މަޤާމުން އިސްތިއުފާ ދިނީ އަމިއްލަ ސަބަބުތަކަށްޓަކައި - ވިސާމް
މިއަދުގެ ސަރުކާރުން ތަރައްޤީއަށްޓަކައި ކުރައްވަމުން އަންނަ ކަންކަަމަށް ތައުރީފު ޙައްގު
މެލޭޝިޔާއަށް ދިވެހިރާއްޖެއިން ކަނޑައެޅުއްވި ސަފީރު ވިސާމް ޢަލީ
ސަފީރުކަމުގެ މަގާމުން އިސްތިއުފާ ދެއްވީ އަމިއްލަ ސަބަބުތަކަށްޓަކައި ކަމަށް ރާއްޖެއިން މެލޭޝިއާއަށް ކަނޑައެޅުއްވި ސަފީރު ވިސާމް އަލީ ވިދާޅުވެއްޖެއެވެ.
ވިސާމް އިސްތިއުފާ ދެއްވީ އަންގާރަ ދުވަހުއެވެ. އިސްތިއުފާއާއި ގުޅޭ ގޮތުން ކުރެއްވި ޓްވީޓެއްގައި ވިދާޅުވީ އެކަމަނާ ސަފީރުކަމުގެ މަޤާމުން އިސްތިއުފާދެއްވީ އަމިއްލަ ސަބަބުތަކަށްޓަކައި ކަމަށެވެ. އަދި މިއަދުގެ ސަރުކާރުން ތަރައްޤީއަށްޓަކައި ކުރައްވަމުން އަންނަ ކަންކަަމަށް ތައުރީފު ޙައްގު ކަމަށާއި، މި ފުރުޞަތުގައި ރައީސް އިބްރާހީމް މުހައްމަދު ޞާލިޙަށް ޝުކުރު ދަންނަވާ ކަމަށެވެ.
މެލޭޝިޔާގައި ހުންނަވާ ރާއްޖޭގެ ސަފީރު ވިސާމް އަލީ މަގާމުން އިސްތިއުފާ ދެއްވުމާއި ގުޅިގެން ފޮރިން މިނިސްޓަރު އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ އެ މަގާމުގައި ހުންނަވާ ވިސާމް ކޮށްދެއްވާފައިވާ ޚިދުމަތްތަކަށް ޝުކުރުއަދާކުރައްވާ ކަމަށެވެ. މިނިސްޓަރު ޝާހިދުގެ މިޓްވީޓް ރިޓްވީޓް ކުރައްވާ ވިސާމް ވިދާޅުވީ މަގާމުގައި ހުންނެވިއިރު ޝާހިދު ދެއްވި އެއްބާރުލުމާއި، އެހީތެރިކަމަށް ޝުކުރު އަދާކުރައްވާ ކަމަށެވެ. އަދި ޝާހިދުގެ ލީޑަރޝިޕްގެ ދަށުން މަސައްކަތް ކުރައްވަން ލިބިވަޑައިގަތުމަކީ ޝަރަފެއް ކަމަށެވެ.
ވިސާމް މެލޭޝިޔާގެ ސަފީރުކަމަށް އައްޔަނުކުރައްވާފައިވަނީ 2019 ވަނަ އަހަރުގެ މާރޗް މަހުގެ 26 ވަނަ ދުވަހުއެވެ.
ސަފީރުކަން ކުރެއްވުމުގެ ކުރިން ވިސާމް ވަނީ ރައްޔިތުންގެ މަޖިލީހުގެ މަޑުއްވަރީ ދާއިރާގެ ގޮނޑި ފުރުއްވާފައެވެ. ވިސާމަކީ ކެންދޫ ދާއިރާގެ ކުރީގެ މެމްބަރު އަދި ޑީއާރުޕީގެ ކުރީގެ ލީޑަރު އަހުމަދު ތަސްމީން އަލީގެ އަނބިކަނބަލުންނެވެ.
