ކޮމިޓީގެ މަސައްކަތްތައް އަވަސް ކުރުމަށް އަނެއްކާވެސް ރައީސް ނަޝީދު ގޮވާލައްވައިފި
5 އެޕްރީލު 2022 | އަންގާރަ 06:58މަޖިލީހުގެ މިއަހަރުގެ ފުރަތަމަ ދައުރުގައި ސަރުކާރުގެ ފަރާތުން 36 ބިލެއް މަޖިލީހަށް ހުށައަޅަން ނިންމާފައިވޭ
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
ރައްޔިތުންގެ މަޖިލީހުގެ ކޮމިޓީތަކުގައި ހުރި ބިލްތަކުގެ މަސައްކަތް އަވަސް ކުރުމަށް އަނެއްކާވެސް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގޮވާލައްވައިފިއެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ރައީސް ނަޝީދު ވިދާޅުވީ، ކޮމިޓީތަކުގައި މިވަގުތު 25 ބިލެއް އެބައޮތްކަމަށާއި، އެ ބިލުތަކުގެ މަސައްކަތް ހަލުވިކުރުމަށް ހުރިހާ މެންބަރުންވެސް މަސައްކަތްކުރައްވަން ޖެހޭކަމަށެވެ. އަދި މި ބިލުތައް ނުނިމި ކޮމިޓީތަކުގައި އޮތުމުގެ ބަދަލުގައި އަވަހަށް ބިލްތައް ނިންމާލެވޭނޭ ގޮތަކަށް މަސައްކަތް ކުރަން ޖެހޭ ކަމަށެވެ. މީގެއިތުރުން އެފަދަ ވިސްނުމެއް މެންބަރުން ގެންގުޅުއްވުމަކީ ބޭނުންތެރި ކަމެއްކަމަށްވެސް ރައީސް ނަޝީދު ވިދާޅުވިއެވެ.
މަޖިލީހުގެ މިއަހަރުގެ ފުރަތަމަ ދައުރުގައި ސަރުކާރުގެ ފަރާތުން 36 ބިލެއް ވަނީ މަޖިލީހަށް ހުށައަޅަން ނިންމާފައެވެ. މީގެތެރޭގައި ހިމެނެނީ އަލަށް ހުށައަޅާ 14 ބިލަކާއި، މިހާރު އަމަލުކުރަމުންދާ ގާނޫނުތަކުގެ ތެރެއިން 22 ގާނޫނަކަށް އިސްލާހު ގެނައުމުގެ ބިލެވެ.
