ބްރެޒިލްއިން ގާޑިއޯލާ ހޯދުމުގެ މަސައްކަތް ފަށައިފި
7 އެޕްރީލު 2022 | ބުރާސްފަތި 16:32ބްރެޒިލްއިން މަސައްކަތް ކުރަނީ މިއަހަރުގެ ވޯލްޑް ކަޕްއަށްފަހު ގާޑިއޯލާ ހޯދުމަށް
މެންޗެސްޓާ ސިޓީގެ ކޯޗު ޕެޕް ގާޑިއޯލާ
ދުނިޔޭގެ އެންމެ ގިނަ ވޯލްޑް ކަޕް ކާމިޔާބުކޮށްފައިވާ ބްރެޒިލްއިން މެންޗެސްޓަރ ސިޓީގެ ކޯޗުކަން ކުރަމުން އަންނަ ޕެޕް ގާޑިއޯލާ ހޯދުމުގެ މަސައްކަތް ފަށައިފިއެވެ.
ބްރެޒިލްގެ ކޯޗުކަމުގައި މިވަގުތު ހުރީ ޓިޓޭއެވެ. މިއަހަރުގެ ނޮވެމްބަރ އަދި ޑިސެމްބަރ މަހު ގަތަރުގައި އޮންނަ ވޯލްޑް ކަޕް 2022 އަށްފަހު ޓިޓޭ ބްރެޒިލްގެ ކޯޗުކަމުން ދުރުވާނެ ކަމަށް ރިޕޯޓުތައް ބުނެއެވެ. އެހެންކަމުން ބްރެޒިލްގެ ފުޓްބޯޅަ ކޮންފެޑެރޭޝަނުން ވަނީ ގާޑިއޯލާ ހޯދުމުގެ މަސައްކަތް ފަށާފައެވެ.
ބްރެޒިލްގެ ސަމާލުކަން މިހާރު އެންމެ ބޮޑަށް ހުއްޓިފައި އޮތީ މިއަހަރުގެ ވޯލްޑް ކަޕް ކާމިޔާބު ކުރުމަށެވެ. މިހާ ތަނަށް ބްރެޒިލްއިން ވަނީ ފަސް ވޯލްޑް ކަޕް ކާމިޔާބު ކޮށްފައެވެ. މިއީ އެއް ގައުމަކުން އެންމެ ގިނަ ފަހަރު ވޯލްޑް ކަޕް ކާމިޔާބުކުރި އަދަދެވެ.
ވޯލްޑް ކަޕްއަށް ފަހު ޓިޓޭ ކޯޗުކަމުން ވަކިވާނެކަމަށް ރިޕޯޓުތައް ބުނާއިރު ބްރެޒިލްގެ ފުޓްބޯޅަ ކޮންފެޑަރޭޝަނުން އެންމެ ގަޔާވާ ކޯޗަކަށް ހުރީ ގާޑިއޯލާއެވެ. ބްރެޒިލްއިން މިހާރު ވަނީ ގާޑިއޯލާގެ ބޭބެ އަދި އެޖެންޓު ޕެރޭ އާއި މަޝްވަރާތައް ކުރަން ފަށާފައެވެ.
ބްރެޒިލްއިން މަސައްކަތް ކުރަނީ މިއަހަރުގެ ވޯލްޑް ކަޕަށްފަހު 2026 ގެ ވޯލްޑް ކަޕާއި ހަމައަށް ގާޑިއޯލާއާއެކު އެއްބަސްވުމެއް ހެދުމަށެވެ. މެންޗެސްޓަރ ސިޓީއާއެކު ގާޑިއޯލާ ހަދާފައިވާ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުއެވެ.
