ކުޑައްޓޭ ރޭޑިއަންޓަށް ކުޅެން އެއްބަސްވެއްޖެ

ނިއުރޭޑިއަންޓް ސަސްޕެންޑްކޮށްފައިވާތީ އެކްލަބްގެ ސަޕޯޓަރުން އެއްތަންކުރުމަށް އުފެއްދި ރޭޑިއަންޓަށް ކުޅެން މުޙައްމަދު ޝިފާން (ކުޑައްޓޭ) ސޮއިކޮށްފިއެވެ.

ނިއުރޭޑިއަންޓުން ކެރިއަރު ފަށާ, އެކްލަބްގައި ކާމިޔާބު ކެރިއަރެއް ހޭދަކުރި މިޑްފީލްޑަރ ވަނީ ތިންވަނަ ޑިވިޝަންގައި ރޭޑިއަންޓަށް ކުޅެން އެއްބަސްވެފައެވެ. ކުޑައްޓޭއަކީ ނިއުރޭޑިއަންޓް އޭއެފްސީކަޕް ސެމީފައިނަލަށް ދަތުރުކުރިއިރު މުހިއްމު ކުޅުންތެރިއެކެވެ. ސާފް ޗެމްޕިއަންޝިޕް 2008 ވަނަ އަހަރު ހޯދި ޓީމްގައިވެސް ކުޑައްޓޭގެ ދައުރު ބޮޑެވެ. ފަހުން އޭނާ ފެނުނީ ވިކްޓްރީންނެވެ. ކުޑައްޓޭއަކީ ނިއުގެ ނުލާއި ހުދުގެ ޖަރޒީން ގަލޮޅު ދަނޑަށް ނިކުމެ, ރާއްޖޭގެ އެންމެ މޮޅު މިޑްފީލްޑަރުންގެ ތެރެއިން ޖާގަ ހޯދި ކުޅުންތެރިއެކެވެ. ޑިފެންސިވް މިޑްފީލްޑަރެއްގެ އިތުރުން ކުޑައްޓޭއަކީ މޮޅު ޑިފެންޑަރެކެވެ. އެކަމަކު އޭނާ އަލުން ޖަރޒީ މިލަނީ ކުޅުން ހުއްޓާލައިގެން ހުރުމަށްފަހުއެވެ. ކުޑައްޓޭ ދެފަހަރެއްގެ މަތީން 9 އަހަރު ނިއުރޭޑިއަންޓަށް ކުޅެ, އެކްލަބްގެ ސަޕޯޓަރުންގެ ހިތްތަކުން ޖާގަ ހޯދިއެވެ.

ރޭޑިއަންޓުން ވަނީ ނިއުރޭޑިއަންޓާއެކު ކާމިޔާބު ހޯދި ކުޅުންތެރިޔާ އަދި ކޯޗު ސޮބާހު މުޙައްމަދު ކޯޗަކަށް ހަމަޖައްސާފައެވެ. އަދި ނިއުރޭޑިއަންޓްގެ ކުރީގެ ކެޕްޓަން އަހުމަދު މުޙައްމަދު (އައްމަޑޭ) ކުޅުންތެރިއެއްގެ ގޮތުގައާއި އެސިސްޓެންޓް ކޯޗުގެ ގޮތުގައި ހަމަޖައްސާފައެވެ. ނިއުރޭޑިއަންޓްގައި ކުޅުންތެރިންނަށް ދޭންޖެހޭ މުސާރައާއި, ޖޫރިމަނާ ހިމެނޭ ގޮތަށް ބޮޑު ދަރަންޏެއް އެބައޮތެވެ. އެހެންކަމުން އެކްލަބް އަބުރާ ގެނައުމަކީ އުނދަގޫ ކަމެކެވެ. ރޭޑިއަންޓަކީ ނިއުރޭޑިއަންޓް ނެތުމުގެ ފަޅުކަމަށް ކޮންމެސް ހައްލެއް ގެނައުމަށް ނިއުރޭޑިއަންޓްގެ ސަޕޯޓަރުންގެ ތެރެއިން ބަޔަކު އުފެއްދި ކްލަބެކެވެ.