުރިއަށްގެންދަން ޖެހޭނެއެވެ.
މަޖިލީހުގެ އަޣުލަބިއްޔަތު އިމްރާން ޚާނަށް މިހާރު ގެއްލިފައިވާއިރު، އިތުބާރުނެތްކަމުގެ ވޯޓު ނަގައިފިނަމަ މަގާމު ގެއްލުން ވަރަށްގާތެވެ.
ސުޕްރީމްކޯޓުން ވަނީ މަޖިލީހުގައި އިމްރާން ޚާންގެ އިތުބާރުނެތްކަމުގެ ވޯޓުނަގަން ފުރުސަތު ނުދީ އެމައްސަލަ ބޭރުކޮށްލާފައި ވަނީވެސް ގާނޫނާ ޚިލާފަށްކަމަށް ބުނެފައެވެ. މަޖިލީހުގެ ނައިބު ރައީސްގެ މަގާމުގައި ހުންނެވި އިމްރާން ޚާންގެ ޕާޓީގެ މެމްބަރު ވަނީ, އޭނާގެ އިތުބާރު ނެތްކަމުުގެ ވޯޓުނަގަން މަސައްކަތްކުރަނީ ބޭރުގެ ނުފޫޒުން ކަމަށާއި, އެއީ ގާނޫނާ ޚިލާފުކަމެއް ކަމަށް ބުނެ މައްސަލަ ބޭރުކޮށްލާފައެވެ.
އިމްރާން ޚާން ގެ ގޮވާލެއްވުމަށް ޕާކިސްތާންގެ މަޖިލިސް އުވާލެވުނީ އޭގެ ފަހުންނެވެ. އަލުން އިންތިޚާބް ބޭއްވުމަށްވެސް އޭނާވަނީ ގޮވާލައްވާފައެވެ.
ޕާކިސްތާނުގެ ސިޔާސީ މަސްރަހު ހޫނުވެފައިވާއިރު މީގެ ސަބަބުން އެގައުމަށް އިގުތިސާދީ އަދި އިޖުތިމާއީ ގޮންޖެހުންތަކާ ކުރިމަތިލާން ވަނީ ޖެހިފައެވެ.މިގޮތުން ގައުމުގެ ފޮރިން ރިޒަރވް ދަށްވެ ބުރާސްފަތިދުވަހުވެސް ޕާކިސްތާން ފައިސާގެ އަގު ވަރަށް ބޮޑަށް ދަށަށް ވެއްޓިފައިވާކަމަށް ރިޕޯޓުތައް ބުނެއެވެ.
